2 KORENTENGOLU 2

1Wo le x'a tu, nte x'a latege xo ń nte ń koppala alu bata, walasa ń xana taxa alu nitokuwa tugun. 2Bawo nin nte x'alu nitokuwa, jon si nte nitodiya tugun? Atelu nte ba, ń xa atelu mennu nitokuwa? 3Nte la safe kekunŋo tun mu le, walasa nin ń sita alu bata, nte xana nitokuwa soto moxolu koso, men tunnu xa xan xa nte nitodiya. Men mu alu la kuwo ti, a be xoyiyanin nte ma xo nte la nitodiya mu alu bee du ta le ti. 4Nte juso ɲaxamininba nin nte nitokuwaninŋo nin nte ɲaji kiika boto le xa wo safe ke x'a ki alu ma. Nte man wo ke x'alu nitokuwa, bari nte xa wo ke le, walasa nte be alu xanunin bete ɲa men, alu xa wo lon. 5Nin moxo do xa nitokuwa kuwo ke, wo tigi man nte nitokuwa, bari ɲa do ma, x'a tara n man danmatanbi, a x'alu bee le nitokuwa. 6Alu kiika xa jalago men naboyi wo xe xan, wo waseta. 7Wo le x'a tu, saasa alu xanta le xa yaafa a ma, x'a hakilo lasigi, walasa a xana nitokuwa jaxu, fo x'a gigo xati. 8Anin, ń b'a ŋininna alu fe, xo alu xa xanuya yita a la. 9Nte la safe kikunŋo du tun mu le x'alu xotobo, walasa x'a lon nin alu be tobennin xa xulu kuwo bee to. 10Alu je yaafa moxo men ma, nte si yaafa wo ma. Nin nte yaafata kuwo do to, men xa nte yaafakun bo, nte yaafata alelu koso, Kirisita ɲa xoto; 11walasa Sentane xana sinŋo soto n xan. Bawo n x'a ŋanneyalu lon. 12Awa, nte sita Torowasi gallo xono tumo men, xa Kirisita la xibaru Dimanŋo waajulo ke, nte x'a je xo Marigi tun xa daba yele nte ɲen wo xanma. 13Bari nte hakilo tun nte siginin, bawo ń man ń badinxe Tite je. Wo le x'a tu, nte xa ń sara i la xa bo je, xa taxa Maseduwane jamano xan. 14Tanto be Ala ɲen, ate men be n nin a la sinsoto jama lataxala i ɲoxo fe tuma bee, Kirisita barako to. A b'a kela ntelu fe Kirisita xa lon dula bee, í xo latikolonŋo men xaso be jenjenna a bee to. 15Ń mu Kirisita sumadimanŋo le ti Ala bulu, moxo kisininŋolu to, anin halagibaxatolu to. 16Dolu bulu, wo mu saya sumo le ti, men be saya lasila i ma. Do xotelu bulu, wo mu nilamaya sumo le ti, men be nilamaya lasila i ma. Jon be je nin a nin wo ɲoxon baaro xa xan? 17Ntelu nte í xo moxo kiika xotelu, mennu be Ala la xumo kela jaagukunŋo ti. Bari x'a la a xan xo Ala le xa n ki, n be xumala tonɲa la a ɲa xoto, xa n tu Kirisita la kafuɲoxoya xono.

will be added

X\