1 KORENTENGOLU 3

1Ń badinŋolu, tonɲa la nte man sin xa xuma alu ɲen í xo moxo mennu be i taxamala Ni Senunŋo sago la, ń xumata alu ɲen ne í xo moxolu mennu b'e taxamala i nidiyanɲo la. Ń xumata alu ɲen í xo moxo mennu mu dindinŋo ti lannaya to. 2Nte xa nono le di alu ma x'a min, ń man domoli xulin di alu ma, bawo alu tunnu me sin no xa wo domo. Haalibi, alu me sin no xa wo domo. 3A be ten bawo haalibi, alu be i taxamala alu nidiyanɲo le la. Faxakilinɲalu nin kelolu be alu te; wo nte a yitala ba xo alu be i taxamala xa ben ɲin duniya in sago ma? Alu taxamaɲa nin hadamadin tolu taxamaɲa man ke kilin ti ba? 4Nin alu do b'a fola xo: «Nte mu Poli le ta ti», do xote xo: «Nte ken mu Apolosi le ta ti», wo nte hadamadin gansanŋo jigo ti ba? 5Apolosi mu mun ti, fo Poli mu mun ti? N mu Ala la baaradinŋo doron nelu ti, alu xa lannaya ke mennu sabaabo la, x'a la Marigi la so xan i kilin wo kilin ma. 6Nte xa tutulo ke, Apolosi x'a majiibi, bari Ala le x'a labunɲa. 7Wo ɲa ma, tutulila nin majiibilila nte fusi ti. Ala le mu fen ti, wo men b'a labunɲala. 8Men b'a tutula, anin men b'a majibila, wolu bee xa xan. Ala si bee kilin kilin baraaji x'a la bee fan na baara keninŋo xan. 9Bawo n mu Ala baarakeɲoxo lelu ti. Ate lelu mu Ala la fuuto ti, anin Ala la bunŋo. 10Ala x'a la neemo men di ń ma, ń xa bunŋo juwo sigi wo barako to, í xo sulola hakilima. Moxo xote be bunŋo loxan wo juwo xan. Bari bee kilin kilin xa xan xa í hakili tu a la loliɲa ma wo ju sigininŋo xan. 11Bawo ju folo men sigita, nin wo mu Isa Kirisita ti, moxo me ju xote sigi no wo xo. 12Nin moxo do xa lolo ke wo ju sigininŋo xan, sano la, walla xaalisixoyo la, walla kuru daxolenŋolu la, walla yiro la, walla binŋo la, walla bita la, 13i bee kilin kilin xa baara sifa men ke, wo si lon. Kiito lunŋo si wo yita, bawo wo lunŋo be í yitala ta le fe. Ta si moxo bee la baara keninŋo xotobo x'a sifa lon. 14Nin moxo men na baara keninŋo man jani, wo tigo si baraajo soto. 15Bari nin moxo men na baara keninŋo janita, wo tigo si bono a la baraajo to. Wo bee nin a ta, a tigo si kisi, bari a be í xo nin a sabata xa bo ta to. 16Alu man a lon ba, xo alu mu Ala la batusuba le ti, anin xo Ala Niyo be siginin alu xono? 17Nin do xa Ala la batusuba tiɲa, Ala si wo tigo tiɲa; bawo Ala batusuba xa senu. Alelu mu a la batusuba ti. 18Moxo si xana a fan nafili. Nin moxo do hakilo la xo a mu hakilitigo ti ɲin duniya in ɲen, wo tigo xa ke naluma ti, walasa a xa hakilitigiya soobe soto. 19Bawo ɲin duniya in hakilitigiya mu nalumaya le ti Ala bulu. A be safenin Kitaabo to xo: «A be hakilitigolu mutala i fannu la kewuya la.» 20A be safenin du xo: «Marigi xa hakilitigolu la miiriyalu lon. A x'a lon xo wolu mu fuwo le ti.» 21Wo le x'a tu, moxo si xana a fan bunɲa moxolu koso, bawo fenŋo bee mu alu ta le ti. 22Poli wo, Apolosi wo, Piyere wo, duniya wo, nilamaya wo, saya wo, saasa fenŋolu wo, fen natalu wo, fenŋo bee mu alu ta le ti. 23Bari atelu kennu mu Kirisita ta lelu ti. Kirisita mu Ala ta ti.

will be added

X\