2 KORENTENGOLU 8

1Ń badinŋolu, Ala la neemo men dita Ala la jamalu ma Maseduwane jamano xan, n b'a fe alu xa wo lon. 2Je lannayabaxolu xotobota tooroku kiika fe; bari i la ɲaɲo tun xa bun ɲa men, fo i xa i bulolu labula bete, haali x'a tara i tunnu la fangantanɲa xa bun. 3Nte mu wo seedo ti xo i xa nilo ke i sinkuwo la. I fannu tanbita i sinkuwo la, i xa wo ke i fannu ma. 4I x'e balan n ma xo n xa son i dulu xa sindun wo deema bolo to, men tun xa xan xa ki Yude senumanŋolu ma. 5I xa men ke, wo tanbita ntelu yilibenmata xan. I xa i fannu di Marigi ma folo, wo xo, ntelu ma, x'a la Ala sago xan. 6Wo le x'a tu, n xa Tite matara xo a xa wo xanuya baaro men damuta alu bata, a xa wo dafa. 7Awa, x'a la a xan fenŋo bee be alu kun xa fuuma: Lannaya, xuma ɲalonŋo, lonŋo, jijaliɲa bee, anin alu xa xanuya men soto ntelu la. Wo xanma, n b'a fe alu xa wo xanuya baaro du ke xa fuuma. 8Ń nte ɲin fola alu ɲen í xo waajibi, bari nin ń xa tolu la jijalo fo alu ɲen, ń be ɲa le dila alu ma alu si a yita ɲa men xo alu la xanuya mu tonɲa le ti. 9Bawo alu xa n Marigi Isa Kirisita la neemo lon: Ate men tun mu fentigo ti, a x'a fan ke fangantanŋo ti atelu ɲen, walasa alu xa fentigiya a la fangantanɲa fe. 10Nte be ń hakililata dila alu ma ɲin ku in to: A xa ɲin alu xa taxa ɲa wo la, serun ate mennu fololu xa ku ke anin wo doron nte, alelu dulu x'a latege xa ku ke. 11Wo to saasa, alu wo baaro dafa. Alu x'a latege ɲaɲo to xa wo baaro ke, wo ɲa ma, alu a ke ɲaɲo to, x'a la alu sinkuwo xan. 12Nin ŋanneya xa ɲin soobeya la, men be n bulu, wo si muta. Men nte bulu, wo nte jaatela. 13Wo xoto nte xo moxo tolu deemalo x'alu fannu maakuwo sa, bari bee la xaaɲanŋo le be nofe. 14Bi, alu be fuumanin men na, wo si ke xa itelu be dasanin men na dafa, walasa lun do, i je fuuma men na, wo xa ke xa atelu je dasa men na dafa. Wo si na xaaɲanŋo ti, 15í xo a be safenin Kitaabo to ɲa men xo: «Men xa kiika ko, wo ta man fuuma, men xa dondin ko, wo ta man dasa.» 16Barako xa bula Ala ɲen, wo men xa jijalo di Tite ma alu la kuwo to, í xo men ɲoxon be ntelu la. 17N xa men ŋinin a fe, a sonta wo ma. A taxata ɲa jijalo to, fo a fan x'a latege xa taxa alu bata. 18N be a nin n badinxe kila, Ala la jamalu bee be men jagila a la baaro koso, xibaru Dimanŋo kuwo to. 19X'a kafu wo ma, Ala la jama lelu x'a sugandi x'a xa ke n dandanbaxo ti n na taxamo to, wo xanuya baaro la. N be wo baaro kela Marigi fan na bunɲa xanma, anin n na ŋanneya beto yito xanma. 20N be i korosila walasa maxumalidula si xana soto n ma ɲin xaalisiba in nabaaraɲa to. 21N b'a ŋininna xa ɲuma ke Ala ɲa xoto, wo doron nte, bari moxo dulu ɲa xoto. 22N janxa i nin n badinxe do ki, n x'ate men na jijalo xotobo tuma kiika anin ku kiika to. A be jijalo yitanin saasa xa tanbi folo xan, bawo a be lanin alu la bete. 23Tite mu ń taxamaɲoxo nin ń baarakeɲoxo le ti alu bata. N badinŋolu mu Ala la jamalu la kiladinŋo lelu ti, mennu be baaro kela Kirisita bunɲa xanma. 24Wo to, alu a yita i la xo alu b'e xanunin bete, walasa a xa henne Ala la jamalu ma, anin i x'a lon xo n boloxo le mu xa sewo alu la kuwo la.

will be added

X\