2 KORENTENGOLU 13

1Ɲin be kela a sinɲa sabananŋo le ti nte xa taxa alu bata. «Kuwo bee xa xan xa ɲabo x'a la moxo fula walla saba la seedeya xan.» 2Ń be ɲin kankeri in lala, mennu xa junubo ke xa tanbi anin moxo tolu bee ɲen. Nte tun xa wo ke ń na nali fulananŋo sinfe alu bata, bari ń be saagila a ma saasa x'a tu nte nte je: Nin nte taxata tugun, ń me tanbi fusi la. 3Alu be taagumanseedo ŋininna, men s'a yita xo Kirisita be xumala nte fe, alu si wo soto. Kirisita nte barakentan ti alu bata, bari a be a la sintigiya yitala alu to. 4Tonɲa le mu, a gengenta yiro xan tumo men, a tun mu barakentanŋo ti. Bari saasa, a be í nila Ala la sintigiya fe. N dulu mu barakentanŋolu ti ate kafuɲoxoya xono. Bari n nin a si nilamaya i ɲoxo fe, Ala la sintigiya barako la alu ɲen. 5Al'alu fannu segesege, x'a mafele nin alu be lannaya silo xan. Al'alu fannu xotobo. Alu man a lon ba xo Isa Kirisita be alu to? Fo nin xotobolo da man diya alu la de. 6Ń yilo b'a ma xo alu si a lon xo xotobolo da man kuwa n na. 7N be Ala matarala xo alu xana kujaxu si ke. N nte a fe x'a yita xo xotobolo da diyata n na, bari n b'a fe x'alu je ɲuma le kela, haali nin xotobolo keta í xo nin a da kuwata n na. 8Bawo sin fusi nte n ɲen tonɲa xanma, sinŋo be n ɲen a ɲen ne. 9Ntelu be ɲaɲala nin n barako xa doxo, x'a tara atelu barako xa bun. N be Ala matarala men na, wo mu le xo alu xa dafa. 10Wo le x'a tu, xa nte nin alu te janɲaninŋo tu, ń be ɲinnu safela alu ɲen, walasa nin nte sita je tumo men, nte xana fatiya alu ma x'a la Marigi la sin dinmaninŋo xan nte ma. Wo sinŋo dita alu la ɲataxo le xanma, a man di alu tiɲa xanma. 11Awa saasa, ń badinŋolu, alu ɲaxali, alu a ŋinin alu xa dafa, alu i ɲoxo jusudun. Alu i ɲoxo faamu. Benŋo xa ke alu te. Nin wo keta, xanuya nin heero tigi Ala si tu alu fe. 12Alu i ɲoxo xonton baataya xontonni senumanŋo la. Senumanŋolu bee be alu xontonna. 13Marigi Isa Kirisita la neemo, anin Ala la xanuya, nin Ni Senumanŋo la kafuɲoxoya xa ke alu bee fe.

will be added

X\