1 KORENTENGOLU 14

1Alu xanuya le ŋinin folo. Alu Ni Senunŋo la so dulu ŋinin bete, sakuta kilaya. 2Moxo men be xumala xan xotelu to, a nte xumala moxolu ɲen, a be xumala Ala le ɲen. Moxo si nte a faamula, bari Ni Senunŋo barako la, a be ku duguninŋolu fola. 3Bari moxo men be kilaya kela, wo be xumala moxo tolu ɲen, walasa xa do kafu i barako ma, x'e jusudun, anin x'e hakilo lasigi. 4Moxo men be xan xotelu fola, wo be do kafula a fan ne barako ma; bari men be kilaya kela, wo be do kafula Ala la jama bee le barako ma. 5Ń b'a fe alu bee xa xuma xan xotelu to. Bari men xa di nte ɲen xa tanbi wo xan, wo mu le, alu xa sin xa kilaya ke. Men be kilaya kela, wo nafa xa bun xa tanbi xan xotelu fo xan, fo nin a x'a tara de moxo be je men si a xoto fo no, walasa do xa kafu Ala la jama bee barako ma. 6Wo ɲa ma, ń badinŋolu, ń be alu ŋininxala, nin nte nata alu ma, xa xuma alu ɲen xan xotelu to, ń si mun ɲan alu ɲen? Ń me fusi ɲan alu ɲen, fo nin ń xa Ala la ku yitannaninŋo do laxali alu ɲen, walla xa lonŋo do di alu ma, walla xa kilaya ke, walla xa xaranŋo do di alu ma. 7Alan xa misaalo ta ɲin folifen innu dolu ma, fule, walla kontinŋo: Nin i nte xan mategenin bola, fule nin kontinŋo be men fola, wo si faamu ɲa di? 8Wo be ɲa men, nin buutuwo xanŋo man bo a ɲa ma, jon si í toben kelo xanma? 9Wo be ɲa men, nin alu dulu be xumo men fola, nin wo man xoyiya, alu la fota si faamu di? Alu la xumo nin foɲo bee si xaaɲan. 10Xan sifa xa sa duniya to; bari xoto be i bee la. 11Bari nin xanŋo do be fola nte ɲen, ń nte men mela, wo xanŋo fobaxo mu nte ɲen luntanŋo le ti, nte du mu luntanŋo le ti wo tigo ɲen. 12Wo to, í xo a xa dibete alu ɲen xa Ni Senunŋo la solifenŋolu soto, mennu si do kafu Ala la jama barako ma, alu a ŋinin xa wo lelu kiika soto. 13Wo xanma, moxo men be xan xotelu fola, wo xa Ala matara a xa sinŋo di a ma xa wolu xoto fo. 14Nin ń be Ala matarala wo xanŋolu to, ń niyo be Ala mataraxan, bari ń hakilo nte baara la. 15Ń s'a ke ɲa di wo to? Ń si Ala matara ń niyo la, bari ń si Ala matara ń hakilo du la. Ń si Alatantu donkilo la ń niyo la, bari ń si Alatantu donkilo la ń hakilo du la. 16Awa, nin í be barako bulala Ala ɲen í niyo la doron ne, í lamelibaxa gansanŋo do, men be jama xono, wo si “Amiini” fo ɲa di í sotoninŋo í la barakebulo la? Bawo í be men fola, wo man wo lon. 17Haali nin í la barakebulo ɲanbeteta, do man nafa si soto a la. 18Nte be barako bulala Ala ɲen, bawo nte be xan xotelu fola xa tanbi alu bee xan. 19Bari Ala la jama to, nte xa xumakese luulu doron fo, moxolu si mennu faamu, walasa i xa laxaran, wo xa di nte ɲen xumakese wulu tan fo ti xan xote to. 20Ń badinŋolu, alu la miiriya xana ke í xo dindinŋolu; alu ke í xo deenanolu, ku jaxo boxo la; bari alu ke moxobalu ti, miiriya boxo la. 21A be