1 TIMOTE 2

1A folo, ń b'a xoleyala moxolu ma, xo i xa taralo sifa bee do ke, xa Ala matara i ɲoxo ɲen, xa barako bula Ala ɲen moxolu bee koso. 2Ala xa matara mansaxelu nin kuntigolu ɲen walasa n xa tu laxafiya nin heero xono, xa i taxama Alaɲasilanɲa xono, men be bennin. 3Wo le xa bete, wo le xa di n Kisibaxa Ala ɲen. 4Ate b'a fe moxolu bee xa kisi, anin i xa sin xa tonɲa lon. 5Bawo Ala kilin ne be je. Telabenbaxa kilin ne du be Ala nin moxolu te, nin wo mu Isa Kirisita ti, men keta moxo ti. 6Ate x'a fan di xa ke moxolu bee kunbobaxo ti. Waxato sininma, a xa wo ke; walasa x'a yita xo Ala b'a fe moxolu bee xa kisi. 7Wo le x'a tu, Ala xa ń ke waajulila nin kiladinŋo ti. Ń nte faniya fola, ń be tonɲa le fola alu ɲen. A xa ń bula siya tolu xaranna lannaya nin tonɲa silo ma. 8Nte b'a fe xo, dula wo dula, xebalu xa Ala matara, x'e bulo xotota sanna, jusukun xoyiya to, x'a tara jusu xan nte, soosoli xan nte. 9Ń b'a fe du, musolu x'e masiti ɲa beto ma. I xa faanu dun, men s'i sutura. I la masito xana ke danmatanbi masiti ti. I xa danmatanbi kunda dabula. I xana i balamaɲaro ke sanu nin xonon daxolen ti. I la masito xana ke faanu daxolen ti. 10Bari a xa ke kebaara ɲumalu ti. Muso mennu xo x'e be Ala bunɲala, wolu xa xan xa wo le ke. 11Nin xaranŋo be kela, musolu xa xan xa i de, x'a lame xa xulu. 12Ń man don yanmaru muso xa ke karanmoxo ti, walla xa ke xe kuntigo ti. A xa xan ne muso xa í de. 13Bawo Adama folo le data; wo xo, Hawa. 14Anin du, Adama man neene; muso le neeneta, xa Ala foxanŋo bula. 15Bari haali wo, muso si kisi wuluwo sabaabo la, nin a tuta lannaya nin xanuya nin senuya to, xa tu fanmajigo xono.

will be added

X\