1 YAYA 4

1Xanuninŋolu, mennu bee b'a fola xo Ala Niyo be i fe, alu xana la wolu bee la. Alu wolu segesege folo, x'e mafele nin a x'a tara i niyo bota Ala le to. Awa, kila fano kiika nata duniya to. 2Alu si Ala Niyo lon ɲa men, wo fele: Ni wo ni b'a fola xo Isa Kirisita xa balasubo ta xa na, wo niyo bota Ala le to. 3Bari ni wo ni man a fo xo Isa Kirisita xa balasubo ta xa na, wo niyo nte bola Ala to. Wo niyo mu Kirisita Jaxo niyo le ti. Alu x'a me xo wo be nala, a be duniya to saasa xa ban. 4Ń na dindinŋolu, atelu kennu mu Ala ta lelu ti. Alu xa sinŋo soto kila fanolu xan, bawo niyo men be alu to, wo barako xa bun xa tanbi duniya moxolu ta xan. 5Wolu mu duniya ta lelu ti, wo le x'a tu, i be xumala x'a ben duniya keɲa ma, duniya be i lamela. 6Bari ntelu mu Ala ta lelu ti. Moxo wo moxo xa Ala lon, wo si n name, bari moxo wo moxo nte Ala ta ti, wo me n name. N si tonɲa Niyo nin faniya niyo bo i ɲoxo to ten ne. 7Xanuninŋolu, alan x'e ɲoxo xanu, bawo xanuya be bola Ala le to. Xanuya be moxo wo moxo la, wo tigo mu Ala dinŋo ti, a xa Ala lon. 8Xanuya nte moxo men na, wo tigo man Ala lon, bawo Ala mu xanuya le ti. 9Ala x'a la xanuya yita n na ɲa men, wo fele: A x'a Dinxe kilinpe ki xa na duniya to, walasa n xa nilamaya soto ate barako to. 10Xanuya mu ɲin ne ti: A nte don ti xo ntelu xa Ala xanu, bari Ala le xa ntelu xanu, a x'a Dinxe ki x'a ke n na junubeyaafo sadaxo ti. 11Xanuninŋolu, nin Ala xa n xanu ten, n dulu xa xan x'e ɲoxo xanu. 12Moxo si bada man Ala je, bari nin n be i ɲoxo xanula, Ala be n to. A la xanuya dafaninŋo si je n na. 13N s'a lon ɲa men xo n be tunin Ala to anin x'a be tunin n to, wo fele: A x'a Niyo di n ma. 14N x'a je anin n b'a seedeyala xo n Fa Ala x'a Dinxe le ki xa na ke duniya Kisibaxo ti. 15Nin men xo, xo Isa mu Ala Dinxe ti, Ala be wo tigo to, wo tigo du be Ala to. 16Ala be ntelu xanula ɲa men, ntelu xa wo lon, anin n lata a la. Ala mu xanuya le ti. Moxo men be tunin xanuya to, wo tigo be Ala to, Ala be wo tigo to. 17Nin xanuya dafaninŋo be n na, wo to, kiito tegelunŋo n hakilo si sigi, bawo n na nilamaya ɲin duniya in xono, wo keta í xo Isa ta. 18Silanɲa nte xanuya xono. Xanuya dafaninŋo be silanɲa kabala le. Wo ɲa ma, moxo men be silala, wo la xanuya man dafa, bawo silanɲa be a yitala xo ɲangilo be je. 19Ntelu kennu be Ala xanula, bawo a folo xa ntelu xanu. 20Nin moxo men xo xo ate be Ala xanula, x'a tara a be a badinŋo jaxuyala, wo tigo mu fano le ti. A ɲa be a badinŋo men na, nin a nte wo xanula, a ɲa nte Ala men na, a si wo xanu ɲa di? 21Isa Kirisita xa sariya men di n ma, wo fele: Moxo men be Ala xanula, wo xa xan x'a badinŋo du xanu.

will be added

X\