2 KORENTENGOLU 7

1Ń badin xanuninŋolu, x'a la a xan ɲin ɲoxon lahidulu be n bulu, alan xa n fannu senuya balo nin niyo la noxokuwolu bee ma. Alan xa n na senuya dafa Alaɲasilanɲa xono. 2Alu i jusukunŋo dayele n ɲen. N man moxo si tooɲo. N man moxo si tiɲa. N man moxo si domo. 3Nte nte wo fola xo ń be alu jalagila. Bawo ń x'a fo xa ban xo, alu xanuya be n na, nilamaya nin saya bee xono. 4Nte be lanin alu la bete! Nte be sewonin bete alu la. Nte xa hakililasigiba soto, ń be ɲaɲanin bete n na toorokuwolu bee xono. 5Tonɲa la, kabirin n sita Maseduwane jamano xan, n man lafiya si soto. N xa tooro sifa bee je. Kelo be n namininŋo to, silanɲa be n xono. 6Bari Ala men be hakililasigo dila jusuxasininŋolu ma, wo xa n hakilo lasigi Tite la na fe. 7A la na doron man wo ke, bari a xa hakililasigo men du soto alu la. A x'a fo n ɲen xo alu b'a fe xa nte je tugun. Jusuxaso men be alu la, anin alu be jijanin nte ɲen ɲa men, a xa wo dulu fo n ɲen. Wo le xa do kafu nte la ɲaɲo ma tugun. 8Awa, haali nin nte xa safe men ki alu ma, wo x'alu nitokuwa, nte nte nimisinin wo la saasa. Nte tun nimisita wo la, ń x'a je tumo men xo wo safe tun x'alu nitokuwa waxati la. 9Bari saasa, nte be ɲaɲanin. Nte nte ɲaɲanin xo ń x'alu nitokuwa de, bari nte be ɲaɲanin bawo alu la nitokuwa x'a tu alu nimisita. Alu la nitokuwa keta Ala sago ti, wo to, ntelu man leebu si lasi alu ma. 10Bawo nitokuwa men be bennin Ala sago ma, wo be nala nimiso le tila, men xo mu kisilo ti. Nimisi nte wo to. Bari duniya la nitokuwa be nala saya le tila. 11Saasa, alu a mafele alu la nitokuwa men keta Ala sago ma, wo falinta men na: A x'alu jusudun. Alu x'alu fannu lafaasa bete. Alu diminbeteta, alu silabeteta, a diyata alu ɲen bete xa nte je. Alu juso bee tun be wo kuwo to. Alu xa jalagilo ke wo kuwo to bete. Alu x'a yita ɲa bee ma xo alu xa xoyi wo kuwo to. 12Nin í x'a je nte xa safe ki alu ma, men xa ku jaxo ke, wo koso nte, men du xa wo ku jaxo soto, wo koso nte. Bari a keta walasa x'a yita alu la Ala ɲa xoto, alu be balannin ntelu ɲen ɲa men. 13Wo le xa n hakilo lasigi. N man hakililasigo doron soto, do kafuta n na ɲaɲo ma, n x'a je tumo men xo Tite tun be ɲaɲanin alu bee la hakililasigo la. 14Awa, nin nte xa ń wasu dondin a ɲen alu la kuwo la, alu man nte kunŋo lajimi. Bari n xa tonɲa fo alu ɲen ɲa men tuma bee, wo ɲa ma, n xa tantulo men la alu xan Tite ɲen, wo du keta tonɲa ti. 15Do le kafuta a la xanuya ma alu ɲen, tuma wo tuma nin a hakilo jigita alu bee la xuluwo la, anin alu la kunbenniɲa la, silanɲa nin jarajaro to. 16Nte be ɲaɲala bawo ń si sin no xa ń na lannaya la alu xan kuwo bee to.

will be added

X\