1 TIMOTE 5

1Nin í be xexotoba la filo yitala a la, í xana a fo xoleya to, bari í s'a tonben í xo í fa. Xamarindinŋolu tonben í xo í badinxelu. 2Musuxotolu tonben í xo í nalu, xa musu dindinŋolu tonben í xo í mamusuwolu, senuya to. 3Í hakilo tu musujaxelu la, mennu kilinnu be i danna. 4Bari nin dinŋolu walla mamarinŋolu be musujaxe do kun, wo dinŋolu xa xan xa i la Alaɲasilanɲa yita i fannu la dinbayalu la folo. I wulubaxolu walla i mamalu xa men ke i ɲen folo, i si wo ɲoxon ke i ɲen. Wo le xa di Ala ɲen. 5Musujaxe men kilin tuta a danna, nin deemabaxa nte a bulu, wo gigo mu Ala le ti. A be Ala matarala su nin tili walasa a x'a deema. 6Bari musujaxe men hakilo nte fen xote ma fo duniyadiya kuwolu, wo saninŋo le mu, haali nin a b'é nila. 7Í xa xan xa wo le xoleya musujaxelu ma, walasa i xa ke jalagibalolu ti. 8Nin moxo men man a hakilo tu a badinŋolu la, sakuta a la lumamoxolu, wo tigi xa lannaya bula le. Haali lannayabalo xa fisa wo tigo ti. 9Muso men si jaate musujaxe ti, fo a siyo xa si tan wooro san ma. A xa tara kenin xe kilin musu ti, 10toxoɲuma xa ke a la a la kebaarolu xono. A xa tara a dinŋolu maranin bete, a xa tara luntannajigila ti, xa Ala la jama moxolu sinŋolu ku, xa segebaxantunŋolu deema, anin a xa tara ɲumaya sifa bee kebaxo ti. 11Bari í xana son xa musu dindinŋolu safe musujaxe ti; bawo nin i diyanɲo x'e bula sigila xela to tugun, i s'i xodi Kirisita la. 12Wo to, i si jalago soto, bawo i man i la lahidu folo latimme. 13X'a kafu wo ma, i nte baara kela, i si ke a ma x'e taxaninsaagi lu nin lu te. X'a kafu wo ma, i si ke dasiyante ti x'e da dun ŋandikuwolu to, xa xumolu fo, mennu man xan xa fo. 14Ń b'a fe musu dindinŋolu xa sigi xela, xa wulu. I fannu x'e la luwolu mara, walasa n jaxo xana maxumalikun soto n ma. 15Bawo musujaxe dolu x'e xodi Kirisita la xa ban, x'a lo Sentane nofe. 16Nin musujaxelu be lannayabaxamuso men bata, wo xa wolu deema, i xana den Ala la jama la, walasa Ala la jama xa sin xa musujaxe moxontanŋolu deema. 17Jama moxobalu mennu be baara beto kela jama ɲen, wolu xa xan xa sara í xo sinɲa fula, sakuta mennu be waajulo nin laxaranno kela. 18Kitaabo b'a fola xo: «Tuura men be ɲo toɲonxola x'a keso bo, í xana fen siti wo da ma.» A fota du xo: «Baaradinŋo nin a la sara xa xan.» 19Í xana xoxuma muta Ala la jama moxoba do ma, x'a tara seede fula walla saba man bo men ma. 20Mennu je junubo ke, i lalon i la junubo la bee ɲala, walasa tolu xa sila. 21Ń b'a fola í ɲen x'a xoleya í ma Ala nin Isa Kirisita ɲala, anin meleke senumanŋolu ɲala, xo í xa ɲin fo innu bee ke i ɲa ma. Í xana moxo fisiya moxo ti, í xana moxo bo moxo to. 22Í xana tariya xa í bulo la moxo xan, x'a bula Ala la jama la baaro do la. Í senuyaninŋo xa tu. 23Fata jiyo doron minna, bari í si tu dolo dondin minna í la xonodiminŋo anin í la doxon doxon jangarolu koso. 24Moxo dolu la junubo be keno le xan x'a tara haali kiito man tege i xan folo. Bari dolu be je, wolu ta be lonna xofe le. 25Wo ɲa ma, kewale ɲumalu si je keno xan ten ne. Haali nin mennu man lankenema junna, i duguninŋo me tu.

will be added

X\