MATIYU 24

1Yesu do pwadzu ki tan wa wa Cidon bu Yahudawa, se abe baa bàku bi ki byea danra, "Ú mbyà atan waa be myi ba abàn baa sansan hora." 2Se Yesu dan yibe danra, "Ní mbyà abàn baakara. Mna dan yini aji wajinderi, kwan ba gbenbe waa be ci baku kata, abàn dzun waa beri fanku so don baani." 3Waa Yesu tuci ki cin kwen waa beri baku danra, Zaitun ra, abe baa bàku zo dibe numa bi ki byea, be dan yiku danra, "Ú dan yii, ayo wani waa abu baaji ribi tsa? Amà bu ke waa uri tà yii jiji i mbyàyi waa anyunu waa uri bi kasen anyunu wa kennu?" 4Yesu dan yibe danra, "Ní tsa sansan, niká zen nde yi apa dzun ku puni ba. 5Anyunu nabi waa pajukun hwehwe numa ribi nde zènmi bye pajukun kiyo suu numa beri jan co danra, be ci Kiristi. 6Niri bi fo don bu aken wa nunu ki tswenni, ni kari fo don bu aken wa nunu ki fin tswen badati nana numa, ama niká geni mikyin ba. Ci ken ribi tsa numa ama anyunu wa kennu ngha mbaa raba. 7Finka acincin acincin ribi nuken ba dibe, akù ba akù ribi nuken ba dibe, abye badati ki jinni ki bye badati ribi ndedi suu numa, ambo wa ciho numa kari bwan. 8Ama abu baakara ci afyin wa kapyen tiri. 9A hunnu ki nyaken beri honi ka fyin, beri bwanni du, niri kan abu baa zeze ko kini kata ki bye pajukun ki cin azènmi. 10Ayo wakara pajukun suu numa ribi kokwi ki nyaco bu Cidon. Apa dzun ri nde apa dzun hwa aji, beri ze dibe. 11Pajukun baa kankan baa na so dibe danra, be ci baa da adòn hora beri bi gbe pajukun badati ki finni be jan nyaco bu Cidon. 12Ki cin waa abu wa baba ri muna ki fin tswen suu numa, pajukun ribi conbe dibe kēnkēn riba. 13Ama apa wama ci gbangban numa ba wajinderi keke ya anyunu wa ken­ nu kuri bi nwàdzu. 14Aji wa San­ san wakara wa ki cin tsòn bu Cidon, beri dan yi mbyà pajukun kata ki fin tswen ma fo ra hunnu anyunu wa kennu ribi tsa. 15"Niri bi mbyà, 'Abu wa shendi', waa Daniel apa wa da adòn ndi zen aji ki cin'a ra, pan­ tse ki bye wa nyenye." (Apa wa fon afa: Ú hwà yiu ba cinna bu aji waji ri!) 16Pajukun baa ki Yahudiya bé she neya ki cin kwen. 17Apa wama ki citon tan'a kú dzwa jinni mwamwa numa kúká tsaba yo danra kuri ya kà ki tan ku ho tswen badati ba, 18Apa wama tsa butso ki da, kuká nga danra kuri bi ndo ku ho tukpaa badati ba. 19Ḿm̀ hun bu bawuwa baa ci ba fin, ba baa ci ba baci baa rijan baa na ma myi tiri ki vo, ki bye anyunu wakara! 20Ní vo Cidon yo jiji ayo waa abu wakara ri ko ra, kuká ko ki fin adinu ba, ko anyunu wa ngha nwo ba. 21Afyin wari bi duni ra, mà tswen kan, mà tswen kù ra, afyin waji du foa apa dzun numa fo raba, ko ki pyen tswi afyin waji ribi dua apa dzun numa ba ko titi. 22Cidon kodzu hwe bu anyunu kasen ba nyaken ra, kuri ma kodzua ba, apa wari nwàdzu anyunu waji baani. Ki cin pajukun baa cece bua waa ku ce, Cidon kodzu hwe bu anyunu waji kasen ba nyaken ra. 23Numa ra, ko kani kata ma dan yiu danra, "Mbyà Kiristi ki bahun hun! Ká zen nde pan vo ki bye ajia ba. 24Ki cin waa pajukun baa kankan hora badati ribi danra be ci Kiristi, badati ribi danra, be ci baa da dòn bu Cidon. Pajukun baa kankan baaji beri bi tsa abu wa ken nwo badati, ba abù baa kyahozo du, ki cin waa jiji be pu pajukun be fan nyaco bu Cidon jinni. Bema du pyo beri bye pajukun baa Cidon cebe hora, beri ma kyan danra beri tsaka wa tsa numa. 25Ní gon tson fo ajimi waa m dan yini ra, avo waa anyunu waji ngha mbaa raba. 26"Apa dzun ma dan yiu dan­ ra, 'Ú mbyà Kiristi ki fin hwan ki bahun,' Ká yau kiyo ba. Ko kuma dan yiu danra, 'Kiristi yu ci tan kire', ká pan u vo ki bye aji waji ba. 27Ki cin waa aku Nwu bu pajukun ribi ci tsadzu acu ri vyinzo, ri yi abye yafan jinni kata ki don, nde ki nyu­ nupon ya ki nyuzota. 