1 KORENTENGOLU 7

1Awa, alu xa safe ki nte ma kuwo mennu la, saasa alan xa si wolu ma. A xa ɲin, xeba xana musu futu. 2Bari x'a la a xan jadoya be fuumanin; wo xanma, a xa ɲin xo xe bee kilin kilin xa muso ta, anin xo muso bee kilin kin xa ke a xe kun. 3Xeba xa xan xa men ke a musu ɲen, a xa wo ke; muso du nin men xa xan a xe ɲen, a xa wo ke. 4Muso me a fan balo ke no a sago ti; a balo mu a xe le ta ti. Wo ɲa ma, xeba du me a fan balo ke no a sago ti; a balo mu a musu le ta ti. 5Alu xana ladula tege i ɲoxo la, fo nin alu benta a to, xa wo ke waxati la, x'a bula Alamatara xanma. Wo xo, alu saagi i ɲoxo ma, walasa Sentane xana alu neene, x'alu lakori alu fannu tomutala. 6Ń be men fola alu ɲen jan, waajibi nte; yitannalo le mu. 7A xa di nte ɲen moxolu bee xa ke futubalo ti í xo nte; bari Ala xa solifen mategeninŋo do le di bee kilin kilin ma. A xa kuwo do sinŋo di do ma, xa ku xote sinŋo di do xote ma. 8Mennu man futu, anin muso mennu xe sata, ń b'a fola wolu ɲen xo a xa ɲin i kilinnu xa tu í xo nte. 9Bari nin i x'a je xo i me i fannu muta no, i xa futuwo ke. Bawo futuwo xa fisa nego fuumaninŋo ti. 10Mennu be futuwo xono xa ban, nte be men waajibiyala i ma, nte la fo nte, bari Marigi la fo le mu, xo muso man xan xa bo a xe kun. 11Nin a bota a xe kun, a futubalo le xa xan xa tu, walla a nin a xe xa i koppa i ɲoxo ma. Xe du man xan x'a musu bula. 12Nte be men fola alu tolu ɲen saasa, wo nte Marigi la fo ti, nte la fo le mu: Nin musu lannayabalo be badinxe do kun, a dun sonta xa tu a kun, a xana a bula. 13Wo ɲa ma, nin lannayabaxa muso do be xe lannayabalo kun, nin wo xe sonta a xa tu a kun, a xana bo a kun. 14Xe lannayabalo senuyata a musu lannayabaxo koso. Musu lannayabalo du senuyata a xe lannayabaxo koso. Nin wo nte, alu dinŋolu tunnu si ke moxo noxoninŋolu ti, bari tonɲa, i xa senu. 15Bari nin xe, walla muso men nte lannayabaxa ti xo, xo a be bola, alu a tu a xa bo. Wo to, julu nte lannayabaxo la tugun; bawo Ala xa n kili xo n xa ke heero le xono. 16Ite muso men keta lannayabaxo ti, í x'a lon ba fo í si ke sabaabu ti í xe xa kisi? Ite xe men keta lannayabaxo ti, í x'a lon ba fo í si ke sabaabu ti í musu xa kisi? 17Wo bee nin a ta, Marigi xa bee kilin wo kilin so men na, anin Ala x'é kili x'é tu ɲa men ma, bee kilin kilin xa tu wo ɲa ma. Nte be wo le lawaajibiyaxan Ala la jamalu bee ma. 18Nin Ala xa moxo do kili x'a tara a be ɲaxanin, wo tigi xana wo dugu. Nin Ala xa do kili x'a tara a nte ɲaxanin, a tigo ɲaxabalo xa tu. 19Ɲaxa nin ɲaxabaliya nte ku ti; nafa be men na, wo mu Ala la sariyalu labatulo le ti. 20Ala xa moxo bee kili x'é tu ɲa men, bee xa tu ten. 21Nin Ala x'é kili x'é tu jonɲa la, xana hanme wo la. Bari nin