safenin sariya xono xo: «Nte be nala xumala ɲin moxo innu ɲen xan xotelu fobaxo lelu fe anin siya xotelu moxolu fe. Bari haali wo, i me nte lame, Marigi xo ten.» 22Wo le x'a tu, xan xotelu fo nte taagumanseede ti lannayabaxolu ɲen; wo mu taagumanseedo ti lannayabalo lelu ɲen. Bari kilaya nte taagumanseede ti lannayabalolu ɲen; wo mu taagumanseedo ti lannayabaxo lelu ɲen. 23Awa, nin Ala la jama bee kamarita batulo xanma tumo men, moxolu bee xa ke a ma xa xan xotelu fo, nin lamelibaxa gansanŋo dolu walla lannayabalo dolu dunta alu xan je, i me a fo ba xo alu kunŋolu bota i no to? 24Bari nin lamelibaxa gansanŋo walla lannayabalo dunta alu xan, x'a tara alu bee be kilaya ma x'a ke, a xa men bee me, wo si ke sabaabu ti, a xa lo a la junubo la. A xa men bee me, wo si a jalagi. 25A miiriya men tunnu be dugunin, wolu si bo keno xan. Wo tumo la, a si í boyi x'a ɲada buti dugo ma, xa Ala batu x'a fo xo: «Tonɲa la, Ala be alu la jama xono.» 26Awa, ń badinŋolu, alu xa xan xa men ke wo fele xo: Nin alu kamarita, alu do si sin no xa tantuli donkilo do la, do xote si xaranŋo do di no, do xote si Ala la ku yitaninŋo do ɲa fo no. Nin Ala xa xan xote bula do xono, wo xa wo fo; nin do xote si wo xanŋo xoto fo no, wo x'a fo. Bari wo bee xa xan xa ke le walasa do xa kafu Ala la jama barako ma. 27Nin xumo be kela xan xotelu to, wo xana tanbi moxo fula walla saba xan. Wolu xa xuma kilin kilin, anin moxo do xa soto du, men si i xoto fo. 28Nin moxo man soto xa i xoto fo, wo tumo la, moxo xana xan xote fo jama xono, a x'a fo í xonoto Ala kilin ɲen. 29Moxo fula walla saba doron xa kilaya ke, tolu xa wo xumolu segesege. 30Bari nin Ala xa ku do yita moxo sigininŋo do la je, xumo tun be folo men da, wo xa xan x'é lo, walasa do in xa xuma. 31Alu bee si sin no xa la i ɲoxo da la, xa kilaya ke, walasa bee xa xaran anin bee xa jusudun. 32Mennu be wo kilayalu kela, sinŋo be wolu ɲen i la solifenŋolu xan. 33Bawo Ala nte Ala ti, men be ku ɲaxamininŋolu fe, bari heero Ala le mu. Awa, a be í xo a be kela senumanŋolu la jamalu bee xono ɲa men, 34musolu x'e de jamalu to. I man yanmaru xa xuma. I xa xan xa xulu í xo Ala la sariya du x'a fo ɲa men. 35Nin i b'a fe xa kunnafirinŋo do ŋinin, i xa i xelu ŋininxa luwo ma; bawo a nte bennin muso xa xuma Ala la jama to. 36A be alu ɲen ne ba xo Ala la xumo bota ate lelu bata? Walla xo a sita atelu doron nelu ma? 37Nin do b'a miirila xo a mu kila ti, walla xo Ni Senunŋo b'a ɲamutanin, wo tigo xa xan x'a lon xo nte xa men safe x'a ki alu ma, wo mu Marigi la xuma foninŋo le ti. 38Bari nin moxo do man wo lon, wo xoto xo Ala man wo tigo lon. 39Awa, ń badinŋolu, alu kilaya ŋinin bete. Nin do be xan xotelu fola, alu xana wo bali xa wo ke. 40Bari kuwo bee xa ke ɲa ɲuma ma, xalo xa ke i la.

will be added

X\