1 TIMOTE 6

1Lannayabaxo mennu mu jonŋolu ti, wolu xa xan x'e marigilu jaate, x'a lon xo i nin bunɲa bee xa xan; walasa moxo si xana toxojaxo la Ala nin n na xaranŋo la. 2Nin i marigilu mu lannayabaxo lelu ti, i xana i doxoya xo bawo i bee keta badin ti, bari i xa baaro ke i ɲen xa tanbi folo xan, bawo i be baaro kela mennu ɲen, wolu mu lannayabaxa xanuninŋo lelu ti. Í xa xan xa moxolu laxaran ɲin nelu la, x'a xoleya i ma. 3Nin moxo do x'alu xaran sila xote la, nin a x'é tosoobo Marigi Isa Kirisita la xuma senunŋolu la, anin xa xaran di, men nin n na Alasilo nte kilin ti, 4wo tigo mu fanbunɲala le ti. A man fen lon. Xa soosolo ke, anin xa kelo ke xumo dolu nofe, wolu falama le b'a tigo to. Wo kuwolu si na kiiliya nin kelo nin nanilolu nin miiri jaxolu, 5anin soosoli banbalo ti moxo hakilintanŋolu te, mennu man tonɲa lon tugun. Wolu hakilo la xo lannaya mu tonosotoda le ti. 6Tonɲa, xa la Ala la, wo mu tonoba le ti, nin moxo men si muta ke a bulufenŋolu ti. 7N nin fusi man na ɲin duniya in xono. N nin fusi du nte i saagila. 8Nin baluwo nin feetofato be n kun, n xa xan xa muta ke wo ti. 9Bari mennu b'a fe xa naafulu kiika soto, xotobolo si wolu laboyi. I nege jaxu kuntanŋolu si ke i ma kalanŋo ti, x'e muta, x'e bula halagilo nin tiɲalo la. 10Xaalisikunteya le mu ku jaxo sifa bee juwo ti. Moxo dolu keta xaalisi kunte ti, a xa wolu bula i xodila lannaya silo la, x'e jusukunŋolu bula tooro sifa bee xono. 11Bari ite men mu Ala la moxo ti, í fan tanga wo kuwolu ma. Tilinninɲa nin Alaɲasilanɲa nin lannaya nin xanuya nin muɲalo nin sabaro ŋinin. 12Í be kele beto men na, nin wo mu lannaya kelo ti, í jija wo kelo la, xa sinŋo soto, xa nilamaya banbalo muta, í kilita wo men xanma. Í xa seedeya ɲuma ke seede kiika ɲala wo kuwo la. 13Ala men be nilamaya dila fenŋo bee ma, anin Isa Kirisita men xa seedeya beto ke Ponsi Pilate ɲa xoto, ń b'a xoleyala í ma wolu ɲala xo, 14í xa Ala la folu mara, í jalagibalo nin í senumanŋo xa tu, fo n Marigi Isa Kirisita nalunŋo. 15A si na Ala la waxati lategeninŋo lunŋo. Ala kilin ne mu Mansaxe ti; heero tigo, mansaxelu la Mansaxe, marigolu Marigi. 16Ate kilinpe le nte sala; keneya men b'a to, moxo si man í sodun no a la. Moxo bada man a je. Moxo du me a je no. Bunɲa nin sintigiya banbalo mu ate le ta ti. Amiini. 17A xoleya ɲin duniya in naafulutigolu ma xo i xana i wasu. A fo i ɲen xo i xana i gigo ke ɲin naafulu banta innu ti, bari i xa i gigo ke Ala ti, wo men be fen bee dila n ma a kiika, walasa n x'e diyabo. 18A xoleya i ma, xo i xa ke ɲumakela ti, kebaara ɲuma kiika xa ke i la naafulo ti, xa nilo ke, x'e bulufenŋo dolu di moxolu ma. 19Nin i xa wo ke, i si naafuluba tara i ɲa sinin, naafulo men xa ɲin, men nte tiɲala, walasa i xa nilamaya soobe soto. 20Timote baaba, kuwo mennu xarifata í ma, wolu mara bete. Í fan tanga xuma fuwolu ma, mennu nin Alasilo nte boxo la, anin soosoli gansanŋolu ma. I be wo mafelenin lonŋo ti, x'a tara tonɲa nte. 21Moxo dolu x'a fo xo i xa wo lonŋo soto. I filita xa lannaya silo bula. Ala la neemo xa ke alu fe!

will be added

X\