MATIYU 5

1Waa Yesu mbyà abi bu pajukun suu numa ra, se ku neya tuci jinni ki cin kwen ki don. Pajukun baa bàku ya wa shukwaku jinni ki bye waji. 2Ku pofan nua na fyen ta yibe danra: 3"Pajukun baa koshe ki pyen bu Cidon ra be fo vya ki cin waa gbentsòn bu Cidon ci bube. 4"Pajukun baa na ku ndekuto hora be fo vya ki cin waa Cidon ri webe jape wa tashuma ki fin mikyin. 5"Pajukun baa nde cin na jinni hora be fo vya ki cin waa be ciri baa ri ji fin tswen. 6"Pajukun baa ho hwanbe so bye abu wa vya hwan bu Cidon wa tsatsa ra be fo vya ki cin waa Cidon ri yibe abu wa vya mikyinbe. 7"Pajukun baa ri hwi cici bu pajukun ra be fo vya ki cin waa Cidon ri hwi cicibe numa du, 8"Pajukun baa ci ba mikyin dzundzun ra be fo vya ki cin waa beri mbyà Cidon nù ba zobe. 9"Pajukun baa ri bàn pajukun vyon ba dibe ra be fo vya ki cin waa beri babe danra be ci bazhenzhen bu Cidon. 10"Pajukun baa na wa fyin ki cin abu wa san hwan bu Cidon ra be fo vya ki cin waa ando tsòn wa ki don ci bube. 11"Ani pajukun baa bena tsoni ce, be kana tani fyin, be kana ge tswi aji wa baba wani kata na senni ki cin ra Cidon ku kwanni kiyo. 12Ní cu cueu, ní mbu mikyin ki cin waa avokwinni wa sansan ki don suu numa. Pajukun baa ndi da don bu Ci­ don kapyen yini bye hora, be ndi tabe fyin waji numa du. 13"Ani ciri āmā wa ki fin tswen. Àmá āmā ma vyaa riba beri tsanini ri mbyāsanku ri? Kuri tsaa cin riba, se be fare nya hun pajukun be te abe ki cin'a. 14"Ani ci abye wa yafan jinni. Finka waa bema myiku ki gondon kuri yua dia ba. 15Apa ri bàá pitila ri nde akwe be tsukenku ba, àmá beri ndeku sen ki cin atswà ki don jiji ku yafan pajukun bye yo ki ndo. 16Ci numa bani du. Ní yafan pajukun bye yo jiji bema mbyà abu wa sansan waa ni tsa ra be nyā Atani wa ki don. 17"Níká ga danra m̀ bi ki cin waa ḿ pa tsaba adon wa ndi ka­ pyen, ba abu baa pajukun baa da don bu Cidon ndi ta so raba. M̀ bimi ki cin waa jiji ḿ pa tsababe ba, àmá m̀ bi ki cin waa m zēn ban anu ajibe. 18Mna dan yini aji wajinderi byenbyen numa danra dèdè waa bye don, ba bye jinni be ji jinni ra, ko abu dzundzun numa wa ki fin Afa wari bi ji jinni baani, se bema tsa vinni koke kata ra hunnu. 19Ci numa ra apa wama fan aji dzun titi numa ki fin dòn waji ma tá jinni, kuma fyen tà yi pajukun numa beri ndeku so apa wa titi numa ki ndo tsòn wa ki don. 20Mna dan yini kara, nima tsani abu wa sansan wa we hwan bu Cidon kā abe manu baa fyen aji bu Cidon, ba abe Farisawa ba, niri kakani ki ndo tsòn wa ki don ba, ko titi. 21"Nī fo be ndi dan yi pajukun baa ndi titi danra, 'Níká bwan apa ba, apa wama bwan apa dzun beri foku kwen.' 22Ama ami na dan yini danra apa wama ngongo ba apa dzun beri fo apa waji kwen fofo. Ko apa wama ba apa dzun danra aje beri nde apa waji yaya ki pyen bu kwen. Apa wama ka dan yi apa dzun danra ku ci apa wa dán numa azota ci ken apa wa dan aji waji ra ku kà pyu. 23Ci numa ra uma pantse cin kyenkyen ki don ma nde abu dzun na wa Cidon kiyo, uma kyepan danra ù dà apa dzun aji dzun waa kuna mbyà bou kiyo, 24se ú fan abu waa una con jiji ú tsòn wa Cidon kiyo ra jinni ki cin kyenkyen ki byeri, ú kasen ya duku ni mbyāsan byecuni ba dini hunnu ú kasen bi wa Cidon. 