2 KORENTENGOLU 9

1Men mu senumanŋolu deema kuwo ti, kun nte a la nte xa safe ki alu ma wo la. 2Nte xa alu ŋanneya ɲuma lon. Nte xa ń na sewo yita alu la kuwo la Maseduwanengolu ɲen, x'a fo xo: «Akayi jamano badinŋolu be tobennin xa deemalo ke kabirin serun.» Alu la jijalo xa i tala bee jusudun. 3Wo bee nin a ta, nte be n badinŋolu kila alu ma, walasa sewo men be nte la alu la kuwo to, wo kuwo xan, wo xana ke fuwo ti. Nte b'a fe alu xa tara tobennin í xo nte tun x'a fo ɲa men. 4Nin wo nte, nin nte nin Maseduwanengo dolu nata, x'a tara alu nte tobennin, n si malu, walla atelu si malu, bawo n lata alu la ten. 5Wo to, nte x'a mafele xo a xa xan nte xa ɲin badin innu matara i xa taxa ń ɲa alu bata, walasa alu fannu xa nilifenŋo men lahido ta xa ban, i xa wo ɲabo. Wo to, nte si a tara a tobenta, anin wo si a yita xo alu be nilo kela ŋanneya ɲuma la, alu nte a kela ŋanneya jaxu la. 6Alu a lon xo: Men be dondin lanna, wo si dondin tege. Men be kiika lanna, wo si kiika tege. 7Bee kilin kilin xa nilo ke í xo a x'a latege a jusukunŋo la ɲa men. A xana ke nitokuwa nin diyakuwa la, bawo men be nilo kela ɲaɲo to, wo le la kuwo xa di Ala ɲen. 8A sinŋo be Ala ɲen xa neemo sifa kiika bee do ke alu ɲen, walasa alu maakuɲanfenŋolu xa tara alu bulu tuma bee, anin kiika xa tu alu bulu kuɲumako bee xanma. 9Í xo a be safenin Kitaabo to ɲa men xo: «A x'a bulo labula, a xa fangantanŋolu so, a la tilinninɲa be tula fo abada.» 10Ala men be lannifenŋo dila senekela ma, xa domolifenŋo di baluwo ti, wo si lannifenŋo di alu dulu ma, x'a labugi, walasa alu la ɲumaya xa nafa kiika ke. 11Alu si fentigiya ɲa bee ma, walasa alu xa sin tuma bee xa ɲumaya yita. Wo ɲa ma, moxo kiika si Ala tantu nilifenŋolu koso, n be mennu lasila i ma alu toxo la. 12Bawo alu be baaro men kela wo nilifenŋolu ti, wo nte danna Ala la moxo senumanŋolu maakuwo ɲiɲalo doron ma, bari wo s'a tu barakelalo kiika xa ke Ala ɲen. 13Wo baaro nafa s'a tu kiika xa Ala tantu alu la xululo xanma. Anin, a si alu la xantigiya yita Kirisita la xibaru Dimanŋo ɲen. I s'a tantu du alu la ɲumaya koso, bawo alu nin itelu nin tolu bee kafuta alu bulufenŋolu to. 14Ala xa neema maɲoxonjebalo men ke alu ɲen, wo s'a tu, i xa Ala matara alu ɲen, xa i la xanuya yita alu la. 15Barako xa bula Ala ɲen a la nilifen maɲoxonjebalo xanma.

will be added

X\