1 PIYERE 5

1Mennu mu Ala la jama moxobalu ti alu to, nte be xumala wo lelu ɲen saasa. Nte du mu moxoba do le ti anin Kirisita la toorolu seedo. Nooro men be nala yitala, nte nidula be wo to. Nte be men ŋininna i fe, wo fele: 2Ala xa saaxagoore men xarifa alu ma, alu wo lakorosi. Alu xana wo ke a be í xo diyakuwa baaro, bari alu wo ke alu diyanɲeku ti, x'a ben Ala sago ma. Alu xana a ke xaalisisotoda ti, bari alu a ke ŋanne beto la. 3Mennu xarifata alu ma, alu xana alu la fango digi wolu xan, bari alu ke ɲayito ti saaxagoore ɲen. 4Wo to, nin negaanilalu la kuntigo x'é yita, alu si kunnawulijala nooroma soto, men dawulo me bo a la muume. 5Wo ɲa ma, xamarindinŋolu, alu xulu moxobalu ɲen. Alu bee x'e majigi i ɲoxo ɲen, x'e ɲoxo maakuwo ɲiɲa, bawo Kitaabo b'a fola xo: «Ala be bunfanmamoxolu kelela, bari a be a la neemo dila fanmajigibaxolu ma.» 6Wo le x'a tu, alu i fan majigi Ala bulu barakema xoto, walasa a xa lunŋo men natege, a x'alu xotota wo lunŋo. 7Al'alu hanmenakuwolu bee la ate xan, bawo a hakilo be alu kun. 8Alu hakili soto, x'alu fannu korosi! Alu jaxu Sentane, men be í xo waraba xunboto, be taxaninsaago la, a b'a ŋininna xa do domo. 9Alu a kele, xa tu sinsinnin lannaya to. Alu a lon xo wo ɲoxon toorolu be alu badinŋo dulu sotola duniya xono. 10Nin alu toorota waxatindin na, neemo bee tigi Ala men x'alu kili a la nooro banbalo ma, alu nin Kirisita la kafuɲoxoya xono, wo fan si alu dafa, x'alu sinsin, x'alu barako bunɲa, x'alu sigi jusigilan jonjonŋolu xan. 11Sintigiya xa tu a ɲen fo abada. Amiini! 12Nte xa Silifen bula a xa ɲin xuma kese danta innu safe alu ɲen, ń be ate men jaatenin badinxe xantigo ti, walasa x'alu jusudun anin x'a laxoyiya alu ma xo alu be notonin Ala la neemo fan fan ne la. 13Ala la jama men be Babilone, Ala xa mennu sugandi í xo a x'alu sugandi ɲa men, wolu be alu xontonna, anin Maraka men mu nte dinxe ti lannaya silo la. 14Alu i ɲoxo xonton baatayalixontonno la, xanuya to. Ate mennu be Kirisita la kafuɲoxoya la, heero xa ke alu bee fe!

will be added

X\