1 KORENTENGOLU 9

1Awa, ń badinŋolu, nte hooroyaninŋo nte ba? Nte nte kiladinŋo ti ba? Ń man n Marigi Isa je ba? Nte xa baaro men ke Marigi ɲen, atelu fan nelu nte wo baarano ti ba? 2Haali nin dolu man son nte la kiladinɲa ma, ń ken mu a ti atelu bulu; bawo ate lelu mu ń na kiladinɲa taagumanseedo ti, Marigi kafuɲoxoya la. 3Nte be ń segesegebaxolu jaabila men na wo fele: 4Ntelu nin domolo nin minno man xan ba, n na baaro xanma? 5Ntelu nin a man xan ba xa lannayabaxa muso do ta, n nin wo xa taxa í xo kiladin tolu nin Marigi badinxelu anin Piyere b'a kela ɲa men? 6Walla nte nin Baranabasi fulo doron ne xa xan ba xa baaro ke, xa n fannu labalu? 7Jon si son xa taxa sorodasiya to, xa saagi a fan dono tanin? Jon si resenfuuto bo x'é me a dinŋo domo? Jon xa negaanila je xo a me a la marafen negaanitalu nono min? 8A xana ke alu ɲen xo nte la ɲin xuma innu be siginin hadamadinŋolu la ketalu doron nelu xan. Kila Musa la sariya du be wo lelu fola. 9A be safenin wo sariya xono xo: “Tuura men be ɲo toɲonxola x'a keso bo, í xana fen siti wo da ma.” Ala xa wo fo tuuralu hanmo koso ba? 10Tonɲa la, a man xuma ten nte lelu ɲen ba? Sikka nte a to, wo xumo safeta nte lelu ɲen. Senekela nin senefenŋo xosibaxo xa xan xa i la baaro ke don gigo xan, xo i si fen soto i la baaro to. 11Nin ntelu xa Ni Senunŋo la siyo dolu lan alu to: A si ke danmatanbi ku ti ba n x'alu bulufenŋo dolu soto, x'a ke n na fen tegetalu ti? 12Nin dolu be wo waajibiyanin alu xan, ntelu nin a man xan ba xa tanbi wolu la? Haali wo, n nin men xa xan, n man wo ŋinin alu la. Bari n be kuwo bee muɲala walasa n xana fusi ke, men si Kirisita la xibaru Dimanŋo bali xa taxa ɲa. 13Alu man a lon ba xo moxo mennu be baaro kela Alabatusuba xono, xo wolu la baluwo be bola Alabatusuba fenŋo lelu to, anin xo mennu be sadaxolu lasila sadaxajanidula, xo wolu be i nidula sotola wo sadaxolu to? 14Wo be ɲa men, Marigi x'a latege xo Xibaru Dimanŋo fobaxolu xa balu wo baaro la. 15Bari nte nin wo fenŋo mennu xa xan, ń man a lo wolu si nofe. Nte nte ɲin safe in du kila alu ma walasa alu xa wo ke nte ɲen. Saya xa di nte ɲen don ti moxo xa soto xa nte la ɲin wasuku in tiɲa. 16Fanbunɲa kun nte nte ɲen Xibaru Dimanŋo fo to; bawo a keta waajibo le ti nte ma. Nin nte man Xibaru Dimanŋo fo, bone be nte ɲen. 17Nin nte fan sago le xa ń bula Xibaru Dimanŋo fola, nte si ń sara soto. Bari nte fan sago nte, baara le mu, men xarifata ń ma. 18Wo to, ń na sara mu mun ti? Xa Xibaru Dimanŋo fo moxolu ɲen fu, x'a tara ń nin men xa xan wo Xibaru Dimanŋo fo to, ń buruta wo to. 19Nte nte moxo si la jonŋo ti. Wo bee xan, nte xa ń fan majigi xa ke bee la jonŋo ti, walasa xa moxo kiika soto Kirisita ɲen. 20Xa nte tu Yahudiyalu to, ń keta Yahudiya ti, walasa ń x'e soto. Mennu be sariya xoto, nte keta wolu bata í xo nin nte du be sariya xoto, haali x'a tara nte nte wo xoto, walasa nte xa sariya xoto moxolu soto. 21Wo ɲa ma, sariya nte mennu bulu, nte keta wolu bata í xo nin sariya nte nte bulu; walasa sariya nte mennu bulu, nte xa wolu soto. Wo bee nin a ta, a nte í xo nin Ala la sariya nte nte bulu; bawo nte be Kirisita la sariya xoto. 22Mennu barako xa doxo lannaya to, nte keta wolu bata í xo nin nte du barako xa doxo; walasa xa barakedoxonŋolu soto. Nte be ń fan kela fenŋo bee ti bee ɲen; walasa ɲa wo ɲa ma, nte xa i dolu lakisi. 23Nte be wo bee kela Xibaru Dimanŋo koso; walasa nte xa ń nidula soto a to. 24Alu x'a lon xo borikeno xan, ɲoxodanborilalu bee b'e borila; bari kilin ne be a bandeero tala. Wo ɲa ma, alu dulu x'e bori bete fo alu si bandeero ta. 25Ɲoxodanborilalu be i fannu tangala ku kiika ma. Wolu be wo kela walasa i xa kunnawulijala soto, men si tiɲa. Bari ntelu be wo kela walasa n xa kunnawulijala soto, men nte tiɲala fo abada. 26Wo xanma, nte be ń borila, xa ń ɲa loninŋo tu ń borikunŋo to. Ń be í xo kutubonnila, men nte a bulo fayila a kunfe. 27Ń be deguba lala ń balo xan, x'a xulu; walasa nte men xa moxolu waaju, ń xana taxa sinbo.

will be added

X\