1 KORENTENGOLU 15

1Ń badinŋolu, ń be alu hakilo lajigila xibaru Dimanŋo la, ń tun xa men fo alu ɲen, alu xa men muta, alu be sinsinnin men xan. 2Wo xumo si alu kisi, nin alu tuta a mutanin í xo ń x'a fo alu ɲen ɲa men. Nin wo nte, alu la lannaya keta fuwo ti. 3Nte fan xa xaranŋo men soto, ń folota xa wo lasi alu ma. Wo xaranŋo fele xo: Kirisita sata n na junubolu xanma, í xo Kitaabo x'a fo ɲa men. 4A lasita, a sa tili sabo, a kunita xa bo furelu to, í xo Kitaabo x'a fo ɲa men. 5A x'é yita Piyere la, wo xo, a x'é yita a la kiladin tan nin fulo la. 6Wo xo, a x'é yita badin lannayabaxo dolu la ɲakun kilin, wolu xa sa keme luulu moxo ti. Wolu kiika be i nila haalibi, bari dolu sata. 7Wo xo, a x'é yita Yaxuba la, wo xo, kiladinŋolu bee la. 8Wolu bee xo, a x'é yita nte la, nte men keta í xo dinŋo men man si. 9Bawo nte mu kiladinŋolu bee to doxomandinŋo le ti. Nte fan man xan xa kili xo kiladinŋo; bawo ń xa Ala la jama tooro. 10Bari Ala la neemo xanma, ń mu men ti, ń mu wo ti. A xa neemo men di ń ma, wo man ke fu ti, bawo ń xa baaro ke xa tanbi kiladin tolu xan. Nte fan man wo ke; bari Ala la neemo men be ń xan, wo le x'a ke. 11Wo to, a keta nte ti wo, a keta itelu ti wo, n be men waajulo kela wo le fele, alu lata men na, wo le fele. 12Awa, nin n be waajulo kexan xo Kirisita kunita xa bo furelu to, wo to, alu dolu si a fo ɲa di xo furelu nte kunila? 13Nin furelu nte kunila, Kirisita du man kuni. 14Nin Kirisita man kuni, n na waajulo mu fuwo le ti; alu la lannaya du mu fuwo le ti. 15Xa tanbi wo bee xan, n mu seede fano lelu ti Ala la kuwo to, bawo n x'a seedeya xo a xa Kirisita lakuni xa bo furelu to. Nin furelu nte kunila, Ala man a lakuni. 16Bawo nin furelu nte kunila, Kirisita du man kuni. 17Nin Kirisita man kuni, alu la lannaya mu fuwo le ti. Alu be alu la junubolu xono haalisa. 18Wo to, men dulu sata x'e tu Kirisita la kafuɲoxoya xono, wolu halagita. 19Nin n gigo be Kirisita xan ɲin duniya in doron ne xono, n ɲoxonnu maɲumatomoxo nte hadamadinŋolu bee to. 20Bari tonɲa la, Kirisita kunita le xa bo furelu to; a keta furelu la kuninin folo ti. 21Saya nata duniya xono moxo kilin sabaabuya la ɲa men, wo ɲa ma, furekuniyo du nata moxo kilin ne sabaabuya la. 22Moxolu bee be sala Adama bonsonɲa koso ɲa men, i bee si kuni i nin Kirisita la kafuɲoxoya koso ten. 23Bari bee nin a la waxato le mu. Kirisita le mu folo ti; wo xo, mennu mu Kirisita talu ti, wo dulu si kuni a na lunŋo. 24Wo tanbo xo, duniya labanŋo si na. Kirisita si kuntigiya bee nin fango bee nin sintigiya bee ban; wo xo, a si mansaya saagi Fa Ala ma. 25Bawo waajibo le mu Kirisita xa sigi mansaya la fo a x'a jaxolu bee xulu x'e ke a sinxotofenŋo ti. 26Jaxu labanŋo men be silatunula, wo mu saya le ti. 27Bawo a xa fenŋo bee xulu x'e bula a sinŋo xoto. Bari nin a xo: “Fenŋo bee” xuluta a ɲen, sikka nte a to, men xa fen bee xulu a ɲen, wo sin nte a to. 28Nin fen bee xuluta a ɲen tumo men, wo tumo la, Ala Dinxe du fan si xulu Ala ɲen, wo men xa fen bee xulu a ɲen; walasa Ala xa ke fen bee ti, bee xono. 29Awa, mennu be batisela furelu ɲen, wolu si na mun ke? Nin a x'a tara xo furelu nte kunila, mun na moxolu be batisela wolu ɲen? 30Alan ntelu fan dunnu? Mun na n be faaratula n niyo la waxato bee? 