1 KORENTENGOLU 2

1Ń badinŋolu, nte taxata alu bata tumo men xa Ala la gullo fo alu ɲen, nte man a yita alu la xumaɲalonŋo la, walla hakilitigiyaba xumolu la. 2Xa nte tu alu bata, nte tun x'a latege xo nte xana fusi xote lon, fo Isa Kirisita doron, nin wo mu a la saya ti gengenyiro xan. 3Wo le x'a tu, nte barakentanŋo anin ń silaninŋo jarajarato tun be alu bata. 4Nte la xaranŋo anin nte la waajulo man ke hadamadinŋolu la hakilitigiyaxuma dimanŋolu la; bari a keta Ni Senunŋo la sintigiya le la. 5Wo keta, walasa alu la lannaya xana sigi hadamadinŋolu la hakilitigiya xan, bari a xa sigi Ala la sintigiya xan. 6Bari wo bee nin a ta, n na waajulo mu hakilitigiya le ti lannayabaxa moninŋolu ɲen. Wo hakilitigiya nin duniya la hakilitigiya nte kilin ti. A nin duniya kuntigolu dulu la hakilitigiya nte kilin ti; wolu si tiɲa. 7N be Ala la hakilitigiya le xaranŋo ma x'a di, men mu gulle duguninŋo ti moxolu ma. Ala tun x'a latege kabirin folofolo n na bunɲa xanma. 8Ɲin duniya in kuntigolu si man wo hakilitigiya lon, bawo nin i tunnu x'a lon, i tunnu me noorotigi Marigi gengen yiro ma. 9Bari í xo Kitaabo x'a fo ɲa men xo: «Moxo ɲa man men je, a tulo man men me, moxo si bada man men miiri, Ala xa wo toben a xanubaxolu ɲen.» 10Awa, Ala ken x'a yita nte lelu la, Ni Senunŋo fe; bawo Ni Senunŋo be fenŋo bee segesegela x'a lon, haali Ala la ku duguninbalu. 11Moxo joman xa moxo xonokuwo lon nin a fan niyo nte? Wo be ɲa men, moxo si me Ala la kuwolu lon no nin Ala Niyo nte. 12Ntelu kennu man ɲin duniya in niyo soto; bari n xa Niyo soto men bota Ala la, walasa Ala xa fenŋo mennu di n ma fu, n xa wolu lon. 13N be wo kuwolu fola xumo mennu la, wolu nte sotola moxolu la hakilitigiya xaranŋo fe, fo Ala Niyo la xaranŋo fe. Wo ɲa ma, n be Ni Senunŋo la kuwo dolu ɲafola moxolu ɲen, wo Niyo be siginin mennu to. 14Bari Ala Niyo nte siginin moxo men to, wo me son Ala Niyo la kuwolu ma. A be wolu mafelenin nalumayakuwo lelu ti; a me wo kuwolu faamu no fan, bawo moxo si wolu faranfansi no Ni Senunŋo le doron barako la. 15Ni Senunŋo be siginin moxo men to, wo tigo le si sin no xa kuwo bee faranfansi x'a lon; bari moxo si me kiito tege no wo tigo xan. 16A be í xo Kitaabo x'a fo ɲa men xo: «Jon xa Marigi miiriya lon? Jon si a fo no xo í be ate tonbenna?» Bari ntelu kennu, Kirisita miiriya be ntelu xono.

will be added

X\