1 KORENTENGOLU 11

1Alu ke nte ladigibaxo ti í xo nte mu Kirisita ladigibaxo ti ɲa men. 2Nte be alu tantula bawo alu hakilo tuta nte la kuwo bee to, anin xo alu xa xaranŋolu mara í xo nte x'e lasi alu ma ɲa men. 3Bari ń b'a fe alu x'a lon xo: Kirisita le mu xe bee kuntigo ti; xeba le mu a musu kuntigo ti, Ala le mu Kirisita kuntigo ti. 4Wo le x'a tu, xe wo xe nin a be Ala matarala, walla nin a be kilaya kela, xa fen do tu a kunŋo la, a x'a kuntigo doxoya. 5Bari nin fen nte muso kunna x'a tu Alamatara la, walla x'a tu kilaya la, a x'a kuntigo doxoya. Wo be le í xo nin a kunŋo lininŋo le mu. 6Nin muso men nte a fe xa fen ke a kunŋo la, wo x'a kunŋo laxa. Bari nin kunnaxa walla kun liyo mu muso maluyakuwo ti, wo tumo la, a xa xan xa fen do ke a kunŋo la. 7Xeba ken man xan xa fen ke a kunŋo la; bawo ate mu Ala mununŋo nin a nooro le ti. Bari muso mu xeba le nooro ti; 8bawo xeba man bo muso to; muso le bota xeba to. 9Xeba man da muso ɲen, bari muso le data xeba ɲen. 10Wo le x'a tu, muso xa xan xa bunɲa taagumanseedo ke a kunŋo la, melekiyolu koso. 11Bari wo bee nin a ta, n nin Marigi la kafuɲoxoya xono, muso me taxa xeba xo, xeba du me taxa muso xo. 12Bawo muso bota xeba to ɲa men, wo ɲa ma, muso le be xeba bangela. Fenŋo bee bota Ala le to. 13Awa, alu fannu x'a mafele ken, nin a be bennin muso xa Ala matara, x'a kunnaxulunŋo tu Alabatudula. 14Hadamadinɲa keɲa fan nte n xaranna ba xo doxoyakuwo le mu don ti xeba kunsino xa janɲa? 15X'a tara nin kunsinajanŋo keta muso le kun, wo mu wo bunɲa kunŋo le ti. Kunsina janŋo dita le muso ma x'a ke a la butinkunno ti. 16Bari nin do b'a fe xa soosoli ke ɲin kuwo la tugun, wo tigo xa ɲin lon doron xo: Ala la jamalu nin ntelu kennu man laada xote lon. 17Ń be nala men fola alu ɲen saasa, nte me alu tantu no wo la; bawo alu la kamarolu nte kela alu ɲanno xanma, i be kela alu totiɲa le xanma. 18A ku folo mu ɲin ne ti xo, a fota nte ɲen xo nin alu kamarita Ala la jama la kafuɲoxoya la, benbaliyalu be alu te. Ɲa do ma nte lata wo la. 19Waajibo le mu benbaliya xa ke alu te, walasa mennu mu lannayabaxa soobelu ti alu to, wolu xa lon. 20Nin alu kamarita, wo nte Marigi la domolo xanma ti; 21bawo x'alu tu domolo la, alu bee kilin kilin si gidi a fan na domolo xan xa wo domo. Wo ɲa ma, dolu si tara je xonxo be mennu la. Dolu be je mennu xa dolo min x'e fa. 22Lu nte alu kun ba alu si domolo nin minno ke jan mennu? Walla alu be Ala la jama kela fuwo ti ba, anin xa bulutoxulunŋolu lamalu? Ń si mun fo alu ɲen? X'alu tantu ba? Ayi, nte ken me alu tantu wo la. 23Awa, nte xa xaranŋo men soto Marigi la, nin ń x'a lasi alu ma, wo fele xo: Marigi Isa dunta bulo to suwo men to, a xa buuro ta, 24xa barako bula Ala ɲen. Wo xo, a x'a tokutun, x'a fo xo: «Ɲin mu ń balo le ti, men dita alu xanma. Alu ɲin ke x'alu hakilo lajigi nte la.» 25Wo ɲa ma, i sotoninma domolo la, a xa minfen jipoto ta, x'a fo xo: «Ɲin minfen jipoti in mu Ala la Kafuxan Kuto minfen jipoto le ti, men tata ń jelo to. Alu xa ɲin min tuma wo tuma, alu a ke x'alu hakilo lajigi nte la.» 26Nin alu xa ɲin buuru in domo, x'e min ɲin minfen jipoti in na tuma wo tuma, alu be Marigi la saya le foxan, fo a xa na. 27Wo le x'a tu, moxo wo moxo be Marigi la buuro domola, x'e min a la minfen jipoto la, x'a tara a tigi keɲa man ɲin, wo tigo si jalagi Marigi balo nin a jelo ma. 28Wo le x'a tu, moxo bee xa í fan tosegesege folo, wo xo, xa Marigi la buuro domo, x'e min a la minfen jipoto la. 29Bawo moxo men be ɲin buuru in domola, x'é min ɲin minfen jipoti in na, x'a tara a man a jaate Marigi balo ti, wo tigo b'a fan jalagifenŋo le domola, x'a fan jalagifenŋo min. 30Wo le x'a tu, alu kiika keta jangarutolu nin barakentanŋolu ti. Wo le du x'a tu, alu dolu sata. 31Nin n xa n fannu tosegesege folo, n si kisi kiito ma. 32Bari Marigi be kiito tegela n xan xa n natilin, walasa n nin duniya xana jalagi i ɲoxo fe. 33Wo ɲa ma, ń badinŋolu, nin alu kamarita Marigi la domolo xanma tumo men, alu i ɲoxo laxono. 34Nin xonxo be do la, wo xa domolo ke a la luwo ma, walasa alu xana kamari xa kiito lasi alu fannu ma. Nin ń taxata alu bata tumo men, ń si ku tolu ɲabo.

will be added

X\