1 TESALONIKENGOLU 5

1N badinŋolu, fenŋo men mu Marigi la na tumo nin a waxato ti, alu maaku nte a la moxo xa safe ki alu ma wo la. 2Bawo alu fannu x'a lon xo Marigi la lunŋo si na í xo sunŋo be nala ɲa men suwo to. 3Moxolu je a fo tumo men xo: «Heera be je, tooro nte!», wo to doron, kasaaro si na x'e ju xa boyi i xan, í xo tinŋo be musu xonoma jula ɲa men. I me kisi wo ma abada. 4Bari atelu n badinŋolu, alu nte dibo to, fo wo lunŋo si alu ju í xo sunŋo be moxo jula ɲa men. 5Alu bee mu keneya ta lelu ti, anin tiliya talu. Alan nte suwo nin dibo talu ti. 6Wo to, alan xana sinnoxo í xo tolu, bari alan xa tu i ɲala, xa n fannu muta. 7Mennu be sinnoxola, i be sinnoxola suwo le to; men dulu b'e fala dolo la, i b'e fala wo la suwo le to. 8Bari ntelu mu tilo ta lelu ti; wo to, alan xa n fannu muta. Alan xa lannaya nin ɲoxoxano ke xa n fannu lakanta, í xo sorodaso b'a fan nakantala a la negedoroko la ɲa men. Alan gigo xa ke a ma xo Ala si n kisi, wo si ke í xo nin n xa negekufuno dun í kunna. 9Ala man n sugandi walasa a x'a la diminŋo laboyi n xan; a xa n sugandi le, nin a si kisilo di n ma, n Marigi Isa Kirisita barako to. 10Ate sata n ɲen, walasa n tuta i nila wo, n sata wo, n nin a xa nilamaya i ɲoxo fe. 11Wo xanma, alu i ɲoxo tonben, xa do kafu i ɲoxo barako ma, í xo alu je a ma x'a ke ɲa men. 12N badinŋolu, n be alu tarala xo Marigi xa mennu bula baaro la alu to, alu xa wolu bunɲa. A xa wolu bula alu kunna, walasa i xa alu laxaran a la silo la. 13Alu i jaate bete, x'e xanu i la baaro xanma. Benŋo xa ke alu nin i ɲoxo te. 14N badinŋolu, n be alu tarala du, xo alu xa salabaxantunŋolu tonben, xa do kafu jusudoxonŋolu juso ma, xa barakentanŋolu deema. Alu muɲa bee xoto. 15Alu i korosi, moxo si xana jaxumanŋo sara jaxumanŋo la, bari alu a ŋinin xa betemanŋo ke i ɲoxo ɲen tuma bee, anin moxolu bee ɲen. 16Alu ɲaxali tuma bee. 17Alu xana Alamatara dabula. 18Alu barako bula Ala ɲen kuwo bee to, bawo Ala sago mu wo le ti alu ɲen, atelu mennu nin Isa Kirisita kafuta. 19Alu xana Ni Senunŋo dube. 20Alu xana kilalu la xumolu mafele fuwo ti. 21Alu wo xumolu bee segesege, xa betemanŋo mara. 22Alu xa ku jaxo sifa bee je x'a tu je. 23Heeratigi Ala fan xa ke alu muume bee senuyabaxo ti, x'alu ke a ta ti. Alu muume, nin wo mu alu niyo nin alu jusukunŋo nin alu balo ti, wo jalagibalo xa tu fo Marigi Isa Kirisita nalunŋo. 24Alu kilibaxo mu xantigo le ti, ate le fan be wo kela. 25N badinŋolu, alu Ala matara n ɲen. 26Alu badinŋolu bee baataya xonton. 27Ń b'a xoleyala alu ma Marigi toxo la, xo ɲin safe in xa xaran badinŋolu bee ɲen. 28N Marigi Isa Kirisita la neemo xa ke alu fe.

will be added

X\