2 KORENTENGOLU 4

1Ala x'é tu a la ɲumaya xono xa wo baaro xarifa n ma, wo le x'a tu, n nte segela. 2N x'e ban dibilakuwolu nin maluyakuwolu to, n nte i taxamala kewuya la. N nte Ala la xumo mayelemala, bari n be tonɲa le yitala nin moxolu bee si la n na, Ala ɲa xoto. 3Wo bee nin a ta, nin n na xibaru Dimanŋo be dibinin, a be dibinin halagibaxato lelu ɲen. 4A be dibinin lannayabalo lelu ɲen, bawo ɲin duniya in ala xa wolu hakilo fiyonɲa, walasa Xibaru Dimanŋo men be Kirisita la nooro yitala, i xana wo keneya je, ate Kirisita men mu Ala mununŋo ti. 5N na waajulo nte n fannu xan, bari a be Isa Kirisita, n Marigi le xan. Men mu ntelu la kuwo ti, n b'a fola xo n mu alu la jonŋo lelu ti Isa koso. 6Bawo Ala men x'a fo xo: “Keneya xa mana dibo to,” ate fan ne xa keneya lamana n jusukunŋolu la, walasa n x'a la nooro keneya lon, wo men be ŋelenxula Kirisita ɲada to. 7Bari wo naafulo be n kun banxudaxolu xono, walasa a xa xoyiya xo ɲin sintigiya maɲoxonjebali in be bola Ala le la, a nte bola ntelu la. 8N xa tooro sifa bee je, bari n man xonotofili. N hanmeta, bari n gigo man xati. 9A lota n nofe xa n tooro, bari Ala man n kilinnu bula. N buwota xa n naboyi dugo ma, bari n man halagi. 10N be Isa la saya yitala n balo to tuma bee, walasa Isa la nilamaya du xa yita n balo to. 11N na nilamaya xono, saya be n nofe tuma bee Isa koso, walasa Isa la nilamaya du x'é yita n bala satalu to. 12Wo ɲa ma, saya be baaro la ntelu to, bari nilamaya be baaro la atelu to. 13Kitaabo b'a fola xo: «Nte xa lannaya ke, wo le x'a tu, nte xumata.» N dulu xa lannaya ke, wo le x'a tu, n be xumala. 14N x'a lon xo men xa Marigi Isa lakuni xa bo furelu to, wo si ntelu dulu nin Isa lakuni i ɲoxo fe, anin xa ntelu nin atelu bula a senbo to. 15N be kuwo fen wo fen jela, alelu ɲen mu, walasa Ala la neemo xa si moxo kiika ma xa taxa a fe, men si ke sabaabu ti tantuli kiika xa ke, xa nooro la Ala xan. 16Wo le x'a tu, n nte segela. Haali nin n balo be tiɲala dondin dondin, n niyo be tokutayaxan ne lun wo lun. 17Bawo n be tooro mennu sotola ɲin waxati in, wolu be nooro maɲoxonjebalo nin nooro banbalo men tobenna ntelu ɲen, wo toorolu xa fe wo nooro sinna. 18N ɲa nte fen jetalu to, n ɲa be fen jebalo lelu to. Fen jetalu tanbito le mu, bari fen jebalolu be tula fo abada.

will be added

X\