BAGALATIYA 6

1Bazhenzami, ki finni hora nima du apa wa mana tsa abu wa baba, ani baa ci ba Denden bu Cidon ki fin mikyinni ra, ní nga jiji ní tsazaku yo jiji ní gbeku kasen bi ki nyaco bu Cidon. Ní tsa numa ki bye cin wa nde na jinni. Ní wà dini sansan jiji abu dzun kúká suuni ya tsa da abu dzun ba. 2Ní tan kè nde cin za jinni tswan za adini atswén bu aíyin wama duni. Ki bye wakara numa hunnu niri ta danra, ni kon adòn waa Yesu Kiristi nuni ra. 3Apa wama so dia danra, ku ci abu dzun, ama ki bye wajinderi byenbyen numa ku cia abu dzun ba, kuna bye dia bye­ bye. 4Ko kani kata ku mba abu baa ku tsa ra ku mbyà danra ko sansan re, kuma mbyà ma ci abu wa sansan kú mbu mikyin ki cin bu abu waji waa ku tsa ra. Kúká caco ndè dia hwa ba apa dzun ba. 5Ki cin waa ko kani kata ri nga ba atswén bua wa ki cin'a. 6Apa waa bema fyen tà yiku aji bu Cidon, san kari abu wa sansan waa kuma du ki voa kata ku ko yi manua wa fyenku abu ra ku ji dzun baku. 7Níká bye dini ba, apa dzun wari byeka Cidon baani, abu waa apa ma tà, ku kari ben tiri abu waji. 8Apa wama tsá abu wa vyaku ki dia vinni, adia waji ri hu so tsaba jinni. Ama apa wama tsa abu wa we hwan bu Denden bu Cidon kuri du cindi wa ci kenken wari dzu bye Denden bu Cidon waji ribi ra. 9Iká nì ba abu wa sansan wa tsatsa ba. Ki cin waa ima nìi ba abu wa sansan wa tsatsa ba, anyunu wa kyen iri pan avokwin wa sansan. 10Ci numa ra, ko ki bye ayo wani waa ima du apyo í tsa pajukun kata abu wa sansan, tuntun pajukun baa yi wajinderi ki bye Yesu Kiristi raba. 11Ní mbyà asin bu abu baa kwakyi kwakyi baa mna tā yini kara. 12Pajukun baa na zen aji bàvo kiyo danra ní kyu abukuni ra, be cí baa na nya jiji pajukun be nyabe. Abu wa tsa bena tsa numa ra ki cin waa jiji be nwa adibe don ki fin fyin wa wawa waa bena tà pajukun ki cin waa bena bà Yesu Kiristi waa be panku kan ki cin hin wa shon gege ra. 13Pajukun baa na bàvo ki bye aji bu abuku wa kyukyu waji rama be konbe adòn baaji dzwa myi sansan ba. Ama bena con jiji be kyuni abukuni yo ki cin waa jiji be zama ki cinni dan­ ra, ni zen nde yibe kyuni abukuni yo ra. 14Bumi ki byemi Cidon ku tsu coa waa m zama ki cin bu abu dzun. Mri zama bumi ki cin aki waa Cindoi Yesu Kiristi hu ki cin hin wa shon gege ra maari vinni Ki cin akia waji hunnu m fan abu baa ki fin tswen tanma bwan jinni, be ci huhu numa ci ki zomi, ami ka ci huhu numa ci ki zobe. 15Ko apa ku kyu abukua kisen, ko kúká kyua ba kisen, kata ci abu dzun­ dzun. Abu wa tutu kari ciri apa ku ci ba cindi wa ripye, 16Pajukun baa ci abu Cidon byenbyen numa, be kana bà aji wa ripye bu Cidon ra, Cidon ku sanbe sansan ku yibe mikyin wa na jinni. 17Pan kire jinna ya ki pyen, apa dzun kúká ci na tsami abu wa nakyin dzun numa riba. Ki cin waa m ci ba abanfyon baa be tenmi fo ki dimi ki cin bu Yesu Kiristi, bena tà danra m ci bu Cindoi Yesu Kiristi. 18Bazhenzami, Cindoi Yesu Kiristi ku sanni sansan. Ku ci numa.

will be added

X\