1 TIMOTE 3

1Xumo fele, sikka nte men to: Nin men b'a fe xa ke Ala la jama lakorosibaxo ti, a be baara beto le nofe wo ti. 2Ala la jama lakorosibaxo xa xan xa ke jalagibalo ti, musukilintigo, moxo men xa dan lon ku la, hakilima, moxo soobe, luntannajigila, men si sin no xa moxolu laxaran. 3A xana ke dolominna jaxu ti, walla moxo men xa fati. A xa ke moxo sabarininŋo ti. A xana ke kelekela ti. A xana ke xaalisi kunte ti. 4A xa sin x'a fan na luwo mara bete, a dinŋolu xa xulu a ɲen x'a bunɲa. 5Moxo men me a fan na luwo mara no, wo si Ala la jama mara no ɲa di? 6A xana ke moxo tuubidin kuta ti; nin wo nte a xana taxa a fan bunɲa, xa jalagi í xo Sentane jalagita ɲa men. 7A xa ke moxo ti, xoxanmoxolu be men toxoɲuma fola; walasa moxolu xana tango b'a xan, anin a xana bula Sentane la kalanŋo da. 8Awa, Ala la jama la baaralalu xa xan xa ke moxo soobelu ti, anin xankilintigolu. I xana ke dolominna jaxu ti, anin xaalisi nanbarala. 9Ala xa lannaya gullo men di i ma, i xa xan xa wo mara i hakilo senuyaninŋo la. 10I xa xan xa mafele folo, wo xo nin jalagi man soto i ma, i si Ala la jama deemabaaro ke. 11I musu dulu xa xan xa ke moxo soobelu ti. I xana ke moxo toxojaxufola ti. I xa ke danlonkulamoxolu ti, xa ke lannayamoxo ti kuwo bee to. 12Ala la jama la baarala xa xan xa ke musukilintigo ti. A xa sin x'a fan dinŋolu nin a la luwo mara bete. 13Nin Ala la jama la baaralalu b'e la baaro kela a ɲa ma, bee s'i bunɲa. Anin, lannaya men be n nin Isa Kirisita kafunin, i si xuma no wo xan x'a tara i man yilanyilan. 14Ń be ɲin safe in kila í ma, xa ń yilo tu a ma, xo dondin ń si taxa bo í la. 15Bari nin ń meta ń man taxa, ɲin safe in s'a yita í la, í bosilo xa xan xa ke men ti Ala la luwo xono, nin wo mu Ala nilama la jama ti. Wo jama mu tonɲa losinŋo nin a sinsinbaxo le ti. 16Soosoli si nte a to, Alaɲasilanɲa mu gulleba le ti! Ala moxoma x'é yita, Ni Senunŋo x'a la tilinninɲa yita. Melekiyolu x'a je. A la kuwo waajuta siyalu ɲen. Lannaya keta a la duniya xono. Ala x'a layele xa taxa a ti nooro xono.

will be added

X\