2 KORENTENGOLU 3

1N s'a damuta tugun ba xa n fannu toxoɲuma fo? Walla n maakuwo b'a la ba, í xo dolu b'a kela ɲa men xa safelu ki alu ma xa n fannu toxoɲuma fo, walla xa wo ɲoxon safelu soto xa bo alu la? 2Atelu fan nelu mu n na safe ti, men safeninŋo be n jusukunŋolu la, moxo bee xa men lon x'a xaran. 3Sikka nt'a to, alu mu Kirisita la safe le ti, men baaro xarifata ntelu ma. A safeninŋo nte lankaro la, bari Ala nilama Niyo la. A safeninŋo nte kuru walahalu xan, bari walaha subumalu xan, alu jusukunŋolu xan. 4N xa wo lannaya le soto Kirisita barako to, Ala ɲa xoto. 5N me a fo no xo n si wo ɲoxon baara ke n fannu barako la, n na sinŋo be bola Ala le to. 6Ate le xa sinŋo di n ma xa ke Kafuxan Kuto baarakelalu ti, men nte sariya safe ta ti, bari Ni Senunŋo ta. Bawo sariya safe be nala saya le tila, bari Ni Senunŋo be nilamaya le dila. 7Awa, sariya men mu saya sabaabo ti, fo a xumolu safeta kuru walaholu xan, wo xa nooro soto fo Banisirayila dinŋolu tunnu me kila Musa ɲada mafele no wo nooro koso. Haali wo, wo nooro tun nte tuxan wo ɲada to. 8Ni Senunŋo la baaro be nooro men sabaabula, wo me bunɲabete ba xa tanbi wo xan? 9Fenŋo men si halagilo sabaabu, nooro keta wo la baaro la; fenŋo men be tilinninɲa dila, nooro me ke wo la baaro la bete ba xa tanbi wo fen folo ta xan? 10Nooro tun be men xan, nooro nte wo xan tugun, ɲin nooro maɲoxonjebali kuta in ɲa xoto. 11Nin nooro keta fen tanbita la, fenŋo men be tula, wo nooro si bunɲa bete xa tanbi wo folo ta xan. 12Xa wo ɲoxon gigi tu n na, yilanyilan si nte n na. 13N nte a kela í xo Musa, wo men tun be faano buurila a ɲada la, walasa Banisirayila dinŋolu xana a la nooro banta labanto je. 14Bari i hakilibunda taxunta. Haalibi, nin i be Kafuxan Xoto kitaabolu xaranna, wo faanu kilinŋo be buurinin i hakilo ma. A man bo je bawo a be bola je Kirisita kafuɲoxoya le fe. 15Haalibi, nin i be Musa la kitaabolu xaranna tuma wo tuma, faano do be buurinin i hakilo ma. 16Bari xa tuubi Marigi ɲen, wo doron ne si faanu in bo je. 17Bawo Marigi mu Niyo le ti. Marigi Niyo be dula men, hooroya be non. 18Ntelu mennu bee ɲada laxulunŋo mu, Marigi nooro be í yitala n xan, a b'é xo í xa fenŋo do mafele duŋare to. Wo ɲa ma, n be yelemala xa ke í xo Marigi. N be bola nooro do to, xa dun do xote to, men xa bun, Marigi men mu Niyo ti barako to.

will be added

X\