2 KORENTENGOLU 10

1Nte Poli fan be a ŋininna alu fe, Kirisita la sabaro nin a la ɲumaya fe, nte men be majiginin bete nin n be alu bata, ɲada nin ɲada; bari nin ń dula xa jan, ń xa fati alu ɲa, 2nte be alu matarala xo: Alu xana nte diyakuwa xa fatiya nin ń taxata alu bata. Bawo mennu b'a fola xo ntelu be kuwolu kela x'a ben hadamadinŋo le ma, nte b'a fe xa fatiya le yita wolu la. 3Tonɲa le mu, n mu hadamadinŋo lelu ti, bari n nte kelo kela hadamadinŋo la ɲa ma. 4N be kelo kela kelekemiranŋo mennu la, wolu man bo hadamadinŋo la, bari wolu barako be bola Ala le la, mennu si kelekunben bunŋolu tiɲa. N be miiriyafuwolu tiɲala. 5Sintigiya fen wo fen b'a fan xototala, xa Ala lonniya kele, n be wolu bee tiɲala. N be miiriyalu bee mutala walasa i xa xulu Kirisita ɲen. 6N be tobennin xa xanbulalo bee ɲangi, nin alu la xanmutalo dafata tumo men. 7Alu fenŋolu jeɲa mafele. Nin moxo do be lanin a la xo a mu Kirisita ta ti, a tigo x'é miiri ɲin ma tugun xo: Ntelu dulu mu Kirisita talu ti í xo wo tigo. 8Bawo Marigi xa sinŋo men di n ma, haali nin nte xa ń wasu wo xanma dondin, nte nte maluyala wo la. Wo sinŋo dikunŋo mu le x'alu la kafo lataxa ɲa, a man di a tiɲa xanma. 9Nte nt'a fe x'a yita ń na safelu to xo nte be alu lasilala. 10Bawo dolu be men fola, wo fele xo: «Poli la safelu xumolu xa xole anin i xa fati; bari nin a fan be n bata, barake nte a la, a xumaɲa nte fusi ti.» 11Moxo men be xumala ten, wo xa xan ɲin lon xo: N mu men ti dulajanŋo n na safelu la, nin n keta alu bata tumo men, n be kela wo le du ti n na kewalolu la. 12Bawo ntelu me fatiya x'e suman, walla x'e xaaɲan moxo dolu ma, mennu be i fannu toxoɲuma fola, x'e fannu ke sumannilan ti, anin xaaɲanma fen ti. Hakilintanŋo lelu mu. 13Nte kennu nte nala i wasula xa danmatanbi. Ntelu si wo ke x'a ben Ala la baaro dandula ma n ɲen, men xa n nasi fo alu bata. 14Ntelu nte tanbila n dandula xan, a tun si ke wo ti nin n tunnu man na alu bata. Bawo nte lelu fololu nata alu bata xa Kirisita xibaru Dimanŋo di alu ma. 15Wo ɲa ma, n nte i wasula xa danmatanbi, xa moxo xotelu la baarakeninŋo ke n ta ti. Bari n yilo b'a ma xo do si kafu alu la lannaya ma, anin xo n si sin no xa baara ke alu bata, men nafa xa bun, bari x'a tara n man tanbi dula xan, dula men fota n ɲen. 16N si sin no wo xo, xa Xibaru Dimanŋo lasi mara xotelu la, mennu be siginin atelu jefen, x'a tara n man i wasu moxo xotelu la baarakeninŋolu xanma i la dula. 17Men b'a fan bunɲala, wo x'a fan bunɲa Marigi la kuwo xanma. 18A nte xo moxo men be a fan toxoɲuma fola xo wo le mu toxoɲumatigo ti, bari Marigi be men toxoɲuma fola, wo le mu toxoɲumatigo ti.

will be added

X\