1 Bawuwa baa ya nya abyu wa nufyin sansan numa jiji be ya pa kwan bu Yesu ki dia ra, anyunu Lahadi wa ci anyunu wa kapyen ki fin byecen, be na dodo ponpon pyuu numa abye na tsa biri biri numa tiri ya ki shimbi. 2 Aban waa andi banuken hora nde be tsuken nu shi waji kiyo baku ra, waa be zan ki bye waji ra be mbyà aban waji gandzu taya kankan. 3 Be kaya ki shimbi waji ama be mbyàbe kwan bu Yesu ba. 4 Waa be ci bye waji na ga aji numa mwa mwa numa be wezo mbyà pajukun pyinna pantse na gobe kara, tukpa bufyen ki dibe na zun nyanya numa. 5 Azin pan bawuwa baaji se be tu ben jinni ki pyen bu pajukun hora. Pajukun hora mbyebe danra, "Ake tsari nina nya apa wa ci ba cindi ki shimbi? 6 Yesu baani kire, ku do ba cindi ra! Ní kye pan ba aji bua waa ku ndi dan yini avo waa ku ki tiri ki Galili ra, waa ku ndi danra, 7 Nwu pajukun anyunu dzun beri nde ku hwenji yi pajukun baa tsa abu wa baba, beri ndeku kan ki cin hin wa shon gege, kuri hu, ama anyunu wa kwan tsara kuri do ki don ba cindi." 8 Bawuwa hora kyepan ba aji waa ku dan yibe ra, 9 be do ki cin mbi ra kasen ya dan yi abe baa ri bà Yesu kwan dzun dzwe nwa dzundzun ba pajukun badati be dan yibe abu wakara wa tsa ra. 10 Bawuwa baaji azenbe danra, Mariyamu Magadaliya, ba Yuwana, ba Ma riyamu ayo bu Yakubu, ba bawuwa badati baa babe ya ki dzun ki bye abe fotson bu Yesu Kiristi, be dan yibe aji wakara kata. 11 Ama abe fotson bu Yesu na ga danra, ko aji wa nya hwan azota, be yibe wajinderi ki bye aji waji ba. 12 Se Bitrus nde ashò ya dzwa ki shimbi waji, waa ku ya zan yo numa ku kan jinni dizo ki shimbi waji ku mbyà adòn tukpa bufyen waa be ndi nde penku kiyo ra ken ciri ki kankan numa vinni. Se ku do kasen ya ki ndo na ga aji ki cin abu wa ken nwo wakara wa tsa ra. 13 Anyunu waji waa Yesu do ki shimbi ra, pajukun baa bàku ba mikyin dzundzun kwan dzun pyin na pan nyaco dzwa na ya ki da dzun waa beri baku danra Imwasu. Nde ki Urushalima ya bye waji zan lamba atsupyen. 14 Waa be kyenkyon ba dibe naya numa bena vyace ba dibe ki cin abu baa tsa ra kata. 15 Waa be ki fin ace wa vyavya ba dibe ki nyaco naya numa, se Yesu ba dia kpasun bi dube kyen bye dzundzun babe naya. 16 Ama be mbyà yibeku waa ku ci Yesu ba. 17 Yesu mbyebe danra, "Nina vyace ke ba dini dzwa co nabi ra?" Se be pantse jinni gbe tsuken azobe ki cin kata, 18 A dzundzun ki finbe apa pyinna hora, waa beri baku danra, Kiliyo bas ra mbyeku danra, "Au dzun dzun u vinni ciri akyon ki Urushalima wa yiu abu baa tsa ki fin anyunu baakara ba?" 19 Ku mbyebe danra, "Akake waji tsari kiyo?" Be dan yiku danra, "Aji wa ki cin bu Yesu apa wa ki Nazarati. Ki pyen bu Cidon ba ki pyen bu pajukun kata ku ci apa wa da adon bu Cidon wa ciho numa ki bye aji wa zenzen'a ba butso wa tsatsaa. 20 Baco bandoi, ba abe von, ba baco badati baa ri fo kwen tesuku dzo Bilatus ki vo jiji ku foku kwen bu aki, se be ndeku kan ki cin hin wa shon gege. 21 Bui ki byei i lolo mikyin'i so danra ku ciri apa wari penre zhenzhen Isra'ila don. Ki nyaken wakara jin na anyunu wa kwan tsara kara waa abu waji tsa. 22 Bawuwa ba ndoi badati baa ya ki cin mbi waji aponpon pyuu numa ra kasen bi dan yii aji wa ken'i nwo, 23 danra be mbyàbe kwan'a ba. Se be kasen bi danra zhentsōn bu Cidon ta dibe yibe danra, Yesu do don ba cindi ra. 24 Se ki fin bawunu hora, badati ki finbe ya ki shimbi waji ya mbyà abu kata ci tsadzu waa bawuwa hora bi dan yii ra, ama be mbyàbe Yesu ba dia ba." 25 Ku dan yibe danra, "Ani bawunu ni jeje kagben, mikyinni nda kagben ní yi wajinderi ki bye aji kata waa pajukun baa da adon dan ra! 26 Cia ken waa Kiristi ku kà ki fin fyin baakara ki nyaken hunnu ku du hwe ba?" 27 Se Yesu dan yibe aji waa be ta ki fin Afa bu Cidon zan myi van numa yibe. Ku jo nwoa avo ki cin abu baa Musa ta ki fin Afa, ba abu baa baa da adon badati kata dan ki cin'a. 28 Be kyen naben gon da waa bena ya kiyo ra, Yesu tsa tsadzu kuri nwādzube nwādzudzu numa, 29 se be hwa denku be bàku baba jiji ku babe ci byebe, Be danra, "Ú mbyà anyunu ko ra, dati titi numa afitse ri tsetse ra kara, ú na jinni bai kire jin na." Se ku zen nde babe na jinni ki bye dzundzun. 