1 Ayo waa Tibariya Kaisar zan aju dzwe nwa tswanna ki bye atson ra, Bilatus Babuntu ci akù wa ki Yahudiya, Hiridus ci akù wa ki Galili, Filibus nwuzaa ci akù wa ki Ituriya ba Tarukuni, Lisaniya ci akù wa ki Abelene. 2 Hanana ba Kayafas ciri avon baa ciho kari kata. Dede waji wakara Yohanna ci ki yo hwan Cidon yi ajia pwaku jiji ku nde ajia dan yi pajukun. 3 Yohanna do ya kyen shukwa bye baa ki nu nú waa beri baku danra, Urudon ra kata. Kuna dan yi pajukun danra, "Ni vyin pukan mikyin bi ki bye Cidon, ni gadi ba abu wa babani, be tsani batisma, Cidon ri fan abu wa babani yini." 4 Ishaya apa wa da adon bu Cidon ta ki fin Afaa danra, "Apa dzun na da ndekuto ki yo hwan danra, 'Ní fyan san nyaco jiji Cindoi ku bi dzwa. Ní gbe ndafan nyaco baa nghangha gwegwe hora jinni soku yo. 5 Ní za jen wemu ponshi wani kata. Ní dagban gondon ba cin kwen wani kata we jinni be ji ban jinni. Nyaco baa nghangha hora, ní gbe ndafanbe. Nyaco baa baba baba hora be ji ban jinni pyasi numa. 6 Pajukun kata ri mbyà waa Cidon ri nwàdzu pajukun ba azo.'" 7 Pajukun suu numa bi ki bye Yohanna jiji ku tsabe batisma. Yohanna dan yibe danra, "Ani agwa hora! Akani dan yini ri danra ní she nwàdzu ki vo bu kyinna wari bi ra? 8 Ní tsa abu wa ta danra, nī pukan mikyinni bi ki bye Cidon ra ajinderi! Niká cani co ba Ibrahim danra ku ci Yakuni ba. Mna dan yini Cidon tsayi wa vyin pukan aban baa na kara be kan zhenzhen bu Ibrahim. 9 Tanma numa be nde gatiri hwa nwo hin na ge ra. Ko hin wani kata wama nwaa nwa wa sansan ba beri ge kenku nde ku ta yaya ki pyu." 10 Pajukun mbyeku danra, "Numa ra, í tsa nini?" 11 Ku dan yibe danra, "Apa wama ci ba tukpa pyinna ku gbe dzun dze apa wa nyani baku. Apa dzun ma ci ba buju ku kodzu yi apa wa nyani." 12 Pajukun baa ri pan buwe bi ki byea, bena con ku tsabe batisma. Be mbyeku danra, "Manu bui iri tsanini?" 13 Ku dan yibe danra, "Niká ge abè kwan cin buwe wa panpan ba." 14 Se banuken badati bi ki byea du. Be mbyeku danra, "Ai du iri tsanini?" Ku dan yibe danra, "Ko abè, koke kata niká dafye pajukun yo ba gben, ko ba akan wa kankan ba. Ní mbyà abè sonni waa bena hwani ra, mba tiri ra numa." 15 Pajukun hora kata na ga aji ki fin mikyinbe ba cucu wa cucu ki cin bu Yohanna danra, ko dzun tiri ku ci Kiristi ho. 16 Se Yohanna dan yibe kata danra, "Apa dzun wa kami ba hwe suu numa nabi ki tiri ki pyen. Ko aju tabea ma, m kenmi waa m kan jinni m fenfan ba. Ami mna tsani batisma ba jape, ama aku wari bi ra, kuri tsani batisma ba Den den bu Cidon ba apyu. 17 Kuri bi ba abí wa tā za ki voa jiji ku tā vinni aza kata. Kuri tā ngyiza we fin age, ama kuri ho tsin'a ya tsontson ki pyu wari den'a jinni ba, ko nukon!" 