BAROMA 5

1Tanma ki cin wajinderi waa ī yi ki bye Cidon ra, ku hoi so pajukun baa sansan ki pyen'a. ī du mikyin wa na jinni ki bye Cidon dzu di bu Cindoi Yesu Kiristi. 2Dzu di bu Cindoi Yesu Kiristi hunnu ī yì wa sansan bu Cidon waa ī ci fin'a ra. Ina cu cucu ho hwan'i so danra ki pyen kire iri mbyà hwe bu Cidon ba zo. 3Ī kana cu cucu ki cin fyin waa ina wa ra. Ki cin waa ī yinu danra apa ma gban mikyin wa fyin hunnu kuri tse ba gben. 4Ima gban mikyin wa fyin waa beri ken mbafoi baku ra iri tse ba gben. Ima tse ba gben iri ho mikyin'i so bye Cidon. 5Ima ho mikyin'i so numa iri pan'i tsenni ba, ki cin waa Cidon tà yii con'a ki fin mikyin'i suu numa. Kuri tà yii numa ki bye Denden wa Nyenye waa ku yii ra. 6Ávo waa ī ndi cii numa ī bāi apa dzun ki cin'i bara, waa anyunu mba tiri rara Yesu bi hu aki ki cin'i ai pajukun baa tsa abu wa baba ki bye anyunu waa Cidon ge ra. 7Ci ba fyin waa apa dzun ku zen nde hu aki nu bu apa dzun, ko apa waji ma san nini kata. Dzun ki tiri apa dzun ribi zen nde hu aki ki cin bu apa dzun wa ci ba mikyin wa sansan numa. 8Ama Cidon tà yii danra ku con jii kagben ki cin waa ávo waa ī ndi ci tiri pajukun baa tsa abu wa baba Yesu Kiristi bi hu aki. 9Ki cin aki waa ku hu nde asaa we jinni ra, Cidon hoi so pajukun baa sansan numa ki pyen'a, fyin mbye waa kuri nwà­ dzui ki bye kyinna bu Cidon? 10Ayo waa ī ndi ci tiri jo ze bu Cidon ra Yesu bi ban'i vyon ba Cidon ki bye akia waa ku hu ra. Ci tsadzu waa tanma numa ī ban vyon ba Cidon rara, aku wa ci apa wa sen cindi ra kuri nwàdzui nwàdzudzu. 11Cia wakara vinni ba, ama ī kana cu cucu kwan yo ki cin waa Cidon yii ban vyon baku ki di bu Yesu Kiristi. 12Ápa dzundzun tsari abu wa baba. Ki bye abu wa baba waji waa ku tsa ra gbe abu wa baba kabi ki fin tswen. Abu wa baba waji gbe aki wa bwan pa be pajukun ki cin kata. Ci numa ra pajukun jo nwo aki wa huhu ki cin waa pajukun kata tsa abu wa baba, 13Ávo waa Cidon ndi yia Musa dòn'a raba pajukun ndi na tsa abu wa baba ki fin tswen. Ama bye waa adòn ma baani kiyo apa dzun ri mbyàa bo bu apa dzun danra ku gbekyan dòn ba. 14Ama pan ki we bu Adamu bi ki we bu Musa aki ndi na tswen na bwan apa kata, ki cin waa bena tsa abu wa baba ko waa avobe baani ki bye adòn wa gbe kyankyan waa Adamu gbekyan bu para numa ra. Aji bu Adamu na tà yii cinna bu Apa waa Cidon tsonku bi ki fin tswen ra. 15Abe pyinna hora be cibe abu dzundzun ba, ki cin waa wa san­ san bu Cidon waa Yesu ga yii ra kagben bu abu wa baba. Ci fa byeya numa danra, abu wa baba waa apa dzundzun tsa ra gbe aki yi pajukun suu numa, ama wa sansan bu Cidon kagben'a naco pyuu numa, Apa wa ga wa san­ san waji yii ra ci Yesu Kiristi. Ku san pajukun rikyaa numa. 16Abu wa sansan waa Cidon ga yii ra dzu ken ba abu wa baba bu Ada­ mu. Ki cin waa abu wa baba waa Adamu dzundzun'a tsa ra Cidon pan pajukun kata kwen ki cin'a. Ama ki bye wa sansan waa Ci­ don ga yi pajukun dzu di bu Yesu Kiristi ra hwa pajukun ci sansan ki pyen'a, ko waa pajukun tsa abu wa baba suu numa ra. 17Ki cin abu wa baba waa apa dzundzun tsa ra, hwa pajukun kata navoki ki cin apa dzundzun waji. Ama Apa dzun­ dzun wadzun ra, abu waa ku tsa ra kari. Ki cin abu waa ku tsa ra pajukun kata baa dù wa sansan bu Cidon suu numa, kukà hobe so pajukun baa sansan ki pyen'a ra, beri du cindi wa ci kenken beri tsa tsòn ci tsadzu ku. 18Ci tsadzu waa ī mbyà ki bye abu wa baba bu Adamu dzun­ dzun'a gbe kwen bu Cidon be pajukun kata ki cin ra, ka ci numa du, ki cin abu wa sansan bu Yesu dzundzun'a hwa penre pajukun kata be ci ba cindi wa ci kenken. 19Ka ci numa pajukun suu numa kan pajukun baa tsa abu wa baba ki cin waa Adamu dzundzun'a gbekyan dòn bu Ci­ don ra. Ka ci numa ki cin waa Yesu Kiristi dzundzun'a nde cin'a na jinni ki pyen bu Cidon ra, hwa pajukun suu numa kan pajukun baa sansan ki pyen bu Cidon. 20Adòn waa Cidon yi Musa ra hwa pajukun foji abu wa baba wana tsatsa kwankwan kiyo. Ama bye waa abu wa baba mana foji wa kwankwan kiyo Cidon ri taki bu pajukun kwan yo kagben numa. 21Ci tsadzu waa abu wa baba na akù ki cin bu pajukun gbe aki be pajukun ki cin ra, ka ci numa du, wa sansan bu Cidon na akù ki fin mikyin'i, ku kēn wa hwa yii kan pajukun baa sansan numa ki pyen bu Cidon jiji í kà du cindi wa ci kenken ki di bu Yesu Kiristi.

will be added

X\