BAROMA 8

1Tanma numa baa kan abu dzundzun ba Yesu Kiristi ra, Cidon ri pan'abe kwen riba. 2Ki cin waa tanma numa Denden bu Cidon wari nde cindi dzu bye Yesu Kiristi yi apa ra nwàdzumi ki vo bu abu wa baba, ba aki wa bwan apa ra. 3Adòn waa Cidon yi Musa ra ken'a wa nwàdzu kà apa ba. Ki cin waa ai pajukun ī byèbyè kagben. Apa dzun wa ken wa kon­ kà dòn waji dzu don numa dzwa­ dzwa ki jinni baani. Ama Cidon tsa abu dzun waa adòn ken'a wa tsaka ba. Cidon tson Nwua bi ki fin tswen ki bye zén bu adi bui pajukun baa tsa abu wa baba. Ku yi abu wa baba wa ki fin'i ra gadi bai ra. 4Cidon tsa numa ki cin waa ai pajukun baa ri tsai abu ki bye gbendi bui ba, ama ina tsa bu ki bye gbentsòn bu Denden bu Ci­ don ra ī ci sansan numa ki pyen bu Cidon ci tsadzu waa adòn na danra ci ken í ci numa ra. 5Pajukun baa ri bà aji bu abu wa vyabe ki mikyinbe ra, bē lolo hwanbe soso ki bye abu wari vyabe ki mikyinbe ko nukon. Ama pajukun baa na tsa abu wa we hwan bu Denden bu Cidon, bena ga aji ki cin Denden bu Cidon ko nukon. 6Apa wama nde mikyin'a so bye abu wari vyaku ki di, asaki ki zoa ri hun. Ama apa wama nde mikyin'a yi Denden bu Cidon kuri du cindi ku kari du mikyin wa na jinni. 7Apa wama fan dia yi abu wa vyávyà ma jire mikyin'a don ra, apa waji ngha Cidon ra. Ki cin waa ku kon'a dòn bu Cidon ba. Ku kari cia apa wari konkà adòn waji ba, ko dzundzun. 8Pajukun baa na bà aji bu abu wa vyávyà ki mikyinbe ra, beri tsakabe abu dzun wa vya hwan bu Cidon ba, 9Ama ani, baa na tsani abu waa dini ri con bara Denden bu Cidon ma bani ci bye dzundzun ajinderi byenbyen nina tsa abuni ki bye Denden bu Cidon hun. Apa wama cia ba Denden bu Yesu Kiristi ki fin mikyin'a ba, apa waji cia abu Yesu Kiristi ba hun. 10Ama Yesu Kiristi ma ci fin mikyinni ni du cindi ra. Ki cin waa ku yini kan pajukun baa sansan numa ki pyen bu Cidon ko waa adini ri huhu ki cin abu wa babani ra. 11Denden bu Ci­ don wa dado Yesu Kiristi don ki bye aki ra, ma ci finni, ci numa ra Cidon wa dado Yesu don ki bye aki ra ku kari yi dini cindi numa du dzu di bu Denden bu Cidon wa ki byeni ra. 12Ci numa ra, bazhenza, san kari iká bà aji bu abu wari vyai ki mikyin'i ba. 13Nima bà aji bu abu wari vyani ki mikyinni ni huhu ra hun. Ama ki bye gbentsòn bu Denden bu Cidon nima fan abu baa na vyani ki mikyinni ra jinni niri gban vo gban be. 14Ki cin waa pajukun baa Denden bu Cidon na kabe pyen ra, be ci bazhenzhen bu Cidon. 15Ki cin waa Denden waa Cidon yini ra yiani kan nyà jiji kukà hwa azin ku jire mikyinni don ba. Ama Denden waji hwa yini kan bazhenzhen bu Cidon. Dzu dia hunnu ina kundekuto na yi Cidon danra, "Abba Ata." 16Denden bu Cidon kwan ba mikyin'i zen nde danra ī ci bazhenzhen bu Cidon. 17Ci tsadzu waa ī ci bazhen­ zhen bu Cidon ra, ī kari du abu baa ku ho konso pajukun'a yo ra dudu. Ima ci abu dzundzun ba Yesu Kiristi iri kari du abu baa Cidon ho soku yo ra. Ī mana wa fyin ki dzun baku Cidon ri yii hwe baku ki dzun. 18M̀ yinu ki fin mikyinmi byen­ byen numa danra afyin waa ina wa tanma ra ken'a abu dzun waa í nde hwa kwan ba ahwè waa Cidon ribi tà yii raba. 19Abu baa Cidon mà hora be lolo hwanbe soso numa na bazo anyunu waa Cidon ribi tà yi bazhenzhen'a. 20Abu baa Cidon mà hora kata be kan abu baa nya hwan azota numa. Be conbe rì kan abu baa nya hwan azota numa ba, ama Amà tsabe rì. 21Ku tsabe numa jiji ku nwàdzube ki byecu bu nya wari tsaba apa