MATIYU 20

1"Atsòn bu Cidon we dzun ba apa dzun wa sen ada anab wa kwakyi dzun numa. Ku pwadzu aponpon pyuu numa ya nyà pajukun baa be bi tsaku butso ki da ndoa. 2Ku zen nde danra kuri hwabe abè ci tsadzu waa beri hwa baa tsa butso ra, be tsa ti pan ki fin abaadzwin dzundzun ko wani anyunu. Ku tsonbe ya ki daa. 3Se dede asho tsunyo numa ku pan nyaco wa ya ki nu ti, ku mbyà pajukun badati pan tsebe numa azota, be tsabe butso dzun ba. 4Ku dan yibe danra, 'Ni bi, ni ya tsami butso ki dami, mri hwani abèni mbamba tiri numa.' 5Se be ya, Anyunu ci yobaba bwa numa, se apa waji kà du pajukun badati, ku tebe ya ki da. Waa anyunu ka pukan jinni numa kukà tsa numa ba pajukun badati. 6Har tanmá waa anyunu na nga wa koko numa apa wa sen da waji kà mbyā ya ki nu ti, ku mbyà pajukun badati tucibe azota numa tsabe abu dzun ba, Se ku mbyebe danra, 'Ake tsari jinna ni tucini azota numa tsani butso dzun ba?' 7Be dan yiku danra, 'Ki cin waa apa dzun dai butso ba.' Se ku dan yibe danra, 'Ani du, niya tsa butso ki da ndomi.' 8"Waa anyuzota ta numa wa sen da dan yi cin bu baa tsa butsoa ra danra, 'Bā baa tsa butso hora nde u hwabe abebe, jo nwoa ki cin bu baa tsa butso waji ki nyaken nde numa keke ya te bye baa kyan kapyen jo nwoa ra.' 9Pajukun baa bi butso ki nyaken be hwabe abè abaadzwin dzundzun ken cin dibe. 10Pajukun baa kyan kapyen jo nwo butso ponpon ra, ya ki byea, bena ga danra, kuri bi hwabe bube kagben bu pajukun baa dati hora ri kata, ama ko kani kata ki finbe be hwaku abaadzwin adzundzun vinni. 11Waa be pan abèbe kata be foji anu wana hwènhwen ba wa sen da wa dabe butso ra danra, 12'Ai wa tsa butso avo ponpon anyunu tu ken'i ki cin, ama pajukun baa bi ki nyaken anyuzota ra, ù hwa­ be abe bube bai mba dzun.' 13Se wa sen da waji dan aji ba apa dzun ki finbe danra, 'Ayoo, m jiu abu dzun ba. U tsau ti pan waa m hwau abè abaadzwin dzun­ dzun anyunu butso dzundzun ba? 14Nde abu wa ci buu ú ya kyon u. Ami con ri hwa baa bi ki nyaken abèbe ba buu mba dzun. 15San'a waa m tsa abu wa sansan wa san hwanmi ba atswénmi ba? Ko una fifi ki cin waa m ci apa wari tafan avo ra?'" 16Yesu ka mbyā dan yibe danra, "Ci numa ra apa wa ki nyaken ri ciri apa wa kapyen, apa wa kapyen ri ci apa wa ki nyaken." 17Waa Yesu naya ki Urushali-ma ra ku ho abe baa bàku hora kwan dzun dzwe nwa pyinna hora ya ki kankan ki nyaco, abe ci azo dibe vinni. Ku dan yibe danra, 18"Akyōn waa ina ya ki Urushalima kara beri ya nde Nwu pajukun dzo abe von baa ciho, ba manu baa ri fyen aji bu Cidon ki vo, beri foku kwen wa ya kindo. 19Ki nyaken wakara beri ndeku dzo pajukun baa yibe Cidon ba ki vo, jiji be tsaku wò, be daku akpan, be ndeku kan ki cin hin wa shon gege, kuri hu ya kindo, ama anyunu wa hwa tsara Cidon ri ba doku don ki bye aki ba cindi." 20Awa bu Zabadi ba bazhen­ zhen'a bi ki bye Yesu, ku tu ben jinni ki pyen'a danra, kuri con ku voku abu dzun. 21Yesu mbye­ ku danra, "Ake waji una con?" Se ku voku danra, "Dede waa uma ri nda weu tuci ki bye adudu bu amàu ra, u yi bazhen­ zhenmi baa kwan dzun pyinna hora dzun ku ci vo wunuu, dzun ku ci vo suu." 22Yesu dan yiku danra, "Ni yini abu waa nina vo kara ba. Niri bi tsayi wa wa tswi avyé waa mri wa ra?" Be dan yiku danra, "Iri tsaka." 23Yesu dan yibe danra, "Ajinderi tswi avyé waa mri wa ra, niri wa numa du, ama byecu wa ki vo wunumi, ba wa ki vo sumi cia bumi waa mri yini ba. Atami Ci­ don ciri wari yi pajukun baa ku mbyāsan byecu baaji sobe yo." 24Se abe baa bàku badati dzwe hora fo abu waa apyinna hora vo ra kyinna nabe. 25Se Yesu babe nde kata bi kwan pyen'a, ku dan yibe danra, "Nī yinu danra akù baa ki fin tswen ri tà gbentsònbe ki cin bu pajukun ki fin tswen, abe tsònku hora ri zen aji ba gben numa yi pajukun. 26Ama ki byeni ri cia numa ba. apa wama con ku ci ba hwe ki finni kari kata, ci ken ku kan anyani kata. 27Apa wama con ku ci baco ki finni ci ken ku ci anya buni kata. 28Ci tsadzu waa Nwu pajukun bi ki fin tswen kire, ku bia waa ku yi pajukun be tsa nyaa ba, ama kú tsa nya bu pajukun badati, kú nde dia yi aki ku hwa penre pajukun suu numa." 29Yesu ba abe baa bàku do fan bye Jeriko riya, se abi bu pajukun gbuu numa do bere Yesu ki nyaken. 30Pajukun baa gbànzo pyinna tuci ki nu nyaco waji numa. Waa be fo danra Yesu na nwadzu ya ra, be nde kyube ki don ba gben numa na danra, "Cindoi Nwu bu Dawuda, u hwi cicii!" 31Abe bi bu pajukun baa na bà Yesu ki nyaken hora nyabe nde danra, be bànde ba anube. Ama agbàn­ zo pyinna hora da ndekuto ba gben numa danra, "Au Cindoi Nwu bu Dawuda ú hwi cicii!" 32Se Yesu pantse jinni ki nyaco ku babe nde a mbyebe danra, "Akake waji nina con m tsani?" 33Be dan yiku danra, "Cindo ina con ú pofan'i zoi yo!" 34Yesu mbyà cicibe, ku nde voa gobe ki zo, mwamwa numa azobe tafan jinni ra, be ba Yesu kyen dzun ya.

will be added

X\