1 KORENTENGOLU 1

1Nte Poli, men kilita xa ke Isa Kirisita la kiladinŋo ti Ala sago fe, anin n badinxe Sositene, 2be ɲin safe in kila Ala la jama ma, men be Korente, mennu keta senumanŋolu ti Isa Kirisita la kafuɲoxoya xanma, mennu kilita xa ke a la senumanŋolu ti, anin fen wo fen be Isa Kirisita toxo kilila dula bee, nin wo mu i Marigi nin ntelu Marigi ti. 3N Fa Ala anin Marigi Isa Kirisita xa neemo nin heero ke alu ɲen. 4Ń be barako bulala Ala ɲen tuma bee alu la kuwo la, Ala la neemo xanma, men dita alu ma Isa Kirisita barako to. 5Alu nin ate kafuɲoxoya fe, alu xa fen bee soto xa jiidi, xumo to anin lonŋo to, 6bawo seedeya men keta Kirisita xan, wo sigibeteta alu to. 7Wo ɲa ma, Ni Senunŋo la solifen fusi dibali nte alu ɲen xo tugun, atelu mennu be n Marigi Isa Kirisita yitalunŋo laxononin. 8Ate le du be alu sinsinna fo xa labanŋo si, walasa alu xa ke jalagibalo ti Marigi Isa Kirisita la lunŋo. 9Ala mu xantigo le ti. Ate le x'alu kili alu xa ke a Dinxe Isa Kirisita, n Marigi la kafuɲoxoya xono. 10Ń badinŋolu, ń be alu tarala Marigi Isa Kirisita toxo la, x'alu xa ben, benbaliya xana ke alu te. Kilinɲa dafaninŋo xa ke alu te, x'alu ŋannelu nin alu miiriyalu ke kilin ti. 11Ń badinŋolu, n badinmusu Kolowe la moxo dolu xa nte lalon a la, xo benbaliya dolu be alu te. 12Nte b'a fe xa men fo, wo fele xo: «Alu do b'a fola xo: “Nte mu Poli le ta ti.” Do xote xo: “Nte mu Apolosi le ta ti.” Do du xo: “Nte mu Piyere le ta ti.” Do xote xo: “Nte mu Kirisita le ta ti.” 13Kirisita be tala talanin ne ba? Poli le gengenta yiro ma alu ɲen ba? Alu batiseta Poli le toxo la ba?» 14Nte be barako bulala Ala ɲen bawo nte man alu si batise nin Kirisipusi nin Gayusi doronnu nte. 15Wo ɲa ma, moxo si me a fo xo a batiseta nte toxo la. 16Iyo, ń xa Sitefanasi du la luwo moxolu batise. Nte hakili nte a la nin nte xa moxo xotelu batise wolu tanbo xo. 17Kirisita man nte ki moxo batise la de! A xa nte ki xibaru Dimanŋo waajulo le la. Nte nte wo kela x'a la hadamadinŋolu la hakilitigiya xumolu xan, walasa Kirisita la saya gengenyiro xan, wo xana ke fu ti. 18Kirisita la saya gengenyiro xan, wo waajulo mu nalumayakuwo le ti halagibaxatolu ɲen; bari ntelu mennu be kisilo silo xan, wo mu Ala la sintigiya le ti, ntelu ɲen. 19Kitaabo xono, a be safenin xo: «Nte si hakilitigolu la hakilitigiya tiɲa, xa lonnalu la lonŋo ke fuwo ti.» 20Wo to, hakilitigo be min? Sariya karanmoxo be min? Ɲin waxati in soosolila be min? Ala man ɲin duniya in hakilitigiya ke nalumaya ti ba? 21Awa duniya ken nin a la hakilitigiya bee, a korita Ala lonna Ala la hakilitigiya fe. Wo le x'a tu, duniya be xibaru Dimanŋo waajulo men jaatenin nalumaya ti, Ala x'a latege xa lannayabaxolu kisi wo waajulo le barako to. 22Yahudiyalu be taagumanseedolu ŋininna x'e je, Gerekolu be hakilitigiya ŋininna. 23Ntelu kennu be waajulo kela xo Kirisita gengenta yiro ma. Wo waajulo xa Yahudiyalu lamuruti, a keta nalumaya ti siya tolu ɲen. 24Bari Ala xa mennu kili, Yahudiyalu nin siya tolu to, wolu bulu, Kirisita mu Ala la sintigiya nin Ala la hakilitigiya le ti. 25Bawo hakilitigiya be Ala la nalumaya la, xa tanbi moxolu la hakilitigiya xan. Barako be Ala la barakentanɲa la, xa tanbi moxolu barako xan. 26Ń badinŋolu, alu i miiri alu kiliɲa ma. Moxo mennu be jaatela hakilitigolu ti hadamadinŋolu bulu, anin baraketigolu nin moxo toxomalu, wolu man sa alu to. 27Bari ɲin duniya in xa fenŋo mennu mafele nalumayakuwolu ti, Ala xa wo lelu sugandi, walasa xa hakilitigolu lamalu. Ɲin duniya in xa fenŋo mennu jaate barakentanŋolu ti, Ala xa barako dun wo lelu to, walasa xa barakemalu lamalu. 28Duniya be fenŋo mennu jaatela ɲaxuntofenŋo nin maakumanŋo ti, fenŋo mennu nte fen ti a ɲala, Ala xa wo lelu sugandi, walasa mennu be jaate to, xa wolu ke fuwo ti. 29Wo ɲa ma, moxo si me a fan bunɲa no Ala ɲa xoto. 30Bari Ala x'alu nin Isa Kirisita lakafu, x'ate Kirisita ke n na hakilitigiya ti. Kirisita fe, n keta moxo tilinninŋolu ti Ala ɲa xoto, n senuyata, anin n kunbota. 31Wo keta walasa, í xo Kitaabo x'a fo ɲa men xo: «Men b'a fan bunɲala, wo x'a fan bunɲa Marigi la kuwo xanma.»

will be added

X\