1 Dios jas tjejyama Jesucristo nosis ntꞌa jis capj la pꞌacj judiopan. Papel niná nin vele püna tapatja jis lá, Jesucristo ne yupj sin popa pꞌiyá, püs naya tüpüꞌü jupj. David popa watsja jupj. Abraham popa watsja. 2 Abraham Isaac popay waytsja. Isaac Jacob popay waytsja. Jacob Judá popay waytsja, Judá jüpülücpan jis popay watsja. 3 Judá Fares popay waytsja, Zara popay watsja jupj. Tamar yupj sejamay waytsja. Fares Esrom popay waytsja. Esrom Aram popay waytsja. 4 Aram Aminadab popay waytsja. Aminadab Naasón popay waytsja. Naasón Salmón popay waytsja. 5 Salmón Booz popay waytsja. Booz jamay Rahab lotsja. Booz Obed popay waytsja. Obed jamay Rut lotsja. Obed Isaí popay waytsja. 6 Isaí David popay waytsja. David jépatsja jupj Israel moꞌó püná. David Salomón popay waytsja. Salomón jamay Urías jatsꞌom waytsja jupj. 7 Salomón Roboam popay waytsja. Roboam Abías popay waytsja. Abías Asa popay waytsja. 8 Asa Josafat popay waytsja. Josafat Joram popay waytsja. Joram Uzías popay waytsja. 9 Uzías Jotam popay waytsja. Jotam Acaz popay waytsja. Acaz Ezequías popay waytsja. 10 Ezequías Manasés popay waytsja. Manasés Amón popay waytsja. Amón Josías popay waytsja. 11 Josías Jeconías popay waytsja, Jeconías jüpülücpan jis papay watsja jupj. Josías tüpüꞌü na, Babilonia moꞌo tapatja tjiquil, la tapalan yupj israelpan jis lal. Jis tsupapj, tjaman Babilonia ntꞌa. 12 Babilonia ntꞌa tsupapj tjil na, pꞌa wa sin popa jis tepyala. Jeconías Salatiel popay waytsja. Salatiel Zorobabel popay waytsja. 13 Zorobabel Abiud popay waytsja. Abiud Eliaquim popay waytsja. Eliaquim Azor popay waytsja. 14 Azor Sadoc popay waytsja. Sadoc Aquim popay waytsja. Aquim Eliud popay waytsja. 15 Eliud Eleazar popay waytsja. Eleazar Matán popay waytsja. Matán Jacob popay waytsja. 16 Jacob José popay waytsja. José niná María voyum waytsja. María Jesús jamaytsja. Jesús, Cristo ló wa jupj; Dios tjevele ca jas majamas jupj, gente jis capj la pꞌacj, mpes nin ló jupj. 17 Nin jis latsja püna tapatja, Jesucristo ne yupj sin popa pꞌiyá, püs naya tüpüꞌü jupj. Pjü way jis lá sin pac na Abraham ló mpe David ló ntꞌa, catorce way yupj. Nin pꞌiyá, pjü way jis lá sin pac na David ló mpe israelpan Babilonia ntꞌa tsupapj tjil nas, catorce way yupj ꞌotsꞌipj. Nin pꞌiyá, pjü way jis lá sin pac na yupj tjil na mpe Jesucristo ló ntꞌa, catorce wa yupj. 18 Jesucristo niná Yomen Dios jas tjejyamá qjuis capj la pꞌacj. Papel niná nin vele ꞌoyn nyuca tjemyaꞌna Jesucristo nosis ntꞌa. Jamay María lotsja. Tsjücjüim na tjevéletsja José lal ca jupj lal mwayim. Custjay ma tjowaya pꞌin, way tsjicj jáꞌasatsja jupj Dios Cjües mpes. Pꞌa nequem jin tulucj tepyala jupj. 19 José ma jus nléyatsja tsjan mpes María way tepyala. Malala la tjiji jupj, jólatsja José. Mpes quelel véletsja María lal ma mwayim jupj lal. Jupj lal pꞌin quelel véletsja. Ma quelel véletsja la pꞌa jis lal María malala la tjiji. José ꞌüsüstsja Dios lal, ne nin. 20 Nasa quelel véletsja na niná María lal, Dios ángel pjaní lay tepyala José ntꞌa. José tjejyá na tjinyuca jupj. Ángel tjevele José lal: “José, David püna tüpüꞌü popa pꞌiyá jipj. Po ma lecj meyan mwayim María lal. Dios Cjües mpes pꞌin way tsjicj tepyala jupj. Ma malala la tjiji. 21 Yom tsjicj ca maꞌnus jupj, María, ne jipj ca ló ntꞌan, Jesús ló nsem. Jesús mpes ca Dios perdonar lis mijis israelpan, malala nyuca la tjajay, ne ma ca jis capj ntülüs yupj. Nin mpes ca nin ló nsem jupj”, nin tjevele ángel José lal. 22 Nin tepyala ca pjü tꞌücꞌ mpalas Dios tjevele püná. Pajal püna Dios profeta pjaní tjevele ca nin mpalas. Tjevele: 23 “Tsjücjüim way tsjicj maꞌajam, ca yom tsjicj maꞌnus. ‘Emanuel’ ló ca nsem jupj.” Jupj ló cupj qjuis tin “Dios Cupj Qjuis Lal” velecj cupj. 24 José jola tepyala na, nin la tjiji Dios ángel tjevele jinwá. Lal tjacꞌ María jupj wo ntꞌa ne jupj jatsꞌom tepyala jupj. 25 Custjay ma neꞌaj tjemyaꞌna jupj, María tsjicj tjemyaꞌna nas. José tsjicj ló tꞌya Jesús ló nsem, ángel tjijyüꞌta jin.
