1 KORENTENGOLU 4

1Wo to, alu ntelu jaate Kirisita la baarakelalu ti anin Ala la gullolu marabaxolu. 2Men ŋininta Ala la gullolu marabaxolu fe, wo mu xantigiya le ti. 3Nte ken, atelu xa kiito tege nte xan wo, ɲin duniya in kiititegelalu xa kiito tege nte xan wo, nte la jaateba nte wo xan. Nte fan du nte kiito tegela ń fan xan. 4Tonɲa le mu xo nte man jalagi si lon ń fan na. Bari wo nte a yitala xo nte be tilinnin. Men be kiito tegela nte xan, wo mu Marigi le ti. 5Wo le x'a tu, alu xana kiiti tege moxo si xan jannin a waxato xa si, jannin Marigi xa na. Ate le be nala dibitoku duguninŋolu bee bulala keno xan, xa moxo bee xonokuwo yita. Wo tumo la, bee kilin kilin nin tantulo men xa xan, Ala si bee tantu wo la. 6Ń badinŋolu, nte xa wo kuwolu fo alu ɲen, xa Apolosi nin nte fan ke misaalo ti, alu xaranŋo xanma, walasa alu x'a faamu n na ɲayito fe, xo kuwo mennu safeta, moxo xana tanbi wolu xan. Alu si du xana alu fannu bunɲa xa ke do ɲen do xanma. 7Mun xa í nin tolu tala? Mun be í bulu men man di í ma? Nin a dita í ma le, mun na í be í fan bunɲala, a be í xo nin a man di í ma? 8Alu be fen wo fen fe, wo be alu kun xa ban. Alu fentigiyata xa ban. Alu keta mansolu ti ntelu xo. Ń b'a fe alu xa ke mansolu ti soobeya la, walasa n dulu xa mansaya ke alu fe. 9Ń b'a miirila xo Ala xa ntelu kiladinŋo lelu ke xofemoxolu ti. N be le í xo moxo mennu nin saya xa xan. Bawo n keta felefenŋo ti duniya bee ɲen, melekiyolu fara hadamadinŋolu xan. 10N keta nalumalu ti Kirisita koso; bari atelu keta hakilitigolu ti Kirisita kafuɲoxoya xono. Ntelu keta barakentanŋolu ti; bari atelu keta barakemalu ti. Alu be bunɲa sotola; ntelu be doxoya sotola. 11Fo xa na si saasa ma, ntelu be tooronin xonxo nin mindoxo bulu. Feeto be n na, n be buwola. Basigiradula kilin nte n na. 12N be baaro kela n bulo la, xa sege xa n fannu labalu. Moxolu be n nanila, ntelu be duwala i ɲen. I b'a lola n nofe xa n tooro, n b'a muɲala. 13I be n toxo tiɲala, ntelu be xuma ɲuma fola i ɲen. N be jaatenin duniya la ɲagama bonninŋo ti, xa ke bee la fen noxoninŋo ti, fo xa na si saasa ma. 14Nte man ɲin fen innu safe walasa x'alu lamalu, bari nte x'alu lasobi le í xo nte dinŋolu, ń be mennu xanula. 15Haali nin karanmoxo wa tan ne keta alu kun Kirisita la kafuɲoxoya la, fa kiika ken nte alu kun. Nte le x'alu bange Kirisita la kafuɲoxoya la, xibaru Dimanŋo fe. 16Wo xanma, nte be alu tarala x'alu xa ke nte ladigibaxolu ti. 17Wo le x'a tu, ń be Timote kila alu ma, nin wo mu ń dinxe xanuninŋo nin xantigo ti Marigi kafuɲoxoya to. Ate si alu hakilo lajigi nte taxamaɲa la, Kirisita la kafuɲoxoya xono, í xo ń be Ala la jamalu xaranna ɲa men dula bee. 18Alu dolu xa i fan bunɲa, x'a miiri xo nte me taxa alu bata tugun. 19Bari nin a keta Marigi sago ti, dondin nte si taxa alu bata. Nin nte sita je, ń si fantobalu la sintigiya lon, men nte i la xumolu ti. 20Bawo Ala la Mansaya nte xuma gansan ti; sintigiya kuwo le mu. 21Mun xa di alu ɲen? Ń nin guma xa taxa alu ma ba, walla ń nin xanuya nin xonotodiya le xa taxa?

will be added

X\