1 KORENTENGOLU 13

1Haali nin ń be moxolu la xanŋolu nin melekiyolu la xanŋolu fola, x'a tara xanuya nte ń jusukunŋo la, wo to ń xumaxanŋo be le í xo talanŋo, walla mawerenŋo mennu be mankanŋo bola. 2Haali nin kilaya so be ń bulu, haali nin ń xa fenŋo bee gullo lon, anin xa lonŋo bee soto, haali nin lannaya be ń na fo ń si kurolu labo no i nolu to, nin xanuya nte ń jusukunŋo la, ń nte fusi ti. 3Haali nin ń xa ń kun naafulo bee tala xonxotolu te, haali nin ń xa ń fan balasubo di a xa jani, nin xanuya nte ń jusukunŋo la, wo me fusi ɲan ń ɲen. 4Xanuya si muɲa, a si moxolu deema, a ɲa nte bola moxo la fen fe. A nte í wasula, a nte a fan bunɲala. 5A me kukebali ke, a nte a fan kilin na nafa ŋininna. A me dimin junna, a me kujaxu mara a xono. 6A me ɲaɲa tilinbaliyakuwo la, bari a si ɲaɲa tonɲa la. 7A si kuwo bee kun, a si lannaya mara kuwo bee to, a si gigo mara kuwo bee to. A si kuwo bee muɲa. 8Xanuya me ban abada. Bari kilayalu si ban; xan xotelu fo si dabula; lonŋo si ban. 9Bawo n na lonŋo man dafa; n na kilaya du man dafa. 10Bari nin ku dafaninŋolu nata, dafabalolu si sanko. 11Ń dindinŋo mu tumo men, ń tun be xumala í xo dindinŋo; ń tun be ń miirila í xo dindinŋo; ń tun be jaatemuto kela í xo dindinŋo. Ń keta moxoba ti tumo men, ń xa dindinɲakuwolu dabula. 12N ɲa be men na bi, wo be le í xo n be felelo kela duŋare to. N be men jela, wo nte xoyiyanin. Bari sinin, n si jelo ke, ɲada nin ɲada. Bi, ń xa dondin ne lon; bari sinin, ń si lon dafaninŋo soto í xo Ala xa ń lon ɲa men. 13Awa, saasa ɲin fen saba innu be tula: Lannaya, gigo, xanuya. Bari xanuya le xa bun i bee ti.

will be added

X\