ra, jiji beká ci byecu bu nya riba. Ama beri du hwe ci tsadzu bazhenzhen bu Ci­ don. 22Ávo ndi gbogbo nde numa keke bibi jinna ī yinu dan­ ra abu baa Cidon mà hora kata, bena kundekuto, bena tintun ci tsadzu waa awuwa ri tu mba ra. 23Cia abu badati baa Cidon mà hora vinni na kundekuto bu fyin waji riba. Ama kwan bai kata ai baa Cidon yii Denden'a wa nyenye wa ci abu wa kapyen waa Cidon ga yii ra, ina tintun ki fin mikyin'i ina ci bazo anyunu waa Cidon ri hoi kan bazhenzhen'a ra, jiji kukà nwàdzu cindii ki bye aki. 24Ai baa Cidon nwàdzui rara, ina ho mikyin'i so bye abu baaji. Ayo waa ima mbyà abu waa ī ho mikyin'i so yo ra ba azo ra, cia abu waa iri kà mbyā ho mikyin so yo riba. Ki cin waa akani ri nde mikyin'a ri ri so bye abu waa ku kyan kapyen mbyà gbogbo numa ra? 25Ci numa ra ī ho mikyin'i so tiri ki bye abu waa ī ngha mbyài ba zo raba, iri gban mikyin ci ba zoa. 26Denden bu Cidon na tsazai ai pajukun baa byèbyè hora yo, ká cin waa ī zà yìi nde wa pya Cidon ndafan jinni ba. Denden bu Cidon na zà nde vo Cidon, na kundekuto nui ki bye nyaco waa ī dui wa zen aji dzu yo ba. 27Cidon yì abu wa ki fin mikyin bu apa nu kata. Kukà yi abu wa ki fin mikyin bu Denden wa nyenye nu, Ki cin waa Denden wa nyenye waji ri dzwa nde zà nde vo Cidon jiji bu pajukun bu Cidon ki nyaco wa vya hwan bu Cidon, 28Ī yinu danra ko kake wama dui kata Cidon ri hwa abu waji ku kan abu wa sansan ki bye pajukun baa conku, baa ku babe nde bi jiji be tsa abu wa ki mikyin'a ra. 29Pajukun baa Cidon kapyen cebe rara, ku ndi kà hobe so danra be d tsadzu Nwua ki cin waa jiji Nwu waji ku ci Nwu mbafyen ki di bu bazhenzhen'a suu numa. 30Ci numa ra pajukun baa Cidon ce hobe so kankan hora, ku babe nde jiji be kan pajukun bua, ki nyaken waa ku babe nde ra, ku hwa yibe kan pajukun baa sansan numa ki pyen'a. Abe baa ku hwa be kan pajukun baa sansan numa ki pyen'a ra, ku yibe hwe. 31Iri dan aji dan ke ri? Cidon ma bai ci bye dzundzun akani ri tsakai abu dzun ri? 32Cidon hwa den'i Nwua yo ba. Ama ku nde­ ku ndafan vo yii kata. Ci numa ra Cidon kàri ndafan'a vo yii, ku ga koke kata yii numa azota ba? 33Akani ken ri wa zen aji dzwa bo bu pajukun baa Cidon cebe ra? Cidon ba dia ten nwàbe don danra, avobe ba abebe baani ki bye aji wa dada. 34Ci numa ra apa wa ken wa pan kai kwen ci kani? Yesu Kiristi ba dia hu aki ki cin'i, Cidon da doku don ki bye aki. Tanma numa ku ci bye Cidon ki go kyekye vo wunua ki don kuna vo hwan bu Cidon ki cin'i. 35Apa wa ken wa gafan'i vyon ba Yesu Kiristi ci kani waji? Abu wari gafan'i ra ci fyin wa wawa re, ko ci ado wa dā apa? Ko ayò wa yaya? Ko beri ten'i fó? Ko aki wa bwan apa? 36Ci tsadzu waa be tā ki fin Afa bu Cidon danra, "Pajukun na nyà jiji be bwan'i ki cin u ko nukon. Be ndei so ci tsadzu àdòn waa beri pan ya bwan ki bye wa bwan bupyu," 37Ama abu baakara kata ī ji cin ki cinbe ra. ī ji cin waji ba gben bu Yesu Kiristi wana con'i ra. 38Ki cin waa m yinu byenbyen numa dan­ ra abu dzun wari gafan'i ba con waa Yesu con'i ra baani. Ko ima huhu ko ima ci tiri riju kata ci abu dzundzun. Ko bazhentsōn bu Cidon ba dibe, ko kake kata wa ken wa gafan'i jinni ba con bu Cidon baani. Ko abu wa ci tiri tanma, ko abu wari bi ki pyen 39ko abu wama dzu don bi, ko ma dzu jinni bi, abu dzun wa ken wa gafan'i jinni ba con waa Cidon na con'i ra baani. Ku tà yii con waji ki di bu Cindoi Yesu Kiristi.

will be added

X\