1 KORENTENGOLU 16

1Nilifenŋo men xa xan xa lakamari, x'a ke Ala la moxo senumanŋolu deemalilanŋo ti, nte xa men fo Ala la jamalu ɲen Galasi maro xono wo kuwo to, alu dulu x'a ke wo ɲa ma. 2Alahadi wo alahadi, alu bee xa xaaliso do bula í danna alu bata, men sinŋo be alu ɲen, x'a la bee la sotota xan. Alu wo ke, walasa nte la na xana laxono nilifenŋolu mutalo la. 3Nin nte nata tumo men, alu xa moxo mennu sugandi, nte si safelu ke x'e di wolu ma, xa i nin alu la nilifenŋolu bula xa taxa Yerusaleme. 4Nin a xa nte fan taxakun bo, wo moxolu si la nte xan xa taxa. 5Nte si na alu bata xa tanbi Maseduwane jamano fe; bawo nte xa xan xa Maseduwane tokutun. 6A do to, nte si waxato do ke alu bata, walla xa neno waxato bee ke alu bata, walasa alu xa nte deema ń xa taxa ɲa ń na taxamo la. 7Ń nte a fe ɲin to x'alu je doron xa tanbi. Ń hakilo b'a ma xa waxati ke alu bata nin Marigi sonta. 8Bari wo bee nin a ta, nte si tu Efesi fo Pantekoti sallo xa si. 9Bawo Ala xa daba yele nte la baaro xanma non, haali x'a tara jaxolu xa sa je. 10Nin Timote nata, alu a mutakubete, walasa a xana sila ku ɲa alu bata. Katugala a du be Marigi la baaro kela í xo nte fan. 11Moxo si xana a doxoya. Alu x'a deema a xa taxa ɲa a la taxamo la, heero to, walasa a xa na nte bata. Nte b'a nin badinŋolu laxononin. 12Men mu n badinxe Apolosi ti, nte x'a matara ɲa bee ma xo a nin badinŋolu xa na bo alu ma. Bari a man diya a ɲen folo xa taxa. Bari nin a xa waxati bete soto, a si taxa. 13Alu tu i ɲala, xa tu sinsinnin lannaya to. Alu i timinadiya, x'alu barako bunɲa. 14Alu kuwo bee ke xanuya to. 15Ń badinŋolu, alu xa Sitefanasi nin a la lumamoxolu lon. Alu xa don du lon xo i lelu fololu xa lannaya ke Akayi jamano xan. I x'e fannu di Ala la moxolu deemalo xanma. Nte be alu tarala, 16x'alu xa xulu wo ɲoxon moxolu ɲen, anin mennu bee be i deemala baaro la. 17Sitefanasi nin Forotunatusi nin Akayikusi la na diyata nte ɲen bete. Fenŋo men tun dasata nte la, x'a tara alu nte jan, wolu xa nte deema wo la. 18I xa nte juso sumaya, x'alu dulu juso sumaya. Alu xa wo ɲoxon moxolu waleɲumalon. 19Ala la jama mennu be Asi maro xono be alu xontonna. Akilasi nin Pirisiye be alu xontonbetela Marigi la kafuɲoxoya xono, anin Ala la jama men be kamarila i la luwo ma. 20Badinŋolu bee be alu xontonna. Alu i ɲoxo xonton baatayalixontonni senunŋo la. 21Nte Poli fan bulo le xa ɲin xontonni in safe. 22Nin moxo do nte Marigi xanula, wo tigi xa danga! Maranata, wo xoto xo: N Marigi, na! 23Marigi Isa la neemo xa ke alu fe. 24Nte be alu bee xanula Isa Kirisita la kafuɲoxoya xono.

will be added

X\