1 TESALONIKENGOLU 4

1Nin wo bota je, n badinŋolu, n tunnu x'a yita alu la, alu xa xan x'e taxama ɲa men, walasa alu ku xa diya Ala ɲen. N x'a lon xo alu be í taxamala wo ɲa ma xa ban. Bari n be alu tarala Marigi Isa toxo la, xo alu xa i balan xa do kafu wo ma. 2N xa xaranŋo mennu di alu ma Marigi Isa la xan to, alu xa wolu lon. 3Ala sago mu le, alu xa i senuya, x'alu fannu tanga fuyanɲa ma. 4Alu bee xa i musu ta senuya to, anin ɲa beto ma. 5Alu xana alu fannu bula alu niyo diyanɲo bulu í xo Alalonbalolu. 6Moxo si xana dun a badinŋo gaso to wo kuwo to, x'a tooɲo. N x'a fo alu ɲen, x'alu lasobi a la xa ban xo mennu be wo kuwolu kela, Marigi si wolu ɲangi. 7Bawo Ala man n kili noxoninɲa xanma; a xa n kili senuya le xanma. 8Wo to, men je í ban ɲin xaran in to, wo man í ban moxo to, bari a xa í ban Ala le to, wo men x'a Ni Senunŋo di alu ma. 9Men mu ɲoxoxano ti, alu maaku nte a la tugun xa do fo alu ɲen wo xan. Ala fan be alu laxaranna wo la. 10Alu be Maseduwane lannayabaxolu bee xanunin. Bari n b'a ŋininna alu fe, alu xa do kafu wo ma tugun. 11Alu i balan benŋo xa tu alu nin moxolu te, alu x'alu fannu kunkuwolu ɲabo, alu fannu xa baaro ke í xo n dalita xa wo xoleya alu ma ɲa men. 12Nin alu xa wo ke, moxo tolu si alu bunɲa. Wo to, alu me den moxo si la. 13N badinŋolu, mennu banta, n nte a fe alu xa tu lonbaliya xono wolu la kuwo to, walasa alu juso xana xasi í xo tolu, gigi nte mennu la. 14Nin n lata a la xo Isa sata xa kuni, n xa la a la du xo Isa la moxo mennu sata, Ala si wolu lakuni Isa barako la. 15Saasa, n be nala men fola alu ɲen Marigi la fo to, wo fele: Alan mennu nilama je tara Marigi nalunŋo, n nte bulala moxo saninŋolu ɲa. 16Bawo yanmaruya dita doron, meleke kuntigo do si xuma, Ala la buutuwo si fo, Marigi fan si jigi xa bo sanŋo to. Wo to, moxo mennu sata x'e tu Kirisita la silo xan, wolu si kuni folo. 17Wo xo, ntelu mennu je tara í nila, n nin i bee si ta i ɲoxo la xabolu xan, xa taxa Marigi kunben foɲo fe. Wo xo, n nin Marigi si tu i ɲoxo fe fo abada. 18Alu i ɲoxo hakilo lasigi wo xumolu la.

will be added

X\