2 KORENTENGOLU 6

1X'a la n nin Ala la baarakeɲoxoya xan, n be alu matarala xo: Alu xa Ala la neemo men soto, alu xana a tu wo xa ke fuwo ti. 2Bawo Ala xo: «Nte x'é lame waxati ɲuma, Ń x'é deema kisilo lunŋo.» A fele, saasa le mu waxati ɲuma ti. A fele, saasa le mu kisilo lunŋo ti. 3N nte a fe ɲa si ma xa ke takkinnafen ti moxo do ɲen, walasa fe si xana je n na baaro la. 4Bari n be kuwo bee kela le x'a yita xo n mu Ala la baaradinŋolu ti. N be muɲaba yitala toorokuwolu to, bonekuwolu to, anin xonotofilikuwolu to. 5N buwota xa bula kaso la, jama lamurutita n xanma. N bulata baara xolenŋolu la, xa tooro sinnoxobaliya nin xonxo bulu. 6N b'a yitala du xo n mu Ala la baarakedinŋolu ti n na senuya fe, n na lonŋo fe, n na muɲo nin n na ɲumaya fe, Ni Senunŋo la baaro fe, n na xanuya soobe fe, 7n na tonɲa waajulo fe anin Ala la sintigiya fe, tilinninɲa kelekemiranŋolu fe, n be kelo kela anin n be n fannu lakantala mennu la. 8N si bunɲa, n si doxoya du. N toxojaxo si fo, n toxoɲuma du si fo. N be jaatenin faniyantelu ti, x'a tara n mu tonɲatigo lelu ti. 9N be mafelenin í xo moxo mennu nte lonnin, x'a tara n be lonnin bete. N be mafelenin í xo moxo satolu, x'a tara n be i nila. N be ɲangila, bari n nte faxala. 10N juso be xasila, bari wo bee nin a ta, n be ɲaxalinin tuma bee. N mu fangantanŋolu ti, bari n be moxo kiika kela fentigolu ti. N be í xo bulutoxulunŋolu, x'a tara tonɲa la, fenŋo bee be n bulu. 11N badin Korentengolu, n xa tonɲa le fo alu ɲen. N xa n jusukunŋo bee le dayele alu ɲen. 12Alu la kuwo man doxo ntelu ma n jusukunŋo la. Alu fan nelu x'alu jusukunŋolu dataxun ntelu ɲen. 13Saasa, nte be xumala alu ɲen í xo ń dinŋolu: Ntelu xa men ke alu ɲen, alu dulu xa wo ɲoxon ke n ɲen. Alu i jusukunŋo muume dayele n ɲen! 14Alu nin lannayabalolu xana su kilin la i xanna. Tilinninɲa nin tilinbaliya si kafu no ɲa di? Keneya nin dibo si kafu no ɲa di? 15Kirisita nin Sentane si ben no ɲa di? Walla sila joman be lannayabaxo nin lannayabalo te? 16Ben joman ne si sin no xa ke Alabatusuba nin bololu te? Bawo nte lelu mu Ala nilama la batusuba ti, í xo Ala fan x'a fo ɲa men xo: «Nte si sigi i bata, ń nin i si i taxama i ɲoxo fe, nte si ke i la Ala ti, i si ke nte la siya ti.» 17Wo le x'a tu, Marigi Ala xo: «Alu bo ɲin moxo innu to, x'e tala i ma, alu xana maxa fen noxonin si la. Nte si alu lamuta. 18Nte si ke alu ɲen fa ti, alu si ke nte ɲen dinxelu nin dinmusolu ti, Sinŋobeetigi Marigi xo ten.»

will be added

X\