2 KORENTENGOLU 1

1Nte Poli, men mu Isa Kirisita la kiladinŋo ti x'a la Ala sago xan, anin n badinxe Timote le be ɲin safe in kela, x'a ki Ala la jama ma Korente anin senumanŋolu bee ma, mennu be Akayi jamano bee xono. 2N Fa Ala anin n Marigi Isa Kirisita xa neemo nin heero di alu ma. 3Tanto be n Marigi Isa Kirisita Fa Ala ɲen, Fa hinnatigo anin hakililasigo bee tigi Ala. 4A be n hakilo lasigila n na toorokuwolu bee to, walasa mennu be tooroku sifa bee jela, n xa sin xa wolu hakilo lasigi, n fannu la hakililasigi sotoninŋo fe, ate Ala xa men di n ma. 5N be Kirisita la tooro ɲoxon kiika sotola ɲa men, wo ɲa kilinŋo ma, n be hakililasigiba du sotola Kirisita la. 6Nin n be tooro xono, a kunŋo mu le walasa alu xa hakililasigo nin kisilo soto. Nin n be hakililasigo xono, a kunŋo mu le walasa alu xa hakililasigo soto, men si a tu alu si sin no xa ntelu la tooro sotoninŋolu ɲoxonnu muɲa. 7Gigi xoyo le be n na alu la kuwo to, bawo n x'a lon xo n nin alu be xaaɲannin n na toorokuwolu to ɲa men, wo ɲa ma, n nin alu si xaaɲan n na hakililasigo du to ten. 8Ń badinŋolu, n xa tooro mennu soto xa n tu Asi maro xono, n nte a fe alu xa tu wolu lonbaliya to: Wo toorolu dono xuliyata n ma bete fo xa tanbi n barako danŋo xan. N fan tunnu yili nte a ma tugun xo n si tu balunin. 9A keta n fannu ɲen xo ń na saya lategeta. Wo ɲa ma, n gigo me la no n fannu xan, fo Ala doron xan, ate men be furelu lakunila. 10Ate le xa n bo wo ɲoxon saya bulu. Ate le du be n bola a bulu tugun. N xa n gigo ke ate le ti, a si n bo wo ɲoxon bulu tugun. 11Alu dulu si n deema alu la Alamataralu la ntelu ɲen, walasa Ala xa neemo men di n ma moxo kiika la Alamatara koso, wo x'a tu moxo kiika xa barako la Ala ɲen ntelu koso. 12N si sin xa n fannu bunɲa kuwo men to, wo mu ɲin ne ti xo: N jusukunŋo mu n seedo ti xo n bosilo keta ɲa men duniya to, sakuta a keta ɲa men atelu ma, wo keta majigo nin xoyiya to, mennu bota Ala la. N man wo ke hadamadinŋo la hakilitigiya barako la, bari Ala la neemo barako la. 13Alu be men xaranna x'a faamu, n nte fusi xote safela nin wo nte. Nte yilo b'a ma du xo alu si wo faamu bete, 14í xo alu b'a faamula dondin saasa, xo Marigi Isa nalunŋo, ntelu si ke alu fanbunɲa kunŋo ti, í xo alu si ke ntelu ta ti ɲa men. 15Wo gigo xono, nte tun b'a fe xa na alu bata folo, walasa alu xa neemo soto í xo sinɲa fula. 16Nte tun b'a fe xa bo alu bata la, wo xo xa tanbi xa taxa Maseduwane, anin x'alu je ń koppato. Wo to, alu tunnu si ń deema xa taxa Yude. 17Nte xa ɲin ku in natege tumo men, nte tun nte ń soobe la ba? Walla nte la ku bululaninŋolu mu hadamadinŋo fan na ku bululaninŋo lelu ti ba, fo «iyo» nin «ayi» si ke nte xono i ɲoxo la? 18Ala mu xantigo le ti, n xa xumo men fo alu ɲen, wo tun nte «iyo» anin «ayi» ti i ɲoxo la. 19Bawo Ala Dinxe Isa Kirisita, nte nin Silifen anin Timote xa men na kuwo waajulo ke alu bata, wo man ke «iyo» nin «ayi» ti, bari a keta «iyo» le ti. 20Bawo Ala la lahidolu bee keta «iyo» ti ate le fe. Ate Isa Kirisita le du barako to, nin n be «amiini» fola xa Ala tantu. 21Men be ntelu nin atelu barako bunɲala Isa Kirisita la kafuɲoxoya to, xa n bula í dan na a fan ɲen, wo mu Ala le ti. 22A x'a la taagumanseedo ke n na, xa Ni Senunŋo lasigi n jusukunŋo la folo, men b'a yitala n na xo n si Ala la fen ɲuma to dulu soto. 23Ala mu nte seedo ti, a xa ń faxa nin ń be faniya le fola: Alu la hinno le x'a tu nte man ń koppa Korente ma tugun. 24Wo xoto nte xo n mu alu kuntigolu ti lannaya kuwo to, bawo alu la lannaya sinsinninŋo le mu, bari n nin alu be baaro kela i ɲoxo fe, walasa alu xa ɲaxali.

will be added

X\