1 YAYA 2

1Ń na dindinŋolu, ń be ɲin safe in kila alu ma walasa alu xana junube ke. Bari nin do xa junubo ke, deemabaxo do be n kun Fa Ala bata: Wo mu Isa Kirisita le ti, ate men be tilinnin. 2Bawo ate fan keta n na junubeyaafo sadaxo ti. Ntelu talu kilinnu nte, bari a keta a ti duniya bee ɲen. 3Nin n be Ala la sariyalu labatula, n b'a lonna wo le to xo n xa Ala lon. 4Nin do xo: «Ń x'a lon» x'a tara a nte a la sariyalu labatula, wo mu fano le ti, a nte tonɲa silo xan. 5Bari moxo men be a la xumaxanŋo labatula, Ala la xanuya dafaninŋo be wo tigo jusukunŋo la soobeya la. Wo le to, n b'a lonna xo n nin Ala be kafunin. 6Moxo men je a fo xo ate nin a be kafunin, wo tigo xa xan xa í taxama í xo Isa xa í taxama ɲa men. 7Ń xanuntelu, nte be safe men kila alu ma, wo nte sariya kuta ti, bari sariya xoto le mu, alu xa men soto kabirin folofolo. Alu xa xumo men me, wo le mu wo sariya xoto ti. 8Wo bee nin a ta, ń be sariya kuto le kila alu ma. Wo mu tonɲa le ti, Kirisita nin atelu dulu bulu; bawo dibo be tanbila le, keneya soobe be manala xa ban. 9Moxo men je a fo xo ate be í taxamala keneya la, x'a tara a be a badinŋo jaxuyala, wo be dibo to haalibi. 10Moxo men be a badinŋo xanula, wo tigo be tunin keneya la. Fusi nte wo tigo la men si ke sabaabu ti xa moxo xote bula filo xono. 11Bari moxo men be a badinŋo jaxuyala, wo tigo be dibo to, a be í taxamala dibo to, a man a lon a be taxala dula men, bawo dibo x'a fiyonɲa. 12Ń na dindinŋolu, nte be ɲin safe in kila alu ma, bawo alu la junubolu yaafata Isa le toxo barako to. 13Ń falu, nte be ɲin safe in kila alu ma, bawo men be je kabirin folofolo, alu xa wo lon. Xamarindinŋolu, nte be ɲin safe in kila alu ma, bawo alu xa sinŋo soto Sentane xan. 14Ń na dindinŋolu, nte be ɲin safe in kila alu ma, bawo alu xa n Fa Ala lon. Ń falu, nte be ɲin safe in kila alu ma, bawo men be je kabirin folofolo, alu xa wo lon. Xamarindinŋolu, nte be ɲin safe in kila alu ma, bawo barako be alu la, Ala la xumo be tunin alu xono, anin alu xa sinŋo soto Sentane xan. 15Alu xana duniya xanu, alu xana duniya xono fenŋolu xanu. Nin moxo men be duniya xanula, wo tigo nte n Fa Ala xanula. 16Fenŋo mennu bee be duniya xono: Hadamadinŋo nidiyanɲefenŋolu, ɲabonfekuwolu anin duniya fanbunɲa kuwolu, wolu nte bola Fa Ala to, bari i be bola duniya le to. 17Duniya be tanbila le, moxolu ɲa be bola fen wo fen fe, wo du bee be tanbila le, bari moxo wo moxo be Ala sago kela, wo tigo si nilamaya fo abada. 18Ń na dindinŋolu, duniya bantumo sita. A fota alu ɲen xo Kirisita Jaxo be nala, bari Kirisita jaxolu kiika nata xa ban. Wo le to, n b'a lonna xo duniya bantumo sita. 19Wo moxolu tunnu nte n do ti, wo le x'a tu i x'e fata n ma, bawo nin i tunnu mu n do ti, i tunnu si tu n to. Bari i x'e fata n ma walasa a xa xoyiya xo i si nte n do ti. 20Atelu kennu xa Ni Senunŋo soto, Ala senumanŋo xa men di alu ma. Alu bee xa lonŋo du soto. 21Nin nte xa ɲin safe in ki alu ma, a nte xo alu man tonɲa lon de! Alu xa tonɲa lon, wo le x'a tu, nte b'a kila alu ma, alu x'a lon du xo faniya si me bo no tonɲa to. 22Awa, jon mu fano ti? Men xo xo Isa nte Kirisita ti, wo le nte ba? Men x'é ban Fa Ala nin a Dinxe to, wo le mu Kirisita Jaxo ti. 23Moxo men x'é ban Ala Dinxe to, wo tigi man n Fa Ala soto. Bari moxo men je son a Dinxe to, wo xa n Fa Ala du soto. 24Atelu kennu xa xumo men me kabirin folofolo, wo xa tu alu jusukunŋo la. Alu xa xumo men me kabirin folofolo nin wo tuta alu jusukunŋo la, alu dulu si tu Ala Dinxe nin n Fa Ala la kafuɲoxoya xono. 25Kirisita xa men lahido ta xo a b'a dila n ma, wo fele: Nilamaya banbalo. 26Moxo mennu be a ŋininna x'alu lafili, nte xa ɲin safe, x'a ki alu ma wo lelu la kuwo la. 27Atelu kennu, Kirisita x'a Ni Senunŋo di alu ma. Alu maaku nte a la, moxo x'alu laxaran, bawo Ni Senunŋo fan be alu laxaranna fenŋo bee la xa ban. Ate la xaranŋo mu tonɲa le ti, faniya nte. Wo le x'a tu, alu Ni Senunŋo la xaranŋo labatu, xa tu Kirisita la kafuɲoxoya xono. 28Ń na dindinŋolu, alu tu Kirisita la kafuɲoxoya xono, walasa nin a nata lun men, a xa lannaya xoyo tara n na, n xana malu wo lunŋo. 29Alu x'a lon xo Kirisita be tilinnin. Wo xanma, alu xanta x'a lon du xo moxo wo moxo be tilinninɲa silo taxamala, wo tigo mu Ala dinŋo le ti.

will be added

X\