BAGALATIYA 4

1Zando wari ji atswén bu ataa ra, kuma ci tiri nwutishe ku ci tsadzu anya, ko waa kuri ji atswén bu ataa ri kata ra. 2Ayo waa ku ci tiri nwutishe ra, ku ci vo bu pajukun baa panku. Be kari mbyàku zo ki bye atswén baaji numa keke ya zan ki bye ayo waa ataa nde so danra ku hwe byen ken apa rara. 3Ci numa ki byei du, ayo waa mikyin'i ndi ci tiri bu baci ki bye aji wa gaga ra, abu baa ki fin tswen ndi pan'i kan anyabe kiyo. 4Ama waa anyunu mba tiri waa Cidon tson Nwua waa awuwa mbaku bi ki fin tswen ra Nwu waji nde cin'a na jinni yi dòn bu Yahudawa. 5Cidon tson Nwua ki bye nyaco wakara numa bi jiji ku penre pajukun baa adòn baaji na tsa butso ki cinbe ra don, jiji katai i kan zhenzhen bu Cidon. 6Ki cin waa ni ci zhenzhen bu Cidon ra, ku tson Denden bu Nwua bi ki fin mikyinni kuna bānde danra, "Abba Ata." 7Ki cin wakara ko kani kata ki finni cia anya riba, ama ku ci nwu tswen. Ci tsadzu waa Cidon honi kan zhenzhen'a rara, ku kari yini ji abu baa ku ho konsoni bazhenzhen'a ra yo. 8Ayo waa ni ndi yìni Cidon raba tiri ra, ni ci tsadzu anya, nina wa ajon baa cibe Cidon ba. 9Ama ci tsadzu waa ni yì Cidon tanma rara, ko sanfo kari, m danra Cidon yini ri ni ci bazhenzhen'a. Ake tsari ni con ni kasen ba nyaken ni ya bà ajon baa cibe ba agben ba. Tsanini nina con ni kasen ya kan anyabe? 10Nī yi anyunu badati hwe ba ason badati ba ayo badati, ba aju badati nwadzudzu. 11Mna we bonban ki cinni, butso waa m ndi tsa ki byeni ra kúká kan abu wa nya hwan azota numa ki tswen ba. 12Bazhenzami, mna voni, ní ten abemi, ni tsa abu ci tsadzu waa mna tsa ra. Ami ci tsadzu waa ni ci ra du. Nī tsámi abu dzun wa baba fo raba. 13Ní kyepan ba ayo waa m ndi kapyen bi ra, m ndi dan yini Aji wa Sansan bu Yesu Kiristi. Abu wa tsa m ndi ci byeni bani zan anyunu pyinna ra, ki cin waa m ndi fomi vya ba. 14Kwan ba waa ni ndi wa fyin na pan ado waji ra, nī nghami ba, nī sinnimi ba, ama nī panmi ci tsadzu nī pan nwutsōn bu Ci­ don, ko m danra tsadzu Yesu Kiristi ba dia. 15Ki bye ayo waji ra, ni ndi na mbu mikyin ki cin­ mi, tanma ake tsari ri? M tsa yi wa zen aji nuni danra, beri ma ndi danra, ci abu waa niri kyan tsaka, nī ndi ci ba mikyin waa ni nwa hou ngyizoni yimi ki bye ayo waji. 16Ase tanma numa m kan­ mi ajo zeni ra ri ki cin waa mna dan yini aji wajinderi ra? 17Pajukun baakara bena soni hwan ki dini kagben, ama abu waa bena ma ki fin mikyinbe ra san'a ba. Abu waa bena nga ra kata ki cin waa jiji be gani di bami, jiji ni sobe hwan ki dibe ci tsadzu waa bena soni hwan ki dini ra. 18Ci abu wa sansan pajukun bena so dibe hwan ki di, in abu waa be ma ki mikyinbe ra ma ci abu wa sansan. Sansan ina tsa numa ba dii, ko ki bye ayo waa mma bani ci byeni, ko ki bye ayo waa mma bamni ci byeni ba. 19Ani bazhenzami baa titi, mkà mbyā kana wa fyin ki cinni tiri ci tsadzu awuwa wa tu mba, se ma nde numa keke ya zan anyunu waa mma mbyà nī nga atswi mikyin bu Yesu Kiristi ra hunnu. 20Bé kyan danra m du nyaco mri kyan ci dzun bani tan­ ma cika mri kyan yi aji waa m dan yini, ki cin waa mikyinmi na kaa ki jinni ki cinni ba. 21Ani baa na bà aji bu adòn wa konkon ra, mna con m mbyeni danra, nī gonni tson fo abu baa adòn baaji dan raba? 22Be ta dan­ ra, andi gbogbo Ibrahim mba zhen bawunu kwan dzun pyinna. A nwu wadzun ra, awaa Ajara nwutōn mba ri yiku. A nwu wadzun ra Saraya awa shea mba ri yiku. 23A nwu bu wuwa nwutōn ra, be mba­ ku ci tsadzu waa beri mba zhen­ zhen baa zota hora. Ama a nwu waa Saraya awa shea mba ra, be mbaku ci tsadzu waa Cidon ge Ibrahim nuge ra. 24Tanma numa í nde so ci tsadzu cinna bu aji wa zenzen. Bawuwa pyinna hora ci cinna bu nuge apyinna hun. A nuge bu Ajara nwutōn ra dzu ki cin kwen waa beri baku danra Sinai ra bi. Bazhenzhen bu Ajara nwutōn baa ku mba ra, beri ya tsa nya. 25Ci tsadzu waa Ajara ci cinna bu kwen wa ki fin jen bu Arabiya waa beri baku danra Sinai ra, ku ci cinna bu Urushalima wa ki fin tswen wa ci kara hun. Ki cin waa ku ci byecu bu anya kwan ba pajukun baa na fin'a ra kata. 26Atna Urushalima wa ki don ra cia byecu bu anya ba, ku ci ayoi. 27Ki cin waa be ta danra, "Au wuwa wa mba fou nwu fo raba, ú cu cucu. Au wuwa wa tu fou mba fo raba, ú da ndekuto yiriri! Ki cin waa awuwa waa be ndi sinniku ra, kuri du zhenzhen hwe ka awuwa si rari." 28Bazhenzami, ci tsadzu waa Ishaku ciri nwu waa be ge nuge ki cin'a ra, i ci bazhenzhen bu Cidon ki bye nuge waji du. 29Andi ki bye ayo waa Ajara mba nwua ci tsadzu waa beri mba zhenzhen baa zota hora, a nwu waji tà nwu bu Saraya mba ki bye gbentsòn bu Denden bu Cidon ra fyin. Kà pan nai ki cin numa du, nde numa keke bibi jinna. 30Ama be tā ki fin Afa bu Cidon danra, "Ú kan wuwa nwutōn ra ba nwua kata pwa­ dzu. Ki cin waa nwu waa ayoa ci nwutōn ra, ri jia tswén bu ataa ba. Anwu waa awuwa she mba­ ku ri ra kuri jiri tswén bu ataa." 31Ci numa ra, bazhenzami, i cii zhenzhen bu wuwa nwutōn raba, ama i ci zhenzhen bu awuwa ben ki ndo.

will be added

X\