LUKA 10

1Ki nyaken wakara Cindoi Yesu ce pajukun dipa tsara kyadzwe. Ku gafanbe kyen pyinna pyinna ba dibe tsonbe ya ko ki finka wani, ko ki da bye wani kata. Se ki nyaken hunnu kuri ban ya mbyàbe ki nu butsobe. 2Ku dan yibe danra, "Buju baa benben na ki da suu numa, ama pajukun baa ben buju baaji kenbe ba. Ní vo wa sen da yo jiji ku dà pajukun we da jiji be benku buju yo. 3Ní ya! Mna tsonni naya tsadzu mna tson àdòn naya ki fin vyinvyindzwan. 4Niká nde ashuku ko andú ba, niká dzo tabe ba, niká nà apa dzun jen ki nyaco ba. 5Ko ndo wani kata waa nima kaya yo, ní kapyen danra, 'Ani baa sen ndo, Cidon ku yini mikyin wa na jinni!' 6Apa wama pan nde wa sansan wakara, kuri ci ba kyin wa na jinni, ama apa dzun ma pan'a ba, akyin wa na jinni ni ri kasen bi tiri ki byeni. 7Ndo waa nima ya ka kyon kiyo ra, niká do pwadzu ya ka kyon ki ndo apa dzun riba, keke ya zan anyunu waa niri do. Bema yini jan ni wa, bema yini buju ni ji, ki cin waa apa wa kofyin fye waa ku ji fyin bu byetua. 8Ko finka wani kata waa nima ka yo, bema panni, buju waa bema nde bi yini ni pan ni ji. 9Pajukun baa dā ado na yo ra, ní nwàdzube ki bye adobe. Ní dan yi pajukun baa ki finka waji danra, 'Anyunu bu atsòn bu Cidon ki don naben jinni ra.' 10Finka waa nima kayo kata bema panbeni ba, ní pwadzu ya ki nyaco ki finka waji ní danra, 11'Kó vivi wa ki finkani wa bànai ki bei ra, ī pa hobe na nyani ki jinni kara d akwe bwii ki byeni hun, ama ní yinu danra atson bu Cidon ki don naben jinni ra!' 12Mna dan yini kara, Anyunu kwen bu Cidon ra, ko pajukun baa ki Sodom ma ri kabe ki fin fyin mbamba pajukun baa ki finka wakara ba! 13"Ḿm̀ hunni, ani pajukun baa ki finka Korasinu! Ḿm̀ hunni, ani pajukun baa ki finka Baitase-da! Beri ma kyan danra, butso wa tsatsa ba abu baa kyahozo baa ken nwo bu gbentsòn bu Cidon baa tsa ki finkani ra, rima ndi tsa finka Sur, ba Sidon akyan gbogbo numa pajukun baa kiyo ra, beri kyan we ayoke tukpa ki dibe dzu ndé bye tsonpyu pe mikyin fan abu wa bababe jinni ra. 14Mna dan yini kara Anyunu waa Cidon ri fo kwen'a ra, kuri hwi pajukun baa ki Sur ba Sidon kani ani pajukun baa ki Ko­ rasinu ba Baitaseda! 15Ani pajukun baa ki Kafarnahum pa; nina con ní ndè cinni ki don yaya ki hwa cucu? Beri honi nya yaya ki jinni ki fin pyu ki kindo." 16Yesu dan yi abe pajukun baa ku gbebe kyon ra danra, "Apa wama gon tson fo ajini, ku fo ajimi hun. Apa wama nghani ku nghami hun. Apa wama nghami ku ngha Cidon wa tson­ mi bi ra hun." 17Pajukun dipa tsara kyadzwe hora kasen bi ki bye Yesu ba cucu wa cucu danra, "Cindo, pajukun baa ci ba awo wa baba ki cinbe ra, ima nya awo baaji nde ba zen u numa, be fo tson'i foji wana pwadzudzu ki cin bu pajukun baaji!" 18Yesu dan yibe danra, "M mbyà Shetan dzu ki hwadon dzu ta jinni ci tsadzu acù vyinzo. 19Wezo ní mbyà anyo, ba anē baa ci ba akyan hora m yini gben waa ní tebe abe ki cin. M yini agben waa ní te Shetan abe ki cin, abu dzun ri tsaani ba. 20Ama niká cu cucu ki cin waa awo baa baba hora na pwadzu ki cin bu pajukun raba, ama ní mbu mikyin ki cin waa be ho zenni ta so ki fin Afa wa ki ndo Cidon ki don." 21Dede wakara Yesu mbu mikyin suu numa ki bye Denden bu Cidon ku danra, "Ata, Cindo bu abye wa ki don ba bye wa ki jinni, m mbu mikyin suu numa yiu, ki cin waa u ho abu baakara yu pajukun baa sen yi, ba pajukun baa byenzo, ama u ho tà yi pajukun baa cibe ba ayì ba. Ata