28"Abye waa akwan ma nayo ciri abye waa anyifyi ri we yo. 29"Ki nyaken waa bema wa fyin wakara ma nwadzu numa ra, anyunu ribi nà tsuken jinni, a son ri gbefi, atswí ri dzu nya jinni, abu badati ki hwadon kata ri ndedi. 30Numa ra, àmà bu wa bibi bu Nwu bu pajukun ri ta dia ki don. Ki nyaken wakara tsu pajukun wani ki myi kata ri kan yiki waa beri mbyà Nwu bu pajukun dzu ki hwadon ki bye anandi nabi ba gbentsòn hwe­ hwe numa. 31Kuri bi tson zhen­ tsōn'a kapyen bi nwe hyu gbangban numa beri ho pajukun baa cece bua ki bye cin pwe nyena bu tswen ra kata kwan bye dzundzun. 32"Ní fyen abu ki cin bu hin tin, Ayo waa avoa ma tashuma, ku mana tswa je numa ra, nī yinu danra acu kone na dzubye ra. 33Ci numa ra, dede waa nima mbyà abu baakara kata baa m dan yini ra, ní yinu danra, anyunu bayo ra, har ku bi zan ra ki nu nyakyon ra. 34Mna dan aji wajinderi pajukun baa tanma hora ri hube ba, se abu baakara ma tsa ra hunnu. 35Abye wa ki don ba abye jinni ri ji jinni, ajimi ri jia jinni ba. 36"Apa dzun baani wa yì anyunu ko ayo waa abu baakara ribi tsa, ko zhentsōn bu Cidon ki don ma yibe ba, ko aku Nwu ma yìa ba, se Ata Cidon ba dia yì ri vinni. 37Abu wa ndi tsa ki we bu Nuhu ra, ribi tsa numa dede waa Nwu bu pajukun mari kasen bi ra. 38Ci tsadzu ayo dzun kapyen waa acu ndi ta gbanyo ra, pajukun na ji, nari wa, bawunu foji bawuwa wana banban, bawuwa foji ba­ wunu wana banban keke nde numa ya anyunu waa Nuhu kaya ki fin akò ra. 39Be yìbe abu waa be ki fin'a ba, acu ta gbanyo bwan hobe don kata. Aku Nwu bu pajukun anyunu waa kuri kasen bi ra ri ci numa. 40Ayo waji pajukun pyinna mana tsa butso ki da, ki bye dzundzun beri nde wadzun beri fan dzun. 41Bawuwa pyinna mana hwa kwin ki takwin beri nde dzundzun beri fan dzundzun. 42Ci numa ra ní mbyā dini soso ki nya­ co ki cin waa ni yìni anyunu waa Cindoni ri kasen bi raba. 43Ní yì sansan wa sen ndo rima kyan yì dede waa avyú ribi, kuri kyan ri ci nwe cin'a nwenwe ci, kuri kyan ri zen'a nde yi avyu ku kaku ki ndo ku vyiku tswén ba. 44Ci numa ra ni ci nwe cinmi nwenwe ci, ki cin waa aku Nwu bu pajukun anyunu waa kuri bi ra, ciri anyunu waa ni soni hwan danra, kuri bi ba. 45"Akani ciri anya apa wajinderi wa byenbyen, waa cin­ doa ndeku so ki cin bu bujube ki bye ayo wa fye ra? 46Anya wama tsa butsoa sansan kata ayo waa cindoa ma kasen bi ndo ma duku numa anya waji ri mbu mikyin. 47Mna dan yini ajinderi cindoa ri ba tswén'a waa ku ci baku kata yiku ki vo. 48Ama anya waji ma ci anya wa baba, ku mana ga aji ki fin mikyin'a danra, 'Cindomi ri kasen bia mwamwa ba.' 49Anya wakara ma pan anya badati hora ba agba wa dada, kuma ri ji, kuma ri wa ba ajoa hora mari pyenpyen, 50se anyunu dzun anya waji yìa ba, kuna danra cindoa ri bia raba, anyunu waji ku gbàn zan ra, tsa pwi. 51Kuri daku gba tutu numa, kuri panku taya bye waa pajukun baa ta ban nde vo yu nyaken ra kiyo ra. Kuri ci bye waji kundekuto dzwān nyi.

will be added

X\