1 TESALONIKENGOLU 2

1N badinŋolu, alu fannu x'a lon xo n na taxo man ke fu ti alu bata. 2Alu x'a lon du xo n toorota xa n nani Filipe gallo to; bari wo xo, Ala xa barako di n ma n x'a la xibaru Dimanŋo fo alu ɲen, haali x'a tara moxolu tunnu b'a fe xa n bali xa wo ke. 3N na waajulo nte siginin faniya nin noxo xan, n nte a ŋininna du xa moxo lafili. 4Bari n be xumala tuma bee í xo Ala b'a fe ɲa men; ate men lata n na x'a la Xibaru Dimanŋo xarifa n ma. N nte a ŋininna xa n kudiya moxolu ɲen; bari Ala ɲen, wo men be n jusukunŋolu mafelela. 5Alu x'a lon xo n man datodiyaxuma si fo n na xumolu xono, abada n man xuma nata la. Ala mu n seedo ti wo la. 6N man a ŋinin moxo xa n tantu, atelu wo, moxo tolu wo. N tunnu s'a no xa n na fango sigi alu xan, bawo n mu Kirisita la kiladinŋolu ti. 7Bari n xonotodiyata alu xoto í xo dinbatigo b'a dinŋolu topotola ɲa men. 8N keta alu fe ɲa men, fo n tunnu be tobennin xa Ala la Xibaru Dimanŋo di alu ma. Wo doron nte, bari haali n niyo, n tunnu si bo a la alu ɲen, bawo alu la kuwo diyata n ɲen jaxu. 9N badinŋolu, alu hakilo b'a la n xa baaro ke ɲa men anin n segeta ɲa men ma. Xa n tu Ala la Xibaru Dimanŋo waajula alu ɲen, n xa baaro ke suwo nin tilo, walasa n xana den alu do la. 10Xa n tu alu bata, n xa bosila xoyiman tilinninŋo anin jalagibalo men ta alu lannayabaxolu ma, alu nin Ala si n seedeya wo la. 11Alu x'a lon du, xo n keta alu kilin wo kilin ɲen í xo fa be a dinŋo ɲen ɲa men. 12N x'alu jusudun x'alu tonben, x'alu x'e balan x'e taxama í xo Ala la yerewuluwolu; ate men be alu kilila, xa dun a la Mansaya nooroma xono. 13N be barako bulala Ala ɲen tuma bee, bawo, n xa Ala la xumo lasi alu ma tumo men, alu man a mafele moxo xuma ti; bari alu x'a lame x'a muta Ala la xumo ti. Tonɲa, Ala la xumo le mu. Wo xumo be baaro kela atelu lannayabaxolu xono. 14N badinŋolu, Ala la jama men be lanin Isa Kirisita la Yude maro la, alu keta wolu ɲoxonŋolu ti. Bawo Yahudiyalu xa wolu tooro ɲa men, alu dulu badinŋolu x'alu tooro ten. 15Wo Yahudiya lelu xa Marigi Isa faxa, xa kilalu faxa, xa ntelu dulu tooro. I ku man di Ala ɲen. I mu moxolu bee jaxo lelu ti. 16I b'a ŋininna xa n bali xa kisilo xumo fo siya tolu ɲen. Wo ɲa ma, i b'a ma xa do kafu i la junubolu ma tuma bee, fo xa si a danŋo ma. Bari Ala la diminŋo labanta boyila i xan. 17N badinŋolu, ntelu kennu nin alu fatata waxatindin xono, ɲada nin ɲada la, bari jusukunŋo la nte. Alu jo loxoba tun be n na, fo n xa kuwo bee ke walasa n x'alu je. 18A tun diyata n ɲen x'e koppa alu bata. Nte Poli fan x'a mafele xa na alu je, sinɲa kilin nte, bari Sentane xa n bali. 19Jon mu ntelu gigo nin n na nitodiya nin n na kunxotota sabaabo ti Marigi Isa ɲa xoto nin a nata? Atelu nte ba? 20Iyo, ate lelu mu n na bunɲa nin n na ɲaɲo sabaabo ti.

will be added

X\