2 KORENTENGOLU 11

1Nin alu tunnu si son xa nte la hakilintanɲa dondin muɲa! Iyo, alu muɲa ń xoto! 2Nte be kiiliyanin alu to, kiiliya men be bola Ala la. Ń x'alu mamuta xe kilin doron ne ɲen, nin wo mu Kirisita ti. Ń b'a fe x'alu lalo a ma í xo xarafa senumanŋo. 3Bari, í xo sa xa Hawa lafili a la kewuya fe ɲa men, ń be silanin xo alu hakilo xana taxa yelema, x'alu la xantigiya soobe tiɲa Kirisita ɲen. 4Bawo nte x'a je xo nin moxo do nata xa Isa xote la kuwo fo alu ɲen, men nin ntelu ta nte kilin ti, alu si son wo ma. Nin alu xa niyo do xote soto, men nin alu la sotoninŋo nte kilin ti, walla xa xibaru Diman xote soto alu tunnu man men soto, alu si muɲa bete wo xoto. 5Ń hakilo la xo alu be wo mennu jaatenin kiladinbalu ti, wolu man fisa nte ti fusi to. 6A si ke xo nte nte xumaɲalonnaba ti, bari lonŋo ken silo la, a nte ten. Ntelu xa wo silo yita alu la, x'a xoyiya kuwo bee to, anin ɲa bee ma. 7Nte xa Ala la Xibaru Dimanŋo fo alu ɲen tumo men, nte xa wo ke fu. Nte xa ń fan majigi, walasa x'atelu xotota. Nte xa junube ke wo ti ba? 8Nte sonta Ala la jama do xotelu xa nte sara, xa balu wolu la, walasa nte xa baaro ke atelu ɲen. 9Xa nte tu alu bata, nte man den moxo si la, xa nte maakuwo tu fenŋo dolu la, bawo n badinŋo mennu nata xa bo Maseduwane, wolu xa nte maakuɲanfenŋolu bee sanba ń ma. Kuwo bee to, nte xa ń fan kisi xa ke alu ma doni ti. Nte si taxa ɲa xa ń fan kisi wo ma. 10Kirisita la tonɲa men be nte to, wo xanma, nte b'a fola xo: Sewokuwo men be nte bata, moxo si me wo bo no nte la Akayi maro bee xono. 11Mun na? Xo nte nte alu xanula ba? Ala x'a lon xo nte be alu xanula! 12Nte be men kexan, nte si wo ke tugun, walasa mennu be sabaabu ŋininna x'e wasu xo i mu ntelu bonɲoxonkunŋolu ti, n x'e bali i xa wo soto. 13Wo moxolu mu kiladin fano lelu ti, anin nanbarantelu mennu be i fannu kela Kirisita la kiladinŋolu ti. 14Wo nte dabariban ku ti, bawo Sentane fan b'a fan kela keneya melekiyo ti. 15Wo to, a nte ju ku ti nin a la baaradinŋo dulu x'e fannu ke tilinninɲa la baaradinŋolu ti. Bari i la ketalu nin labanɲa men xa xan, i si wo soto. 16Nte be saagila a ma xo: Moxo si xana nte jaate xo ń mu hakilintanŋo ti! Walla nin nte be jaatela wo ti, alu son a ma xo nte mu hakilintanŋo ti, walasa nte du xa sin xa ń fan bunɲa dondin. 17Nte be nala men fola, ń nte wo fola x'a ben Marigi sago ma, bari a be í xo moxo men mu hakilintanŋo ti muume, bawo ń be lanin a la xo fanbunɲakunŋo be nte bulu. 18Bari x'a la a xan moxo kiika be i fannu bunɲala hadamadinɲa kuwolu xanma, nte du be nala ń fan bunɲala. 19Ate mennu b'alu fannu jaatenin hakilitigolu ti, alu be sonna xa hakilintanŋolu la kuwolu muɲa. 20Alu be sonna xa don muɲa alu xa muta í xo jonŋolu, alu xa domo, alu xa bulutoxulunɲa, waso xa ke alu la, alu xa te alu ɲa xan. 21Nte be men fola, nte be maluyala wo la xo: N xa barakentanɲa le yita! Moxolu si son xa men fo, ń be xumala í xo moxo hakilintanŋo, nte du si son xa wo fo. 22I mu Heburo lelu ti ba? Nte du mu wo le ti. I mu Banisirayilango lelu ti ba? Nte du mu wo le ti. I mu Burehima bonsonŋo lelu ti ba? Nte du mu wo le ti. 23I mu Kirisita la baaradinŋo lelu ti ba? Nte be nala xumala a be í xo moxo men mu hakilintanŋo ti muume, nte mu wo ti xa tanbi wolu xan. Nte xa baaro ke xa tanbi wolu xan, nte bulata kaso la kiika ti xa tanbi wolu xan. Nte buwota bete xa tanbi wolu xan, xa sutiya saya la sinɲa kiika ti. 24Sinɲa luulu, Yahudiyalu xa busa daɲa tan saba nin xononto ta nte to. 25Romengolu xa nte buwo guma la í xo sinɲa saba. Sinɲa kilin, moxolu xa nte bun kurolu la x'e be ń faxala. Xulunŋo futita nte ti sinɲa saba xooxojiyo xan. Nte xa tili kilin nin su kilin ke xooxojiyo to. 26Nte la dugutotaxa kiika to, nte xa ba faninŋolu nin boyinxannilalu masiibo lon, xa ń badin Yahudiyalu anin siya tolu masiibo lon. Ń xa masiibo je gallubalu nin wulolu xono, xa masiibo je xooxojiyo xan, xa ke masiibo xono ń badin fanolu to. 27Nte xa baara xolenŋolu ke, xa sege muɲa. Ń sita ń ɲala sinɲa kiika ti. Ń xa xonxo nin mindoxo je. Ń xa diyakuwa sunŋo ke kiika ti. Ń toorota neno nin feeto bulu. 28Ń da nte sila a to ma, ń na lun wo lun dono be je, nin wo mu Ala la jamalu bee hanmo ti. 29Nin do barako xa doxo, nte du barako xa doxo wo fe; nin do x'é xodi lannaya la, wo si nte jani í xo ta. 30Nin nte xa xan xa ń fan bunɲa, ń si ń fan bunɲa ń na barakentanɲa le xanma. 31Tanto be Marigi Isa Fa Ala men ɲen fo abada, wo x'a lon xo nte nte faniya fola. 32Xa nte tu Damasi gallo xono, mansaxe Aretasi la goferenero xa garadolu bula xa gallo dundalu korosi, walasa xa nte muta. 33Bari dolu xa nte bula sinso xono xa ń nabo foloda fe, xa ń najigi gallo laminintato xofe. Nte xa ń fan soto a la wo ɲa in ne.

will be added

X\