1 TESALONIKENGOLU 3

1N man alu xibarusotobaliya muɲa tumo men, n x'a latege n kilinnu xa tu Atene, 2xa n badinxe Timote ki alu ma. N nin ate be Ala la baaro kela, nin wo mu Kirisita xibaru Dimanŋo fo ti. N x'a ki alu ma, walasa a x'alu la lannaya sinsin, xa do kafu alu juso ma; 3walasa alu si xana silo bula bi toorolu xanma. Alu fannu x'a lon xo n xa xan xa tooro. 4Xa n nin alu tu i ɲoxo xan, n x'alu lasobi xo n si tooro soto. Alu x'a lon xo wo le naninŋo je. 5Ń korita alu xibarusotobaliya muɲala tumo men, ń xa Timote ki alu ma, a xa taxa a mafele alu la lannaya be jan men. Ń tun be silanin Sentane xana tara alu neenenin x'alu lafili, xa n na baaro ke fuwo ti. 6Bari Timote birin nala n ma saasa, xa bo alu bata. A xa xibaruya dimanŋo di n ma alu la lannaya nin alu la xanuya xan. A xo du xo alu hakilo be n na tuma bee, anin xo a xa di alu ɲen xa n je, í xo n dulu b'a fe x'alu je ɲa men. 7Wo ɲa ma, n badinŋolu, xa n tu sege nin tooro bee xono, alu la lannaya le xa n hakilo lasigi. 8Saasa n niyo saagita, bawo alu sinsinninŋo be Marigi xan. 9Alu la kuwo be n ɲaɲanin Ala ɲa xoto ɲa men, fo n man a lon n si men fo xa barako bula a ɲen. 10Su nin tili, n b'a matarala ɲa bee ma nin n nin alu s'i ɲoxo je tugun, walasa men be alu la lannaya ɲen xo, n xa wo kafu a ma. 11N Fa Ala fan anin n Marigi Isa xa n na silo xoyiya fo alu bata. 12Marigi x'a tu alu x'e ɲoxo xanu bete, xa moxo bee xanu bete, í xo ntelu be alu xanunin ɲa men. 13Wo ɲa ma, a si barako di alu ma walasa alu xa senuya, xa ke jalagibalo ti n Fa Ala ɲa xoto, n Marigi Isa nin a la senumanŋolu bee nalunŋo.

will be added

X\