18 Yohanna dan yi pajukun Aji wa Sansan bu Yesu ku gbebe tson ki bye nyaco tswi tswi. 19 Ama Hiridus wa na akù, Yo hanna gbeku nde suu numa ki cin waa ku fyere awa bu nwutaa nde ban avo waa ku hua raba, ba tswi abu baa baba badati baa ku tsa. 20 Ki nyaken wakara abu wa baba waji neku kwankwan kiyo, ku pan Yohanna hwa tan. 21 Ki nyaken waa Yohanna tsa vinni pajukun kata batisma ra ku tsa Yesu ki nyaken. Dede waa Yesu na pya Cidon numa se abye hwadon pofan jinni, 22 Den den bu Cidon tu dzu don nabi ci tsadzu ahwan numa bi ki cin'a, Akyu dzu don bi na danra, "Au ci Nwu wa conconmi. Mikyinmi na fo vya bau tutu." 23 Dede waa Yesu pan butso bu abu wa fyenfyen ra, ku zan aju didzun kyadzwe ra. Pajukun na so ki fin mikyinbe danra, Yesu ci nwu bu Yusufu. Be yi danra Yusufu ci nwu bu Heli. 24 Heli ci nwu bu maliki, Maliki ci nwu bu Yanna, Yanna ci nwu bu Yusufu, 25 Yusufu ci nwu bu Matatiya, Matatiya ci nwu bu Amos, Amos ci nwu bu Nahum, Nahum ci nwu bu Asali, Asali ci nwu bu Najaya, 26 Najaya ci nwu bu Mayata, Mayata ci nwu bu Matatiya, Matatiya ci nwu bu Shimi, Shimi ci nwu bu Yuseka, Yuseka ci nwu bu Yahuda, 27 Yahuda ci nwu bu Yohanna, Yohanna ci nwu bu Risa, Risa ci nwu bu Zerubabel, Zerubabel ci nwu bu Shalatilu, Shalatilu ci nwu bu Niri, 28 Niri ci nwu bu Maliki, Maliki ci nwu bu Adi, Adi ci nwu bu Kusane, Ku sane ci nwu bu Alamadama, Ala madama ci nwu bu Ari, 29 Ari ci nwu bu Yosi, Yosi ci nwu bu Ya rima, Yarima ci nwu bu Matati, Matati ci nwu bu Lawi, 30 Lawi ci nwu bu Simiyon, Simiyon ci nwu bu Yahuda, Yahuda ci nwu bu Yusufu, Yusufu ci nwu bu Yu nana, Yunana ci nwu bu Aliyaki-mu. 31 Aliyakimu ci nwu bu Malaya, Malaya ci nwu bu Ma nana, Manana ci nwu bu Matati, Matati ci nwu bu Nathana, Nathana ci nwu bu Dawuda, 32 Dawuda ci nwu bu Jesse, Jesse ci nwu bu Obida, Obida ci nwu bu Boaz, Boaz ci nwu bu Salamuna, Salamuna ci nwu bu Nahshon, 33 Nahshon ci nwu bu Aminadabu, Aminadabu ci nwu bu Arama, Arama ci nwu bu Farisa, Farisa ci nwu bu Yahuda, 34 Yahuda ci nwu bu Yakubu, Yakubu ci nwu bu Ishaku, Ishaku ci nwu bu Taraha, Taraha ci nwu bu Nahura, 35 Nahura ci nwu bu Saruja, Saruja ci nwu bu Rau, Rau ci nwu bu Falaja, Falaja ci nwu bu Abiru, Abiru ci nwu bu Shela, 36 Shela ci nwu bu Kanana, Kanana ci nwu bu Arafashada, Arafashada ci nwu bu Shemi, Shemi ci nwu bu Nuhu, Nuhu ci nwu bu Lamaka, 37 Lamaka ci nwu bu Matushalaha, Matushalaha ci nwu bu Enok, Enok ci nwu bu Yarada, Yarada ci nwu bu Mahalayilu, Mahalayilu ci nwu bu Kanana, 38 Kanana ci nwu bu Anosha, Anosha ci nwu bu Seti, Seti ci nwu bu Adamu, Adamu ci nwu bu Cidon.