numa ra wakara ciri abu wa we hwan u hun. 22"Koke kata Atami ba yimi ki vo, Apa dzun wa yì Nwu waji baani, se Atami waji. Apa wa ka yì Atami waji baani se Nwu waji, ba pajukun baa mma con m ta yibe Átami waji." 23Yesu vyin pukan zoa ya bye abe fotson'a numa, ku byu byubyu dan yibe ridan numa danra, "Azo baa ma mbyà abu baa azoni mbyà ra, Cidon ku kwanbe kiyo. 24Mna dan yini aji wajinderi kara, pajukun baa da adon bu Cidon, ba abe akù akù suu numa nya jiji be du abu baa ni mbyà hora mbyà, ama be mbyà kabe ba, be nya jiji be du aji baa ni fo ra fo tsonbe, be du kabe fo ba." 25Baco dzun wa sen yì suu numa ki fin Afa bu don bi ken mbafo Yesu. Ku mbye Yesu danra, "Cindo, mri bi tsanini hunnu jiji m du cindi wa ci ken­ ken?" 26Yesu mbyeku danra, "Abu waa be ta so fin Afa bu Musa ra ci kake? Una hwèn aji buu waji nini?" 27Baco waji dan­ ra, "Cidon danra, 'U con Cindou Cidon dzwadzwa ki fin mikyin u kata, ba cindiu kata, ba gben u kata, ba cinnau kata, u con ko kani kata ci tsadzu waa una con diu ra.'" 28Yesu dan yiku danra, "U dan coa, u ya tsa numa, uri du cindi wa ci kenken." 29Ama baco waji na con ku ta dia danra, ku cia apa wari tsa abu wa baba ba, ku mbye Yesu danra, "Akani ciri jo ndomi?" 30Yesu dan yiku danra, "Apa dzun do ki Urushalima na ya ki Jeriko, ku ya dzu bwan vo bu baa gbanco. Be panku pen fye ho tukpa ki dia don kata, be daku gba dada tira numa tenku fo, fanku te nu aki. 31Avon dzun dzwa nyaco waji numa nabi, waa ku wezo mbyà apa waji numa ku kyo nyaco hwaku ki jinni dzu kyakya ki bahun ya dia yo fanku ta bye. 32Apa dzun ki fin atsu bube Lawi baa ri tsa butsobe ki tan wa wa Cidon. Ku dzwa tiri nyaco waji numa bi, waa ku ya fen apa waji jinni numa, ku kyo co taku ki jinni dzu kankan ya dia yo. 33Ama apa dzun wa ki Samariya dzu nyaco waji na ya kyon du. Waa ku bi zan ki bye waa apa ra tana yo ra, ku wezo mbyàku numa cici tsaku, 34Ku bi ki byea ku paku byu ba jape anab ki dia, kpon be tsukenku ba adonbu, Ku wòre apa waji sen cin jakyia ndeku ya ka ki ndo kyon na daku do. 35Nakyabyea ku yi zhenzhen baa na tsa butso ki bye waji ra asho pyinna, ci vo kwinbe hun. Ki nyaken wakara ku ya du wa sen ndo waa ku ka kyon ki ndoa ra danra, 'Ú wemi zo ki di bu apa wakara sansan, avò waa uma bwan ki cin'a kata ma nwādzu ba wakara, mma ka­ sen bira mri hwau.'" 36Yesu mbye baco waji danra, "Apa wa­ kara wa dzu bwan baa gbanco ki vo ra, akani ki finbe tsara hora, u mbyà danra, ku ta apa wakara con?" 37Baco waji danra, "Apa wa ta yiku con ra, ci apa wa tsazaku yo ra." Yesu dan yiku danra, "Au ma u ya tsa numa." 38Dede waa Yesu ba abe fo­ tson'a na kyen ki da ki da na kyen ra, be ya zan ki da dzun numa Yesu shon ba awuwa dzun waa beri baku dan Marta, ku panku ka kyon ki ndoa panku vo pyinna ba nwuzaa wa wuwa dzun beri baku danra Mariyamu. 39Mariyamu bi tuci ki pyen bu Yesu na gon tson fo abu wa fyenfyen'a. 40Ama mikyin bu Marta tsaba jinni kata ki cin waa butso hweku ki di kagben. Se ku bi ki bye Yesu ku dan yiku dan­ ra, "Cindo, waa nwuzami she fan butso bàmi ki vo bi ci bau kire ra vyau vyavya? Gbagba, u dan yiku ku do don bi tsazami butso yo." 41Yesu baku nde dzwa pyin­ na kata danra, "Marta ù dzodi, akyin u ki don kata tanma. 42Ábu dzun ci kiyo wa san kari waa apa ku nya, Mariyamu nya du abu waji wa san kari rara. Apa dzun wa ken wa gbe fyere ku yo don baani."

will be added

X\