2 KORENTENGOLU 12

1Awa, fo nte xa ń fan bunɲa le haali nin nafa nte wo la. Wo bee nin a ta, saasa nte be xumala jelifenŋolu nin yitalifenŋolu xan, Marigi xa mennu ke nte ɲen. 2Nte xa Kirisita la moxo do lon, a san tan nin naano le fele, a tata xa taxa a ti fo sanfata sabananŋo xan. A tun b'a moxo sawuro le to ba? Ń man wo lon. A tun nte a moxo sawuro to ba? Ń man wo lon, bari Ala x'a lon. 3Nte xa don lon xo wo xe tata xa taxa a ti fo arajanna. A tun b'a moxo sawuro le to ba? A tun nte a moxo sawuro to ba? Ń man wo lon, bari Ala x'a lon. Wo xe xa xumolu me non, mennu me fo no anin a nte dagenin moxo xa saagi mennu ma. 5Nte si ń fan bunɲa wo xe la kuwo la, bari men mu ń fan ken ti, ń si ń fan bunɲa ń na barakentanɲa le xanma. 6Nin ń tun b'a fe xa ń fan bunɲa, ń me ke moxo hakilintan ti, bawo ń tun be nala tonɲa le fola. Bari nte si ń fan bunɲa tu je, walasa moxolu be nte jela men kela, anin i be men mexan ń na, i xana taxa nte jaate xa tanbi wo xan. 7Wo bee nin a ta, walasa nte xana ń fan bunɲa wo yitalifen maɲoxonjebalolu koso, dimin ŋaninma do bulata nte balasubo to, wo keta Sentane la melekiyo do bulaninŋo ti nte la, xa ń tooro walasa nte xana ń fan bunɲa. 8Nte xa Marigi matara wo kuwo la í xo sinɲa saba xo a xa wo bo nte la. 9Bari a xa ń jaabi xo: «Ń na neemo waseta í ɲen; ń na sintigiya be í yitabetela barakentanɲa le to.» Wo le x'a tu, a xa di nte ɲen xa ń fan bunɲa ń na barakentanɲalu la, walasa Kirisita la sintigiya xa ke nte xan. 10Wo le x'a tu, ń be ɲaɲala barakentanɲalu nin nanilolu nin xoleyalu nin toorokuwolu nin xonotofilikuwolu la, ń be mennu sotola Kirisita koso. Bawo nte barako xa doxo tumo men, ń barako xa bun wo tumo le. 11Nte be xumala í xo hakilintanŋo, bari alelu xa ń diyakuwa xa ń bula wo la. Ate le tunnu xa xan xa ń nafaasa. Bawo haali nin nte nte fusi ti, alu la wo kiladinbalu nte nte ɲa, ɲa si le ma. 12Taagumanseedo mennu be nte la kiladinɲa yitala, wolu keta alu bata muɲa dafaninŋo to: Taagumanseedolu nin kawakuwolu anin sintigiyakuwolu. 13Awa, nte xa mun ke Ala la jama tolu ɲen nin nte man wo ke atelu ɲen? Fo ɲin ku kilin in de, xo nte man den alu la! Alu wo tilinbaliya yaafa nte ɲen. 14A fele, nte be tobennin saasa xa ń na taxakun sabananŋo ke alu bata; nte nte nala denna alu la; bawo nte nte alu bulufenŋolu nofe, nte be alu fan nelu nofe. Dinŋolu man xan xa naafulo kamari i wulubaxolu ɲen, bari wulubaxo lelu xa xan xa naafulo kamari i dinŋolu ɲen. 15A ken si diya nte ɲen xa ń bulufenŋolu bee di anin xa ń fan di alu koso. Nin nte be alu xanula xa taxa a fe, wo si do bo alu la xanuya la nte ɲen ba? 16Alu si son a ma xo nte man den alu la. Bari a si fo xo nte mu kewo le ti, xo ń x'alu muta kewuya la. 17Nte xa mennu ki xa taxa alu bata, nte x'alu domo wolu do la ba? 18Nte xa Tite matara xo a xa taxa alu bata, ń x'a nin n badinxe bula. Tite x'alu domo le ba? Nte nin ate la miiriya bee man ke kilin ti ba? N bee man a lo sila kilin fe ba? 19Kabirin tuma jan, alu b'a miirila ba xo n be xumala xa boloxo di n fannu ma alu ɲa xoto? Ayi de, bari n be xumala Ala le ɲa xoto, Kirisita la kafuɲoxoya to. N badin xanuninŋolu, wo bee kunŋo mu le nin alu si taxa ɲa lannaya to. 20Nte be silala xo nin nte sita alu bata, nte xana taxa alu tara ɲa ma, men nin nte diyanɲo nte kilin ti, anin alu xa nte tara ɲa ma, men nte alu diyanɲo ti. Nte be silala ń xana taxa a tara xo kelolu nin kiiliya be alu te, anin diminnalu nin fadinɲalu, nin nanilolu nin ɲoxomaxumolu nin fanbunɲa anin ku ɲaxamininŋolu. 21Nte be silala xo nin nte taxata alu bata sinɲa xote, nte la Ala xana taxa nte majigi alu ɲa xoto, anin xo nte xana taxa xasi moxo kiika koso, mennu be taxala ɲa xa junubo ke, í xo i x'a ke xotonin ɲa men. I man son xa nimisi i la ku noxoninŋolu nin i la jadoyalu nin i la ku kabanin keninŋolu la.

will be added

X\