30 Waa ku babe ci dzun na ji buju numa, ku nde gan bu borodi ku pya nde wa sansan we yo, ku koken gafan jinni yibe. 31 Azobe tsa piri numa be mybàyi ku, ki nyaken wakara ku janbe ki zo. 32 Se be dan yi dibe danra, "Mikyin'i kyan tà yii waa i mbyà yiku ba, dede waa ku kyan na zen aji bai ki nyaco na pofan afiri aji baa be ta ki fin Afa bu Cidon ra". 33 Ki bye ayo wakara numa be do don kasen ya ki Urushalima. 34 Be du abe fotson dzwe nwa dzundzun kata, ba pajukun badati babe ki bye waji. Be dan yi pajukun baa kwan dzun pyinna hora danra, "Ajinderi Cindoi Yesu do ba cindi ra, ku ta dia yi Siman!" 35 Se abe pajukun baa kwan dzun pyinna hora dan yibe abu wa tsabe ki nyaco ra Bekà dan zan myi yibe abu wa tsa ki byebe dede waa Yesu koken gafan borodi be mbyàyi ku danra ku ci Yesu ra. 36 Dede waa pajukun baa kwan dzun pyinna hora na dan yibe aji wakara numa, tsa biri numa se be wezo mbyà Yesu ba dia pantse finbe ci kara, ku dan yibe danra, "Ní ho kyinni we jinni." 37 Azin panbe yi dibe na vonvon, bena ga dan ko ci nwutsōn bu Cidon be mbyà. 38 Yesu dan yibe danra, "Ake tsani ri mikyinni gedzu numa, Ake tsari nina ga aji wangyi wan gyi numa ki fin mikyinni. 39 Ní mbyà vomi ba abemi ci kara, ní go vo ki dimi ní mbyà, nwutsōn bu Cidon baani ba awi ba ake tsadzu waa m ci kara ba." 40 Dede waa kuna dan yibe numa se ku ta yibe voa ba abea. 41 Nwobe ken jinni pyi be mbu mikyin, zanga mikyin waa be mbu hwe kacin ra, hwa be zenbe nde yi wajinderi danra ku ci Yesu ba. Se ku mbyebe danra, "Ni ci ba buju dzun wa jiji kire hun?" 42 Se be nde aje wa kan kan dzun nde yiku, 43 Ku dzwan ki pyenbe du zobe, 44 Ki nyaken wakara kata ku dan yibe danra, "Aji baakara kata ci aji bumi waa m ndi dan yini avo m bani ci tiri ki dzun. M ndi dan yini danra abu baa Musa ta ba abu baa abe baa da don bu Cidon ta so ki jinni, ba afa bu Avyon wa tsotso ki cinmi ra se nima tsa vinnibe kata ya dzwa myi." 45 ki bye wakara numa hunnu ku hun pofanbe azobe yo waa bé hwayi ba aji baa ki fin Afa. 46 Ku dan yibe danra, "Be ta aji so fin Afa numa danra, Kiristi ri wa fyin anyunu wa hwa tsara kuri do don pwadzu ki shimbi. 47 Beri dan yi pajukun jiji be fan abu wa bababe jinni, be pukan mikyinbe bi ki bye Cidon. Beri dan yibe danra ki fin zen bu Yesu Cidon ri fan abu wa bababe ri yibe. Beri kapyen nde aji waji wakara yi pajukun baa ki Urushalima hunnu be hun ri nde aji waji da gban nya ka pyo ko kini kata ki fin tswen. 48 Ani ciri pajukun baa mbyà abu baakara nu ba zoni, nī fonu ba tsonni. 49 Ami ba dimi mri tson nuge bu Atami ge ra bi yini. Ama ní ci finka Urushalima wawe kiyo ya zan anyunu waa beri yi abyon ri dzu hwadon bi ki cinni ra." 50 Ki nyaken wakara Yesu ho baa bàku hora pwadzu ki Uru shalima ya zan ki finka Baitanya. Waa be ci kiyo ra Yesu ho voa ki don pya nde wa sansan webe ki cin. 51 Dede waa kuna pya nde wa sansan webe yo numa, tsa biri numa vinni Cidon nde Yesu neya ki hwadon ki ndoa. 52 Be waku, be kasen ya ki Urushalima ba mikyin wa mbumbu hwehwe numa cia wa dandan ki nu ba. 53 Be ci gban ki tan wa wa Cidon ko nukon na she Cidon ki byeri.
