AZO MBU BU YOHANNA 7

1Ki nyaken wakara m wezo m mbyà zhentsōn bu Cidon kwan dzun nyena pantse na cin pwe nyena baa ki fin tswen wa­ kara ken cin dibe kata. Bena tswasu awo wari sa pwadzu ki cin pwe nyena hora kasen ba nyaken. Ki cin waa jiji awo kúká sa ki fin tswen, ko ki nwojan, ko ki cin hin ba. 2Mkà wezo m mbyà nwutsōn dzun pwadzu dzu ki hwadon ki nyunupon nabi, ku nde abu wa kyi asin bu Cidon wa ci ba cindi ra nde mbe voa. Ku ba zhentsōn baa kwan dzun nyena baa be yibe gben jiji be tsaba abu baa ki gondon ba abu baa ki nwojan ra nde ba gben numa danra, 3"Níká tsaba abu dzunr ki gondon ko ki nwojan ko ki cin hin raba tiri se ima kyi pajukun baa bà Cidon asin ki zobe ra hunnu." 4Be dan yimi danra, pajukun baa be kyibe asin bu Cidon wa ci ba cindi ra, be zan dubu deri dzundzun, ba du­ bu dipa pyinna nwa nyena. Be dzu cincin ki bye tsu wani kata ki fin Isra'ila bi kwan dzun. 5Pa-jukun dubu dzwe nwa pyinna pwadzu dzu bye tsu bu Yahuda bi, be kyibe asin yo ki zobe kata. Pajukun dubu dzwe nwa pyinna pwadzu dzu bye tsu bu Reuben bi. Pajukun dubu dzwe nwa pyinna pwadzu dzu bye tsu bu Gad bi. 6Pajukun dubu dzwe nwa pyinna pwadzu dzu bye tsu bu Asher bi. Pajukun dubu dzwe nwa pyinna pwadzu dzu bye tsu bu Naftali bi, pajukun dubu dzwe nwa pyinna pwadzu dzu bye tsu bu Manasseh bi. 7Pa-jukun dubu dzwe nwa pyinna pwadzu dzu bye tsu bu Simiyon bi. Pajukun dubu dzwe nwa pyinna pwadzu dzu bye tsu bu Levi bi. Pajukun dubu dzwe nwa pyinna pwadzu dzu bye tsu bu Zebulun bi, pajukun dubu dzwe nwa pyinna pwadzu dzu bye tsu bu Issachar bi. 8Pajukun dubu dzwe nwa pyinna pwadzu dzu bye tsu bu Yusufu bi. Pajukun dubu dzwe nwa pyinna pwadzu dzu bye tsu bu Banyami bi. 9Ki nyaken wakara m wezo m mbyà pajukun rikyaa numa cia wa hwènhwen ba. Be pwadzu dzu bye tsu ki cincin bi, be dzu ko ki bye wani kata bi, anube kata ci cincin. Be dze tukpa bu­ fyen ki dibe be gbeya aje yá mbe vobe pantse na pyen bu adudu bu amà ki bye waa Nwudòn ra ciyo ra. 10Bena nyakyin gban­ gban numa na tso vyon danra, "Cindoi wa nda wea tuci ki bye adudu bu amà ra, ka ba Nwudòn wa ki bye waji ra be ci baa nwà­ dzui." 11Abu baa kwan dzun nyena baa ci ba cindi hora do don ge shukwa adudu bu amà waji so yoba, se abe baco baa kwan dzun didzun nwa nyena hora ge shukwa abu baa kwan dzun nyena baa ci ba cindi hora shon dzun. Zhentsōn bu Cidon ge shukwa baco hora shon dzun, se katabe be dzu be jinni ki pyen bu Cidon a waku. 12Be danra, "Ci numa! Atsòn, ba zobyen, ba mikyin wa mbumbu, ba hwe ba gben be ci bu Atai Cidon keke numa yaya! ku ci numa!" 13Apa dzun ki fin baco hora mbyemi danra, "U yì pajukun baa dze bufyen pantse na kara nu? Be dzuni bi?" 14Se m dan yiku danra, "Angya, aù yìbe ri." Se kukà dan yimi danra, "Be ci pajukun baa ndi pantse ba gben be wa fyin wa ndi kwakyi wa dube, bekà pwadzu ki vo bu fyin waji rito numa ra. Be tsō nye bukenbe mbu purututu numa ki bye asa bu Nwudòn rara. 15Ábu wa hwa be pantse na pyen bu adudu bu amà na waku afitse ba anyutu ra hun. Apa wa nda wea tuci bye adudu bu amà ra ri be tsukenbe ba nwinia. 16Ambo bu wa jiji ba ambo jan ri bwan'abe riba. Anyunu kari tuabe ba. 17Ki cin waa Nwudòn wa tuci bye adudu bu amà wa ki yoba ra ri konbe, ku kari zabe ya bye waa jape wari yi apa cindi ri gbeze pwadzu kiyo ra. Cidon ri pabe janme ki zobe ko nukon."

will be added

X\