ɲa be í ɲen xa hooroya, wo ke. 22Bawo Marigi xa men kili x'a tu jonɲa la, wo tigi hooroyata Marigi ɲen. Marigi xa hooro men du kili, wo keta Kirisita la jonŋo ti. 23Ala x'alu san sonŋoba le la, wo xanma, alu xana ke hadamadinŋolu la jonŋolu ti. 24Ń badinŋolu, Ala x'alu bee kili x'alu tu ɲa men, bee xa tu ten Ala ɲa xoto. 25Men mu futubalolu la kuwo ti, Marigi man yanmaru di ń ma wo la; bari ń si ń fan na miiriya di, nte men, Marigi la ɲumaya xanma, ń nin lannamoxoya xa xan. 26Bi waxato la xoleya xanma, men xa ɲin nte ɲala, wo mu le xo moxo bee xa tu a ɲa folo ma. 27Nin musu be men kun, wo xana a ŋinin x'a musu bula. Nin musu nte men kun, wo xana a ŋinin xa musu futu. 28Bari haali wo, nin í xa muso futu, í man junube ke wo ti. Nin xarafa fututa, a man junube ke wo ti. Bari mennu je futuwo ke, wolu si toorokuwolu soto i la nilamaya xono. Nte b'a fe alu xa kisi wo lelu ma. 29Ń badinŋolu, ń be men fola wo fele: Waxato sutiyata. Kabirin saasa musu be mennu kun, wolu xa ke í xo nin musu nte i kun. 30Mennu be xasila, wolu xa ke í xo nin i nte xasila. Mennu be ɲaxalinin, wolu xa ke í xo nin i nte ɲaxalinin. Mennu be sanno kela, xa ke í xo nin fen nte i bulu. 31Mennu be ɲin duniya in diyaboxan, wolu xa ke í xo nin i nte a diyaboxan; bawo n ɲa be ɲin duniya in men na ten, wo be tanbila le. 32Ń b'a fe le, hanme fusi xana ke alu la. Men man futu ke, wo be hanmela Marigi la kuwolu la, walasa a la kuwo si diya Marigi ɲen ɲa men. 33Bari men xa futuwo ke, wo be hanmela duniya kuwo lelu la. Wo b'a ŋininna, a la kuwo si diya a musu ɲen ɲa men. 34A miiro be talanin. Wo ɲa ma, xe nte muso men kun, wo nin xarafa be hanmela Marigi la kuwo lelu la, walasa i xa senuya i balo nin i niyo to. Bari musu futuninŋo, wo be hanmela duniya kuwo lelu la; walasa a la kuwo si diya a xe ɲen ɲa men. 35Nte be wo fola alu fannu la nafa le xanma. Ń man wo fo alu fitigali xanma; a fokunŋo mu le, walasa men xa fisa, alu xa wo ke; nin alu notoninŋo si tu Marigi la muume. 36Nin xe do mamutamuso loxoba b'a la, xo a si son xa dun a gaso to, a b'a fe le x'a futu. Men xa di a ɲen a xa wo ke. A nte junube kela, i xa futu i ɲoxo ma. 37Bari moxo men xa don natege a jusukunŋo bee la, xo a b'a la xarafa futubalo tula, x'a tara diyakuwa nte, nin a ta le mu a sago ti, wo tigo xa ku bete ke. 38Wo ɲa ma, men je a mamutaxarafa futu, wo xa ku bete ke; bari men man a ta futu, wo le ɲoxon nte. 39Futuwo xa muso siti a xe la, a xe la nilamaya bee xono; bari nin a xe sata, xe men xa di a ɲen, a si futu wo ma no. Bari a xa ke lannayabaxa futuwo ti doron. 40Bari haali wo, nte ɲala nin a tuta ten, wo le xa fisa a ma futuwo ti. Ń be lanin a la xo Ala Niyo be nte du to.

will be added

X\