1 YAYA 3

1Ń badinŋolu, alu a mafele, Fa Ala xa n xanu ɲa men. A la xanuya koso, n be kilila xo Ala dinŋolu. Tonɲa la, n mu wo lelu ti. Wo le x'a tu, duniya moxolu man n lon, bawo wolu man Ala lon. 2Xanuninŋolu, kabirin saasa, n mu Ala dinŋolu ti. Bari n be kela men ti, wo man yita folo. N x'a lon xo nin a nata, n si ke í xo a fan be ɲa men, bawo a be ɲa men, n be a jela wo ɲa in ne. 3Wo gigo be moxo wo moxo la, wo tigo si í senuya í xo Isa Kirisita xa senu ɲa men. 4Moxo wo moxo be junubo kela, wo tigo be Ala la sariya tiɲala, bawo junubo mu sariya tiɲalo le ti. 5Alu x'a lon xo Isa Kirisita nata xa moxolu la junubolu bo je. Alu x'a lon xo junube nte ate la. 6Wo to, moxo wo moxo be tunin ate la kafuɲoxoya xono, wo si junubeko dabula. Moxo wo moxo be tula xa junubo ke taxanin, wo tigo man a je, wo tigo man a lon. 7Ń na dindinŋolu, alu xana a tu moxo si x'alu lafili! Moxo wo moxo be tilinninɲa silo taxamala, wo tigo be tilinnin í xo Isa Kirisita be tilinnin ɲa men. 8Moxo wo moxo be tula xa junubo ke taxanin, wo tigo mu Sentane la moxo le ti. Sentane xa junubo ke kabirin folofolo. Ala Dinxe nakunŋo mu le xa Sentane la kebaarolu tiɲa. 9Moxo wo moxo keta Ala dinŋo ti, wo tigo si junubeko dabula, bawo Ala la siyo be a to, a me tu no junubo kela, bawo Ala x'a bange. 10Ala dinŋolu anin Sentane dinŋolu be bola i ɲoxo to ten ne: Moxo wo moxo nte tilinninɲa silo taxamala, walla moxo wo moxo nte a badinŋo xanula, wo tigo nte Ala din ti. 11Alu xa xumo men me kabirin folofolo, wo le fele xo: Alan x'e ɲoxo xanu. 12N xana ke í xo Kabila. Ate tun mu Sentane la moxo le ti. A x'a doxoxe faxa. Mun na a x'a faxa? Bawo ate Kabila fan na kebaarolu tunnu xa jaxu, x'a tara a doxoxe la kebaarolu tunnu be tilinnin. 13Ń badinŋolu, nin duniya moxolu be alu jaxuyala, wo xana alu dabaro ban. 14Nin n be n badinŋolu xanula, wo le b'a yitala xo n bota saya to xa dun nilamaya banbalo to. Moxo men nte a badinŋo xanula, wo tigo be tunin saya to. 15Moxo wo moxo be a badinŋo jaxuyala, wo mu moxofaxala le ti. Alu x'a lon xo nilamaya banbalo nte moxofaxala si ɲen. 16N xa xanuya lon men ma, wo fele: Isa x'a niyo di ntelu xanma, ntelu dulu xa xan xa n niyo di n badinŋolu xanma. 17Nin ɲin duniya in naafulo be do kun, a x'a badinŋo do je a maakuwo be fen do la, nin a man son xa hinna a la, Ala la xanuya be wo tigo la ɲa di? 18Ń na dindinŋolu, n na xanuya man xan xa ke da nin nenkunŋo la ti. Bari a xa xan xa ke xanuya soobe le ti, men si lon n na kewalolu fe. 19Wo ɲa in ne ma, n b'a lonna xo n be i taxamala silo men xan, xo wo mu tonɲa silo le ti. N hakilo sigininŋo si tu Ala ɲa xoto wo ɲa in ne ma. 20Nin n jusukunŋo be n jalagila, Ala xa bun n jusukunŋo ti; ate xa fen bee lon. 21Xanuninŋolu, nin alan jusukunŋo nte n jalagila, n hakilo si sigi Ala ɲa xoto. 22N je fen wo fen ŋinin a la, a si wo di n ma, bawo n b'a la sariyalu labatula, x'a sago ke. 23A la sariya fele: Xo n xa la a Dinxe Isa Kirisita toxo la, anin xo n x'e ɲoxo xanu í xo Kirisita x'a fo n ɲen ɲa men. 24Moxo men be Ala la sariyalu labatula, wo tigo be Ala to, Ala du be wo tigo to. N b'a lonna ɲa men xo Ala be n to, wo fele: A xa Ni Senunŋo di n ma.

will be added

X\