IBRAHIM 8

1Aji wa kwakyi waa ina dan ra, ciri, ī ci ba avon wa nda­ nda kari kata, ku ciri Yesu wari tu ci ki go kyekye vo wunu bu Cidon ki don. 2Kuna tsa butso bu avon wa ndanda ki Bye wa Nyenye Kari kata. Abye waji Ci­ don ba dia mbyári nda hwea ki byeri, apa mbyāa ri ba. 3Ko avon wa ndanda wani ka­ ta be ceku ki cin waa ku ndafan vo vyon Cidon vyon, ku bwan bupyu waku kiyo. Ci numa ra avon bui wa ndanda kari kata ci ken kuka du abu dzun waa kuri hwa yi Cidon. 4Akyan kuri ma ci tiri dzun bai ki fin tswen kire, kuri kyan tsaa butso bu avon ba, ki cin waa ki fin tswen kire avon hora na dzu tiri nyaco bu adon wa ndi gbogbo waa Cidon yi Musa ra. 5Butso bu avon waa bena tsa ra bena kàn nde bu butso waa Yesu na tsa ki don azota. Ci abu dzundzun ba Mu­ sa, ki bye ayo waa kuna nga ku fàn akpa ra Cidon dan yiku dan­ ra, "U tsa sansan. U tsa koke kata dzu tiri abe bu waa m ndi ta yiu ki ci kwèn ra." 6Ama tan­ ma Cidon nde butso bu von nde kwa Yesu ki vo ra, butso bua ra kari bu baco baa ndi ci avon ra. Yesu ciri ki yoba bu Cidon ba pajukun ci numa ra anu wa gege waa ku ge ki yoba bu Cidon ba pajukun ra kari anuge waa ku ndi ge ra ki cin waa abu waa Cidon genu kiyo bai ra kari wa ndi. 7Beri ma kyan danra abu dzun ndi tsabaa anuge wa ndi kapyen raba, beri kyan ri nyàbe anuge wa kwan pyinna riba. 8Ama Cidon mbyà bo bu pa­ jukun ku danra, "Anyunu nabi ki pyen waa mri bi ge nuge wa ripye ba zhenzhen Isra'ila, kwan ba tsu bu Yahuda. 9Anuge waji ri cia tsadzu waa m ndi ge ba bayakube anyunu waa m ndi hobe ki vo numa pwadzu ki fin jen bu Masar raba. Be ndi panbe nuge waa m ndi ge babe ra sansan ba, ci numa ra m pukan nyaken yibe." 10Cidon ka danra, "Nuge waa mri ge ba tsu bu Isra'ila ki bye anyunu wari bi ra ciri, mri yibe adon ki mikyinbe mri nde adonmi ta so ki hwanbe. Ami ri ci Cidonbe, abe beri ci pajukun bumi. 11Ki nyaken wakara nwu tswen dzun ri fyen tà yia nwu tswen dzun ko ajoa danra, 'Yì Cindoi Cidon!' Ki cin waa beri yimi nu ba dibe, pan ki cin bu baci nde numa yaya ki cin bu baco. 12Mri hwi cici bu abu wa bababe, mri kyepanmi ba abu wa bababe ba." 13Waa Cidon zen aji ki cin nuge wa ripye ra ku yi wa ndi kapyen ra kasen kan wa riko. Ī yinu danra abu wama kan akò foji wana tsaba yaya ki pyen, abua te jinni ra.

will be added

X\