31Ń badinŋolu, nte be ń fan dila saya ma lun wo lun. Tonɲa le mu, tonɲa le mu fo nte be kunnawulinin alu la, n Marigi Isa Kirisita la kafuɲoxoya xono. 32Nte xa jaxo mennu kele Efesi gallo to í xo warolu, nin a x'a tara nte xa wo ke hadamadinɲa kuwo lelu xanma, wo si mun dun nte la? Nin furelu nte kunila, «alan xa domolo ke x'e min, bawo sinin n si sa.» 33Alu xana alu fannu bula filo xono. «Kafuɲoxojaxo si lanbe tiɲa.» 34Alu hakili soto í xo a xa bete ɲa men, xa junubo dabula; bawo dolu be alu to, wolu man Ala lon. Nte be wo fola, x'alu malo yita. 35Bari do si ŋininxalo ke xo furelu be kunila ɲa di? I nin bala sifa joman si kuni? 36Hakilintanŋo! Nin í xa fen do lan, a me falin nin a man sa folo. 37Í be siyo men lanna, wo mu kese gansanŋo doron ne ti, ɲokeso walla kese sifa xote, bari a si falin xa ke juwo men ti, wo juwo nin wo keso nte kilin ti. 38Wo xo, balo men xa di Ala ɲen, a be wo le dila a ma. Balo men si ben keso bee kilin kilin ma, a be wo le dila a ma. 39Nilamafenŋolu bee balasubo nte sifa kilin ti. Moxolu ta nin subolu ta nte kilin ti. Xonolu ta mu sifa do ti, ɲegolu ta mu sifa xote ti. 40Sanxulo balolu be je, duguxulo du balolu be je. Sanxulo balolu nooro nin duguxulo talu nooro nte kilin ti. 41Tilo nooro be le je, xaro du ta be je, loolo dulu ta be je. Haali loololu bee nooro nte kilin ti. 42Furekuniyo du si ke ten; a tolita si lasi, a tolibalo si kuni. 43A kejaxuma si lasi, a nooroma si kuni. A barakentanŋo si lasi, a barakema si kuni. 44A subuma si lasi, a nima si kuni. Nin bala subuma be je, bala nima du be je. 45Wo le x'a tu, Kitaabo x'a fo xo: «Moxo folo, Adama, keta dafen nilama ti.» Bari Adama labanŋo, wo keta niyo ti, men be nilamaya dila. 46Men nima mu, wo man folo; bari subuma le x'é folo. Men nima mu, wo nata xofe le. 47Moxo folo mu banxuma le ti, a bota duguxulo le to. Moxo fulananŋo ken bota sanŋo le to. 48Moxo men bota duguxulo banxo to, wo be ɲa men, banxuxanta dulu be ten. Moxo men bota sanŋo to be ɲa men, santota dulu be ten. 49N keta moxo banxuma ɲoxonŋo ti ɲa men, n si ke moxo men bota sanŋo to du ɲoxonŋo ti. 50Ń badinŋolu, ń b'a fe xa men fo, wo fele xo: Hadamadinŋo nin a subo nin a jelo me nidula soto no Ala la Mansaya xono, anin, xo fen tolita me tolibaliya soto no. 51Ń be nala gullo do fola alu ɲen: N bee nte sala, bari n bee si yelema 52ɲakun kilin, ɲa taxun nin ɲa yelo, nin buutu labanŋo fota tumo men. Buutuwo si fo, furelu si kuni xa ke tolibalo ti; alan bee si yelema. 53Waajibo le mu ɲin bala tolita in xa yelema xa ke tolibalo ti, anin ɲin bala sata in xa yelema xa ke sabalo ti. 54Nin ɲin bala tolita in yelemata xa ke tolibalo ti, anin nin ɲin bala sata in yelemata xa ke sabalo ti, wo tumo, ɲin xuma in men safeta Kitaabo xono, si dafa xo: «Sinŋo sotota saya xan, x'a sanko pewu!» 55«Saya, í la sinŋo be minto? Saya, í la beɲo be minto?» 56Saya la beɲo mu junubo le ti; junubo barako mu Ala la sariya le ti. 57Bari barako xa bula Ala ɲen, ate men be sinŋo dila n ma, n Marigi Isa Kirisita barako to! 58Wo ɲa ma, nte badin xanuninŋolu, alu sinsin lannaya to, xa ke boyibalolu ti. Alu taxa ɲafe tumo bee Marigi la baaro to; x'a lon xo alu la baaro nte fu ti alu nin Marigi la kafuɲoxoya xono.

will be added

X\