25Ú ban ge vyon ba ajo zeu ba mbwari avo waa ku ngha yaa ki pyen bu kwen raba, ki cin waa kúkà ndeu yi apa wa fo kwen ki vo, apa wa fo kwen kúkà ndeu yi dogori ku ndeu ya tsu tan ba. 26Ma ci numa rā uri pwadzuu riba se uma hwa vinni abu waa akwen ge sen u ki cin ra kata hunnu. 27"Nī ndi fo waa be fyen tà yini danra, 'Níká godi ba awuwa bu apa dzun ba.' 28Ama tanma mna dan yini danra ko kani kata wama we wuwa dzun zo gya, ki fin mikyin'a ku ba wuwa waji godi ra hun. 29Azou go kyekye dzun ma hwa yiu tsa abu wa baba san kari ú can azo go kyekye waji taya hun. Ribi san kari ú nyani ba zo go kyekye dzun ki diu kā waa be nde gege diu kata numa ya taya fin pyu ra. 30Kati, ko go kyekye vo wunuu mari hwa yiu tsa abu wa baba, san kari ú geken avo waji taya hun; ki cin waa ribi san kari ú nyani ago kyekye diu dzun ú nwàdzu kā waa be nde gege diu numa kata taya pyu. 31"Andi beka fyen dan yini danra, 'Ko kani kata wama bwan aben ba awaa ci ken ku yiku afa bu aben wa bwanbwan!' 32Ama tanma ami na dan yini danra apa wama bwan aben ba awaa, bà ki cin waa awuwa waji na tsa aso ba, ku tesu wuwa waji hwa nyaco bu aso wa tsatsa ra hun. Apa wama bàn wuwa wa bwan aben bu nua wa hun bena tsa aso ba dibe hun. 33"Nī fo be ndi dan yi pajukun baa ndi titi danra, 'Níká genu bu akan ba, ama ú tsa abu waa ù genu yi Cindoi danra uri tsa ra.' 34Ama mna dan yini danra níká genu dàn aki ta vo ki don ba, ki cin waa bye don ci byecu tsòn bu Cidon. 35Níká genu dàn aki da vo ki jinni ba, ki cin waa bye jinni ci bye waa Cidon ri ndafan abea te yo. Níká genu dàn aki ba zen bu Urushalima ba, ki cin waa atswen wa ci abu Akù wa ci ba hwe. 36Úká dàn aki ba cin u ba, ki cin ke ba, ù tsakau wa vyin pukan hwe jin u dzundzun tori numa ku kan wa mbumbu ko wa pepe ba. 37Aji waa nima dan kata kú ci dzundzun danra 'E,' ko 'ḿ m̀.' Aji dzun ki tiri wama kā wakara aji waji dzu bye Shetan bi. 38"Nī fo be ndi dan yi pajukun danra, 'Apa wama dāgbàn apa dzun zo, beri dāgbànku bua yo bàn ton. Apa wama dāgbe apa dzun nyi, beri dāgbeku nyi bua yo bàn ton'. 39Ama ami mna dan yini tanma numa danra apa wama tsani abu wa baba, níká banku ton'a yo ba. Ama apa wama tau pyuta ki tsonkyi vo wunu úkà pu­ kan vosu yiku kwan yo. 40Apa dzun ma dzwau kwen ki cin waa kú fyereu buken u yo, ú fan tukpau kwanku kiyo. 41Apa dzun ma teu so don danra ci ken u nuku ya kyon lamba dzundzun, ú nuku ya zan lamba pyinna. 42Apa wama vou abu ú yiku abu waji. Ká vyin pukan nyaken yi apa wana eon ku vo abu ki byeu raba. 43"Nī fo be ndi danra, 'Ú con ajou, ú ngha pajukun baa zeu.' 44Ama tanma ami mna dan yini danra ní con pajukun baa ri zeni ní pya Cidon we pajukun baa na tani fyin yo. 45Ki cin waa jiji ní ci zhenzhen baajinderi bu Atani wa ki don, ki cin waa ku yi anyunua na tu ki cin bu pajukun baa tsa abu wa baba, ba pajukun baa tsa abu wa sansan nu dzun­ dzun. Kukà yi acù ri ta ki cin bu pajukun baa tsa abu wa sansan, ba pajukun baa tsa abu wa baba. 46Ci numa ra nima cón pajukun baa con jini kenken maari niri du vokwin ke kiyo? Abe pajukun baa ri pan abuwe hora bà bena tsa numa du ba? 47Nima nà jen, ni mana nà bazhenzani maari zoa, ni tsa kake waji wa kā pajukun badati hun? Pajukun baa yibe Cidon bara bà bena tsa numa du ba? 48Ci numa ra ní ci byecuni horododo numa ci tsa­ dzu waa Atani wa ki don ci ra.

will be added

X\