1 KORENTENGOLU 10

1Ń badinŋolu, kuwo mennu xa n mamaxelu soto, ń b'a fe alu hakilo xa jigi wolu la. I bee xa i taxama xababa xoto; anin i bee xa i taxama xa Xooxoji Wulenŋo tege. 2I bee batiseta xa i tu Musa la kafuɲoxoya xono, wo xababa nin wo xooxojiyo to. 3I bee xa Ni Senunŋo la domolifen kilinŋo domo. 4I bee x'e min Ni Senunŋo la minfen kilinŋo la; bawo Ni Senunŋo la fataxulo men tun b'e nofe, i bee x'e min wo jiyo la. Wo fataxulo tun mu Kirisita le ti. 5Bari wo bee nin a ta, i kiika la kuwo man diya Ala ɲen; bawo i fure tun be fili filinin fuxo la. 6Wo kuwolu keta ntelu ɲen misaali ti, walasa n ɲa xana bo jaxumanŋo fe, í xo itelu ɲa bota a fe ɲa men. 7Alu xana son bolibato ma í xo i dolu xa wo ke ɲa men; í xo Kitaabo x'a fo ɲa men xo: «Moxolu x'e sigi xa domolo ke, x'e min, wo xo, i wulita x'e tulun.» 8Alan xana jadoya ke í xo i dolu xa wo ke ɲa men. Mennu xa wo ke, moxo wulu muxan nin saba le sata wolu to tili kilin xono. 9Alan xana a fo xo n be Marigi xotobola í xo i dolu x'a ke ɲa men, fo salu x'e kin x'e faxa. 10Alu dulu xana daxotoxumo ke í xo i dolu x'a ke ɲa men, nitamelekiyo xa i bee faxa. 11Wo kasaarolu xa wolu soto walasa wolu xa ke misaali ti moxo xotelu ɲen. I safeta le xa n nasobi; bawo n be waxato men to saasa, labanŋo tumo sutiyata. 12Wo xanma, a be moxo men ɲen xo a mu lannayabaxa loninŋo ti, wo tigo x'é korosi a xana boyi. 13Xotoboli man alu soto men ɲoxon man dali xa moxo soto. Ala mu xantigo le ti a la lahidolu xono. A me son alu xa xotobo fo xa tanbi alu barako danŋo la; bari nin xotobolikuwo nata alu ma, a si barako di alu ma, xa wo muɲa anin xa bondanŋo di alu ma. 14Wo le x'a tu, nte badin xanuninŋolu, alu i bori bolibato ma. 15Nte be xumala alu ɲen x'a jaate xo hakilo be alu la. Ń be men fola alu ɲen, alu fannu xa jaatemuta ke wo la. 16N be barako bulala Ala ɲen duwawo jipoto men xanma, wo nte n nin Kirisita la kafo ti ba a jelo fe? N be buuro men tokutunna, wo nte n nin Kirisita la kafo ti ba a balo fe? 17Buurukun kilin ne be je. Wo xanma, nte mennu xa sa, n mu bala kilin ne ti; bawo n bee be kafula buurukun kilin ne to. 18Alu Banisirayila moxolu la kuwo mafele: Mennu be sadaxafenŋolu domola, kafuɲoxoya nte wolu nin sadaxajanidula te ba? 19Nte be men fola, wo xoto mu mun ne ti? Xo bolisosubo walla xo bolo mu fen ti ba? 20Ayi! Bari ń b'a fe xa men fo, xo mennu be bololu sola, wo bolisofenŋolu nte dila Ala ma, i be dila jinno lelu ma. Nte dun nte a fe kafuɲoxoya xa dun alu nin jinnolu te. 21Alu me a no x'e min Marigi la minfen jipoto la, anin x'e min jinnolu la minfen jipoto du la. Alu me a no xa Marigi la domolo ke, xa jinno dulu ta ke. 22Walla n b'a fe ba x'a ŋinin xa Marigi lakiiliya? N barako xa bun a ti ba? 23Fenŋo bee be dagenin, bari nafa nte fenŋo bee la. Fenŋo bee be dagenin, bari fenŋo bee nte do kafula moxo barako ma. 24Moxo si xana a fan na nafa ŋinin, bari a xa moxo tolu ta le ŋinin. 25Subu wo subu be fiirila saxa xono, alu wo domo. Alu xana ŋininxali ke wolu ma, jusukunŋo koso. 26Bawo a be safenin Kitaabo to xo: «Duguxulo nin a xan fenŋolu bee mu Marigi le ta ti.» 27Nin lannayabalo do x'alu kili domolo ma, a dun diyata alu ɲen xa taxa, a je fen wo fen di alu ma, alu wo bee domo; alu xana ŋininxali ke wo ma, jusukunŋo koso. 28Bari nin moxo do xo alu ɲen xo: «Ɲin mu bolisosubo le ti», alu xana a domo alu lasobibaxo koso anin jusukunŋo koso. 29Nte nte xumala alu jusukunŋo ma jan de! Ń be xumala do ta le ma. Awa, mun dun koso, yanmaro men be nte bulu, moxo xote jusukunŋo be dansigi kela wo la? 30Nin nte be barako bulala Ala ɲen ń na domolo koso, mun na nte be jalagila wo domolo kuwo to, x'a tara nte xa barako bula Ala ɲen wo koso? 31Wo to, alu be domoli kela wo, alu be fen minna wo, alu be fen wo fen kela, alu wo ke Ala bunɲa xanma. 32Alu xana ke sabaabu ti xa moxo si lafili, Yahudiyalu wo, Gerekolu wo, Ala la jama wo, moxo si. 33Alu nte ladigi; nte be ń balanna xa moxo bee diyanɲo le ke kuwo bee to. Nte nte ń fan na nafa ŋininna; bari nte be moxo kiika la nafa le ŋininna walasa i xa kisi.

will be added

X\