1 TIMOTE 4

1Ni Senunŋo b'a fola x'a xoyiya xo: Duniya wulo waxato, moxo dolu si lannaya silo bula, x'a lo moxolafilila dolu la silo fe. Wolu b'e la xaranŋo sotola jinno lelu la. 2I s'a tu karanmoxo fanolu nin fulankafolu x'e lafili. Wo karanmoxolu jusukunŋo xa xole, í xo nege wulenŋo keta xa fenŋo men majani. 3Wo karanmoxolu be moxolu laxaranna xo futuwo man xan xa ke, anin xo domolifenŋo dolu man xan xa domo. Bari Ala xa wo domolifenŋolu da, walasa lannayabaxo mennu xa tonɲa lon, wolu xa barako bula Ala ɲen i la kuwo xanma, x'e domo. 4Ala xa fen wo fen da, a bee xa ɲin. Banŋo man xan xa ke fen si to. Moxo xa xan x'a bee lamuta, xa barako bula Ala ɲen i xanma. 5Bawo Ala la xumo nin Alamatara be fenŋo bee senuyala Ala ɲa xoto. 6Awa, nin í be badinŋolu laxaranna ɲin ku innu la ten, í si ke Isa Kirisita la baaradin beto ti. Í be balunin lannaya xumolu la, anin xaran soobe la, í laxaranta men ma. 7Í xana son taliyolu nin xuma kuntanŋolu ma, wo mennu nin lannaya nte sila la. Í fan digi Alaɲasilanɲa la. 8Xa fasakendeya kuwolu ke, xa í balo bo i ɲoxo to, wo nafa xa doxo. Bari x'é noto Ala la, wo nafa xa bun ɲa bee ma; bawo kenenma nilamaya anin sinin nilamaya lahido be wo to. 9Wo le mu xuma wulibalo ti, bee xa xan xa men muta. 10Wo le x'a tu, n be segela, xa kelo ke, bawo n xa n gigo senbe Ala nilama la, wo men mu moxolu bee Kisibaxo ti, sakuta mennu xa lannaya ke. 11Í xa xan xa men xoleya, xa moxolu laxaran a la, wo le fele. 12Moxo si xana í doxoya í la dindinɲa xanma; bari ke ɲayita beto ti lannayabaxolu ɲen, í la xumolu xono, í bosilolu to, í la xanuya fe, í la lannaya fe, anin i la senuya fe. 13Jannin ń xa na, í jija xa Ala la xumo xaran lannayabaxolu ɲen, x'e jusudun, x'e laxaran. 14Ala x'a la solifenŋo men di í ma, í xana faratu wo la. A dita í ma, x'a la kilaya xumolu xan, Ala la jama moxobalu x'e bulolu la í xan xa Ala matara í ɲen tumo men. 15Í jija xa wo kuwolu bee ke. Í la baaro ke a ɲa ma. Nin wo keta, bee s'a je xo í be taxala ɲa. 16Í taxamaɲa korosi, x'é la xaranŋo du korosi. Í timinadiya wo la. Nin í xa wo ke, í s'í fan kisi, xa í lamebaxo dulu kisi.

will be added

X\